حب الجامعة البريئ والله زمان!! م1

حب الجامعة البريئ والله زمان!! م
اضطرابات وجدانية واكتئاب مضاعف
 
- أنا نوجي، ٢١ سنة من القاهرة حقيقي حياتي مخيفة ومملة وبائسة أووووي، عايشة بس مش حاسة بأي حاجة أبداُ، بعيط أووي علشان أحس إن لسه عندي دم وبتأثر بس مبفرحش أبداً.
- أنا طالبة بكلية تجارة بس بكدب كتيييير، عارفة إني بكدب، عارفة إني بخدع اللي حواليا وأولهم أهلي بس معرفش ليه؟! مش بكدب كدب يأذي يعني بكدب إني نجحت بتقدير عالي وممكن أكون جايبة تقدير قليل، بكدب إني ليّا صحاب وفي ناس بتحبني وممكن أكون لوحدي، مبكدبش كدب يأذي اللي حواليا بس يأذيني أنا وفي الأول والآخر كدب.
- من زمان خسرت حب حياتي بسبب الكدب، خونته بس والله ماحبيت غيره بس أنا من زمان مبعرفش أقعد لوحدي، بحتاج حد يهتم بيّا وأهتم بحد مش لازم أحبه أبداً بس بخاف وبترعب أكون لوحدي ليه مش عارفة؟! والله مش عارفة بس كإني خايفة من حاجة أو حد مع إن أهلي بيحبوني وبيثقو فيّا أوي وأنا والله بقف راجل في ضهرهم.
- أنا طالبة، اه بس بنزل الكلية يومين بس ف الأسبوع وأوقات مبنزلش، حياتي فارغة تماماً.
- بابا مات من ٤ شهور، حسيت إن دي كانت نهايتي، بنزل أروح أقعد معاه وأرجع البيت أقول كنت ف الجامعة، بكدب حتي في دا، أوقات أصلي وأقولهم أنا مبقربش من ربنا.
 - مخنوقة من نفسي وبكرهني أوووي بضحك علي ناس بتحبني وروحها فيّا وأنا والله ماحبيت حد فيهم بس بحتاج اهتمامهم بيا، ليه معرفش؟! بس بحب الاهتمام أوي، يمكن بدور علي قصة الحب اللي كانت بين أبويا وأمي اللي اختفت فجأة لما أمي انفصلت عن بابا وكل واحد فيهم اتجوز، ويمكن علشان حاسة إن حياتي بتتعاد بالظبط، كل حاجه بتتعاد في حياتي، بحب وأتساب، بتحب وأسيب، معرفش بنتقم لنفسي ولا بعاقب نفسي إني أسيب اللي يقدرني.
- أنا فعلا تعبانة وبشوف أحلام إن حد بيعتدي عليّا وبصحى ألاقيني بعمل في نفسي حاجات غريبة، أنا عمري ماكنت كدا، أوقات بحس إني هنام مش هصحي تاني وبتشاهد قبل ما أنام، وأوقات بتمني أموت بس بخاف أووي أموت فعلا.
- كنت بتعالج من اكتئاب حاد من ٣ سنين بس مكملتش مع الدكتورة لأني حسيت إن الدكتورة تعاطفت معايا ونسيت إني حالة وبقت تفكر معايا بعواطف مش إنها دكتورة، وأنا حالياً بكره الدكاترة والممرضبن جداااا وبكره مهندسين الكمبيوتر جداً وبكرهني أنا لأني وثقت في الاتنين الفترة اللي اتعالجت فيها وبدأت أخد مهدئ ينيمني مش فاكرة اسمه بس لسه عندي أوقات باخد منه بس حسيت إني بهرب مش أكتر.
- بدأت أفوق لنفسي وبقيت ناجحة وبشتغل وبعدت عن كل الرجال تماماً وعشت لدراستي وحياتي وأهلي قبل أي حد بس من وقت ما أبويا تُوفي ولجأت للإنسان اللي حبيته وموقفش جنبي وأهانني وداس عليّا بالجزمة، اتغيرت للأسوء وبقيت تاني أكدب وأعرف ناس بس علشان يهتمو بيّا لكن بكره أخرج مع حد أو أكلم حد في الموبايل مجرد بس كلام شات علشان محدش يعرف إن كل اللي بقوله مش من قلبي.
- عايزة أعيش طبيعية ومش عارفة، عايزة أرتاح من التفكير اللي هيقتلني، عايزة محبش حد وأعيش لحالي بس، عايزة مضحكش علي حد علشان عارفة وجع الكسرة كويس، عايزة مخليش حد يهتم بيّا تاني وأتعود أكون لوحدي عادي. أعمل إيه أرجوكو حد يساعدني.
 
- ابن عمي اتقدملي من فترة بعد وفاة بابا بكام شهر، قولت إنه عايزني علشان صعبت عليه إني بقيت يتيمة وبدأت أتكلم معاه علشان أفهم تفكيره، قالي إني عاجباه في كل حاجة وإني مناسبة جدا للمقاييس بتاعته، حسيت إني بتشد ليه لكن هو لا حساه بيحبني ولا حاسة بأي حاجة غير إن أنا اللي مشدودة ليه وهو مستعجل جداً على الجواز لأنه ٢٩ سنة وشايف إنه كبر جداً، بس أنا فكرة الجواز راعباني أوي إني هكون مع حد وملك حد، حسبت بمصيبة أكبر، حسيت إني رافضة الجواز علشان هتمنع إن حد تاني يهتم بيّا وهكون ملزمة إن جوزي بس اللي يكون عارف عنّي كل حاجة.
 
أعمل إيه؟؟
أرجوكم ساعدوني.
28/2/2020