اكتئاب مضاعف
بقالي سننين عايش في دوامة من الاكتئاب .. أغلب الوقت اكتئاب متوسط وأحيانا بيقلب اكتئاب شديد بس في كل الأحوال أو في أفضلها يعني الاكتئاب موجود بنسبة 50% على الأقل .. 24 ساعة في اليوم 7 أيام في الأسبوع .. بقالي 20 سنة تقريبا لدرجة أـني مبقتش فاكر آخر مرة كنت مبسوط إمتى ؟؟ أو آخر مرة كنت عايش حتى إمتى؟؟ حاسس إني مت من زمن طويل مش فاكر امتى بالظبط او ايه الي حصل خلاني كدا ...؟؟
المهم دلوقتي إني على طول حاسس بانعدام للقيمة وقلة الثقة بالنفس وتفكيري على طول سلبي مش شايف أي نور أو أمل .. طول الوقت معنديش طاقة أعمل أي حاجة لا طاقة نفسية ولا جسدية .. مبقتش أحب أشوف حد أو أقعد مع حد وطول عمري عندي المشكلة دي بس تفاقمت أوي الفترة الأخيرة .. مبكلمش حد في البيت تقريبا على طول بحب أقعد في أوضتي لوحدي مع اللابتوب والنت .. جربت أشتغل كام مرة بس مبكملش .. بزهق بسرعة وبكره أغلب الناس التي أتعامل معها ..
أكتر حاجة بتقتلني الإحساس الرهيب بالفراغ الداخلي وانعدام الحماس إني أعمل أي حاجة حتى لو تافهة وأني معنديش أي هدف ...
جربت كل حاجة تقريبا ...
جربت أستمر مع أكتر من 10 دكاتره محتلفين في أحسن أحسن حالاتي الاكتئاب بيكون 50%
جربت تقريبا كل الأدوية والكومباينيشنز التي ممكن تتخيلها
جرت كل أنواع المخدرات من أول الحشيش لحد الهورين .. كانت بتساعد بس فقدت قدرتها على إضافة أي إحساس كويس من زمان ودلوقتي مبطل كل حاجة
جربت CBT بس دايما مبستمرش بحس أنه مالوش فايدة وبيقولو كلام سخيف وأغلبه احكي وأنا ذاكرتي مشوشة أصلا ومبعرفش ومبحبش أحكي
جربت الدين وجربت سب الدين مفيش نتيجة
جربت ECT برضه مفيش نتيجة .. ذاكرتي بتتشوش أكثر بس
جربت حتى أدور في حاجات عضوية ممكن تسبب المشكلة دي زي خمول الغدة الدرقية مثلا .. أو نقص فيتامين د .. موصلتش لحاجة
جربت الارتباط بس اكتشفت أنه بيحسن فترة قليلة جدا وبرجع تاني مش قادر أكمل .... بآخد دلوقتي بروزاك. هاي دوز وريميرون علشان أنام، الشهية زي الزفت والنوم زي الزفت وفي توتر أغلب الوقت من غير سبب.... ومليش نفس أعمل أي حاااااااجة
عمال ألف في دوامة بقالي سنين مش لاقي مخرج لدرجة أني مبقتش عارف هو الاكتئاب جاي لي لأني مبشتغلش وفاشل ولا أنا مبشتغلش وفاشل بسبب الاكتئاب ..
دلوقتي اكتئاب مضاعف بس أنا عارف أنه فترة وبيتحسن وبتبقى الـ Dethymia المزمنة .. هل لها حل !؟ ولا هفضل طول عمري كدا !؟
إيه أكثر دواء أثبت فعالية مع الـ Dethymia أو أكتر طريقة أثبتت فعالية في العلاج ؟
ولا هي بتتعالج أصلا ولا لا ؟
11/10/2019
رد المستشار
شكراً على استعمالك الموقع.
استشارتك عنوانها اكتئاب مضاعف ومحتواها يشير إلى رحلة طويلة مع أعراض اكتئابية لمدة ٢٠ عاما وذلك يعني بأن بداية هذه الأعراض كانت في عمر ١٢ عاما أو أكثر بقائك على ٥٠٪ لا يعني شيئاً لأن حتى الغير مصاب بالاكتئاب يشعر ببعض التحسن مع استعمال العقاقير المضادة للاكتئاب.
بياناتك الشخصية غير واضحة سوى أنك صفر المهنة والديانة. الاستشارة أيضاً مشحونة بالغضب وتعاني من توتر طوال الوقت.
الصراحة واجبة في مثل هذه الحالة وما تتحدث عنه في الاستشارة أقرب إلى اضطراب شخصية بدأ في النصف الأول من سنوات المراهقة. مسار اضطراب الاكتئاب غير هذا المسار وفي الغالبية العظمى يتحسن تلقائيا لفترة قد تقصر أو تطول، ولذلك فإن الكثير من المصابين به لا يصلون مراكز الطب النفسي.
أما الاكتئاب الطفيف المزمن أو الأصح الاكتئاب الجزئي dysthymia فمساره غير ذلك والغالبية العظمى من المرضى يعمل ويتفاعل مع الآخرين.
علاجك لا يتم عبر عيادات الطب النفسي وإنما بتقييم احتياجاتك المختلفة ومحاولة تلبيتها. لا تبحث عن عقار سحري فهذا لا وجود له. الأهم من كل ذلك هو اندفاعك وتصميمك على تغيير نمط حياتك والبحث عن عمل وأن تعيش كما يعيش كل إنسان دخل العقد الرابع من العمر.
وفقك الله.