|
| 
|
مشكلتي ليست نفسية أو عقلية مشكلتي زحمة حياة
مساء الخير دكتور وائل أبو هندي على الرغم من أني أبدأ يومي زي البني آدمين عادي وحياتي عادية بس من فترة مبقتش أنا من غير إحساس مبضحكش بقول صباح الخير.. لأولادي وزوجي عادي.. مفيش روح مفيش ضحكتي مفيش بهجة حياتي في يوم وليلة قلبت كل حاجة راحت...
لكني انبسطت إني قدرت أسجل على الموقع وأحكي.. يمكن عندي مشكلة إني من فترة بقيت أتحمل مسؤولية حياتي لوحدي من غير ما أحكي مشاكلي ورغباتي ووإلخ.. مش عارفة..
ممكن تسمعني؟؟...
تركت بلدي وهاجرت لإحدى الدول ويا ريت لم أفعل كنت سعيدة صحيح لا يكفي احتياجي ولا يلبي رغباتنا بس أهوه.. حبيت أمشي وراء الطموح والجامعات المرموقة والعيشة الكريمة لي ولعائلتي، قفلت كل حاجة قفلت بوجهي... لا عمل.. لا دراسة.. لا شيء لا حياااااااااااااااااااااااااااااااااة
أعلم.. هناك مليون سؤال يجب أن أجيب عليهم لكن دعني أحكي أولا ومتأكدة ستفهم مشكلتي لأنها ربما ليست نفسية أو ربما هي كذلك... ولو وجدت حلها بكلمة وحدة خلاص هتسافروا آه لو تحصل ادعي لي تحصل أو متدعيش لو هسافر كانت حصلت مش عارفة.......................... طب ادعي لي يمكن أنت ربنا يحبك ويسمع منك..
مش عارفة...
فقط... اسمعني.. وانصحني وأرشدني.. ربما.. لديك حل أو فكرة.. ربما
مشكلتي بالحياة أني عندما أريد شيء يعني أريده وأفعل كل شيء كي أحصل عليه ولا أستسلم أو أيأس أبحث هنا وهناك أحاول مرة وثلاث وعشرة أبحث عن وجهة أخرى لكن هذه المرة خلاص ضعت مع عيلتي.. مستقبلي مستقبلنا انتهى تماما.. كما قلت هاجرت وتركت بلدي وبالتالي يجب أن أنتظر فترة حتى أتمكن من الحياة بمعنى "تركت بلدي ثم أنتظر ببلد فترة حتى أدخل البلد الآخر" ما حصل علقنا بالبلد الذي ليس مسموح لنا فيه أي شيء بلد الانتظار!! فالحياة بالنسبة لي دراسة عمل علاقات نجاح... إلخ كل هذا مفيش.. بل مستحيل!!
الآن حياتي عبارة عن قعدة البيت وأنا لا أصلح لذلك أبدا.. أموت.. كنت فين وبقيت فين!! يمكن أعجز عن ذكره أو كتابته أصبح ماضي لكنه عمري.. ماعلينا حبيت أستغل وقت فراغي وموهبتي بأشياء عبر النت قلت أستفيد من وقت الفراغ اللي عندي وحققت نجاح فيه الحمد لله وانبسطت بس مش هو ده اللي عايزاها مش هو.. عاوزة حاجات كمان وياه وأكثر منه.. والمشكلة الأكبر سبته عشان ده عبارة عن حد لازم يكون إيجابي 100% وأنا حاليا 0% حقيقي........................
بقيت عصبية أحاول أخفف ساعات بنجح وساعات لأ ساكتة برد على أد السؤال زوجي حاسس وسايبني على راحتي في كل حاجة من ناحيته والبيت والأولاد كله.. بنام متقطع ومش بشبع نوم وبقوم بدري وبكون نعسانة بس مش عاوزة أنام ومبحبش الليل بنام بصعوبة وبحلم بإني بامتحان ومش عارفة أحل أو بحل غلط أو حد بيساعدني ومبعرفش أنقل الإجابة أو مبعرفش أكتب الإجابة وساعات بكتب وأكمل وأكون فرحانة إيه النتيجة بيتقطع الحلم بفتح..
وكثير أحلم إني أجري أو عاوزة أجري وأهرب من حاجة وحركتي داخل الحلم ضعيفة بطيئة وبتمسك وعشان بزعل إني اتمسكت بفتح عنيا.. مع العلم إني كنت بشترك بمسابقات الجري المدرسية الشهرية والسنوية وكنت بفوز لأني بجري بسرعة وبين المدارس كانت مدرستنا بتكون الثالثة أو الرابعة..!! ليه بحلم كده معرفش!! له تفسير؟؟
محبطة تماما أنا محبطة مفيش ولا كلمة ولا حد بيحفز أي نقطة إيجابية جواية فقدت الأمل بأن ممكن يكون فيه حل.. أعيط بهدوء بيني وبين نفسي وأمسح دمعتي.. عشان مينفعش أقع الكل هيشمت في.. حاسة إني ضيعت مع عائلتي كل حاجة خلاص راحت.. هتقولي ارجعي.. طب إزاي!! وفين!! وعند مين!! أهل ماما خلافات ومشاكل وأهل بابا علاقتي بيهم لاتتعدى ذكريات طفولة.. وأهل جوزي خلافات برضه..
أنا وزوجي بنينا نفسنا واللي بنيناه هديناه عشان برا وبرا مجرد سراب............ هتقولي ابدئي من جديد..!! صعب أبدأ من أي حتة لازم من هناك أو أموت مع عيلتي بقى..
إيه قيمة الحياة وأنا مبعملش حاجة غير إني آكل وأنام وبس!!
مبقتش أصلي عشان كدة كتبت بالمعلومات مش عارفة مدى التزامي بقيت أسمع الأذان ومبهتمش مبدعيش مبقتش أدعي بقيت لما أشوف بوست دعاء بهرب منه أرفعه لفوق مبقاش عندي أمل في أي حاجة كل حاجة راحت فعلا وربنا سايبني أغرق كده تعبت صبر ومحاولة ومعافرة 4 سنوات عمر من عمري مبقيتش أحس بمتعة حاسة نفسي تايهة ميتة..
تركت النت تماما وشغلي عليه مبقيتش قادرة أخرج أتكلم أو أعمل أي حاجة قطعت علاقتي مع أصحابي لأن أغلبهم مستقرين بحياتهم تخرجوا وارتبطوا وأنا الوحيدة اللي ضايعة مبقتش أرد على الهاتف أنا حرفيا مبعملش حاجة غير آكل وأنام وبس...
لما يبقى جواك مليون حلم ومليون فكرة ولو عملت فيهم هتكون إنسان جميل بيفيد ويستفيد بس الحياة أو القدر أو النصيب أو ربنا أو مش عارفة مين مش عاوز...
مهو مين؟؟ مين اللي مسؤول عن حياتي؟ أنا؟؟ ولا مين؟؟ طب أعمل إيه عشان أضبطها؟؟ طب ربنا فين؟؟ ليه مش بيساعدني؟؟ أوكي أنا.. اخترت وقفلت طب أعمل إيه؟ فيه حل؟ فيه حاجة لازم أعملها عشان تتصلح كل حاجة؟؟ طب لو مفيش أنا أعمل إيه أفضل كدة؟؟؟؟؟؟؟؟؟؟؟ أعمل إيه؟؟
أصبر.. لحد متى! أرجع.. مستحيل! أنتحر.. بفكر!
أمزح بشأن الانتحار أخاف أن أكتب "ربنا كبير" ولا حتى أفكر فيها لأني بدأت أظن أنها لا تعمل معي..
1/9/2019
رد المستشار
الأخت الفاضلة "Wely" أهلا وسهلا بك على مجانين وشكرا على ثقتك، واختيارك خدمة استشارات مجانين بالموقع.
يبدو جمال روحك وتميز شخصيتك واضحا بين سطورك يا "Wely" ومن يمتلك هكذا ميزات لابد يسعد حتى ولو عطل الاكتئاب سعادته... فضلا عن الظروف والأحداث غير المواتية التي طرأت على حياتك وحياة أسرتك هناك اكتئاب جسيم تسلل من حولك وانتزع البهجة والنكهة من حياتك بل ويكاد ينتزع إيمانك.
اكتئابك ليس شديدا بل هو بين الخفيف والمتوسط الشدة وتحتاجين بلا شك إلى العلاج المعرفي للاكتئاب ولا أدري إن كان متاحا بالعربية في البلد الذي تعيشين فيه أم لا؟ لكن قراءة المقالات الـ 17 ومحاولة تطبيق ما جاء فيها من المؤكد أنها ستفيدك... وأنا أعرف أنك شخصيا من النوع الذكي اللماح الذي يستطيع الاستفادة من مصادر العلاج الذاتي كتلك المقالات.
العلاج السلوكي المعرفي هو الخيار الأول للتعامل مع مثل حالتك لكن في غيابه تمكن الاستعانة بعقاقير علاج الاكتئاب التي يمكن لأي طبيب نفساني يعاين حالتك ويسمع شكواك أن يصف لك أحدها.
يجب كذلك أن تبدئي في إدخال التريض إلى جدول حياتك اليومي على الأقل 20 دقيقة يوميا بشكل منتظم ولك أن تختاري أي نوع من أنواع الرياضة فضلا عن أهمية الغذاء الصحي.
ننتظر متابعتك يا "Wely" ومرة أخرى أهلا وسهلا بك دائما على موقع مجانين فتابعينا بالتطورات الطيبة.
ويتبع >>>>>: زحمة حياة ولمسة اكتئاب م
تعليقات الأعضاء