في دوامة القلق: متعممٌ أم نُوَبي؟

خوف ورعب وقلق وتوتر وشك وحاسس بنار جوايا

السلام عليكم ورحمة الله وبركاته
الأستاذ الدكتور وائل أبو هندي أرجو من حضرتك إنك تهتم برسالتي دي قوي لأسباب هي أنى بأعاني من 3 شهور مابين أن إللى عندي ده مرض نفسي ولا غير كدا مثلا مس أو أي حاجة ثانية.

المهم مشكلتي هي أنى مش عارف أنا بغير بصعوبة شديدة جدا ومش قادر أصلى وبتعب جدا في مواعيد الصلاة وزهقان جدا وبحس أن الدقيقة بتعدي في ستين سنة
وكمان مش مستحمل أمي ولا أختي خالص وعلى فكرة أنا الوحيد وأختي متزوجة
وكمان هي في رمضان زعلت منى بسبب أنى مش مستحملها ولا مستحمل أولادها
وكمان حاسس بنار جوايا مش قادر أستحملها وحاسس أن نصفى الشمال منقسم عن نصفى اليمين
وكمان مش حاسس بنفسي وحاسس أنى عايش في حلم ومستغرب كل حاجة حتى مستغرب نفسي
وكمان مش بقدر أسمع قرآن ولا أغاني ولا أي كلام عن الآخرة ولا عذاب الآخرة بالذات

والله العظيم أنا تعبان قوى ونفسي أرجع زى الأول: أصلى أرتاح مش أتعب وأقرأ قرآن عادى مش أبعد عنه كدا
وكمان ولا بلاش أنا زهقت من كتر ما اشتكيت المهم أنا بيئتي كان فيها حاجات ممكن تفيدك في حل مشكلتي إنشاء الله أولها أنا دائما عايش لوحدى وكنت مستمتع بكده بس
وأنا إيميلى................ يا ريت تبعتوا ليا الرد عليه

دلوقتي أمي ووالدي منفصلين بس هو دلوقتى متوفى ربنا يرحمه، ووالدتي طول عمرها مريضة ربنا يشفيها وأنا تربيت معاها وليا أخت واحدة من أمي وأنا كمان حصلت ليا 3 صدمات عاطفية ورا بعض وآخر مرة من 3 شهور كنت راجع من محل الملابس فلاقيت اللي أنا بحبها راجعة مع أختها فشكيت فيها إنها ممكن تكون مع واحد تانى غيري فرحت وقلت أصلي وأقرأ شوية قرآن...

وبعدين وأنا بقرأ المصحف لقيت نفسي بأبكي... مش عارف خشوع من القرآن ولا منها، ولا من إيه مش عارف!، المهم قلت أنام فلقيت نفسي مخنوق وحاسس أنى هأموت وبعدها لبست ونزلت أجرى وبعدين طلعت البيت وفضلت على كدا فترة

وسبت شغلي بسبب الرعب اللي كنت فيه وكنت مش مستحمل كلام أختي ولا أي حد وبعدين قلت ليهم على إللى فيَّ فقالوا أنت محسود أو عندك مس فرحت لشيخ في جامع وبعدين شفت الناس اللي عندهم لبس أو مس فكنت قاعد مرعوب بس مش حصل لي حاجة، وبعدين رحت لشيخ تانى فإدانى مية أستحمى بيها وأشرب منها فكنت دائما كل ما أسمع اسم أي حد أشتمه من غير سبب مهما كان الشيخ أو الحاجة اللي بسمع اسمها ويا رب تكون فهمت قصدي

المهم أنا خايف أتجنن وكمان خايف أحسن بقيت أشك في حاجات كتير ويا رب ربنا يسامحني على الشك ده فرحت لدكتور في الجامعة.. فأعطاني فلوكستين وابوكستين تقريبا مش فاكر وزاناكس وبقالي 15 يوم بس أنا حصلي تعب أكتر مش خفيت أنا تعبت أكتر يا رب يا دكتور وائل أنا شايف الدنيا سوداء في وشى ومش عارف أنا اللي عندي إيه ومش عارف أعمل إيه نفسي أرجع أصلى زي الأول نفسي النار اللي أنا حاسس بيها جوايا دي تنطفى نفسي أبكى بس مش قادر

باختصار نفسي أرجع للدنيا تانى إنسان طبيعي فيا رب لو حضرتك عرفت أنا عندي إيه تقولي ده مرض نفسي ولا غير كدا ونسبة الشفاء بإذن الله كام وربنا يوفقك يا رب ويجعلك سبب لي عشان أخف يا رب يا رب لأني والله العظيم تعبان قوي ومش قادر استحمل _
23/10/2004