عجز انتباه ووساوس عاطفية : اضطراب الشخصية م1

اجترارات وسواسية واضطراب عجز الانتباه م
خطة علاجية للوساوس العاطفية

السلام عليكم، أولا نشكركم على المجهود الرائع في الموقع الجميل ده. ثانيا أنا هوصف اللي بيحصلي مع اقتناعي التام أن ده أمر مش طبيعي وأن لازم علاج بس موضوع الطبيب النفسي صعب حاليا

المشكلة ببساطة إني بتعلق تعلق مرضي بشخص كل فترة، بدأت من سن المراهقة واستمرت لحد الآن، يبدأ الموضوع أني بنجذب انجذاب عاطفي ملوش تفسير لأشخاص معينة أصغر مني بعشر سنين مثلا

طبعا مفيش اشتهاء جنسي، يعني بشتهي النساء عادي .. وبشمئز جدا من الشذوذ الجنسي بكره اللي كدا أصلا لكن فيه انجذاب عاطفي شبه جنسي مع الناس اللي بتعلق بيهم مثلا عايز أحضنه .. أمشي معاه كتير .. ممكن تقبيل بشهوة .. الغريب أن الانجذاب ده أنا مش مقتنع به عقلا ومش عارف سببه ؟؟ يعني أشوف شاب أصغر مني بـ ١٥ سنة فيحصل لي اضطراب في الصدر وأحس أني بموت فيه من أول مرة أشوفه فيها.؟؟ ده هبل !! طبعا بيبقى لهم جاذبية زي الوسامة مثلا أو الشخصية وأحيانا مفيش سبب !!

علاقتي بأهلي كويسة وشخصية اجتماعية الحمد لله ومتفوق بفضل الله، مش متجوز وحاليا صعب ومش شايف أن ده علاج نهائي لأن فيه كثير من اللي قرأت عنهم اتجوزا أو متجوزين والمشكلة مستمرة.

حد قال لي أن ده وسواس تعلق مثلي وحب، طب وبعدين ؟ العلاج إيه ؟ علاج سلوكي .... أنا الحمد لله بقاوم ومش بساير الوساوس دي بفضل الله وبسبب أني مريت بتجارب كتير ففهمت.

بقيت لما لاقي انجذاب مش بتعرف على الشخص ده لأن بعدها هيبقى فيه مجنون ليلى، مع العلم أن أثناء فترة التعلق بيبقى فيه معاناة ونوع من المراقبة والسعي خلف المتعلق به بتعبير تاني غيرة وحب غير طبيعية .... واتصالات واكتئاب ودعاء وتضرع وبرضو سعادة قوية لما العلاقة تبقى تمام.

عايزين نخرج برا موضوع السبب ونبدأ في العلاج ؟ فيه علاج دوائي لإنهاء الوساوس دي ؟؟ طبعا مع العلاج السلوكي وأنا أكيد بعمل كدا ومش بكلم الشخص ده وبدعي ربنا وناوي أتجوز قريب ... لكن أكيد فيه شيء مساعد لكيمياء الجسم ..

يا ليت بلاش موضوع روح لطبيب يتابع لأني أكيد جربت وده السبب اللي خلاني أكتب هنا.
وجزاكم الله خيرا
12/12/2019