أنعزال... ليه؟؟؟
السلام عليكم ورحمة الله وبركاته: أشكركم جميعا علي هذا الموقع الجميل والمفيد... فعلا...
السلام عليكم تاني يا دكتور...(أيا كان حضرتك دكتور مين)
أنا عايز أقول لحضرتك بس.. إني حاسس بــ (الخيبة) الفظيعة.. حاسس إني ضيعت حاجات كتير أوي من أيدي... وللأسف.. أنا اللي ضيعتها بنفسي،أنا بقيت لوحدي تماما.. أنا بعدت عن كل الناس (وبما فيهم أعز أصدقائي اللي كنت بحبهم وكانوا بيحبونني) بالعكس دة هما دول الأساس هما دول اللي بعدي عنهم خلاني أبعد عن بقيت الناس الثانية كلها.. بعدي عنهم خلاني اقعد في البيت طول الوقت لعدم رغبتي في إني أقابلهم أو أبعت لهم رسالة أو أكلمهم أو أي حاجة.. مش عايز أتكلم معاهم نهائي وخلاص.. ولا عايزاهم يكلموني ولو حصل واتفقت معاهم علي معاد أو أي حاجة بضطر أبعت لهم رسالة إني مش هأقدر آجي وفي ظروف أو كده.. يعني بهرب من الموقف كله وخلاص بأي حجه!!..
أنا عايز أقول لحضرتك إني ما كنتش كده نهائي.. ويمكن ده هو اللي خلاني أبعد.. يعني أقصد أني كنت حاجة ثانية خالص.. كنت فعلا مثال للشخص الناجح جدا واللي كل الناس اللي يعرفوه بيحبوه أوى بلا استثناء - بما فيهم أصحابه طبعا - كل الناس كانوا بيقولوا عليا إني إنسان جميل جدا.. وبالذات أصحابي كانوا دايما بيقولوا لي أني فعلا إنسان مزاياه أكتر بكتير من عيوبه..
أنا علي فكرة بفرح لما بأتذكر الكلام ده وافتكر كلامهم عني بيديني إحساس علي الأقل إني كنت إنسان كويس..
بس أنا ليه بقول لحضرتك كل الكلام ده عني؟؟.. علشان حضرتك تتخيل الوضع اللي أنا كنت فيه بين أصحابي.. لكن بعد ما دخلت الجامعة.. حسيت إن الوضع اتغير.. أيوة كل واحد فينا دخل كلية شكل بس برده كنا لسة بنتقابل عادي لأننا في جامعة واحدة وبنقعد كلنا مع بعض في حتة واحدة، يعني مش دي المشكلة خالص.. المشكلة إن أنا حسيت أني معدتش زي زمان، من أول يوم في الجامعة وأنا حاسس إني متغير وفي حاجة مش مظبوطة ودايما كنت ببقي سرحان ومش معاهم خالص في اللي هما بيقولوه.. معرفش ببقي سرحان في إيه.. ببقي عايز اسرح كدة وخلاص... وطبعا أصحابي شغالين علي طول كل أما يشوفوني يقولوا لي.. (ما لك ؟؟ في إيه؟؟ في حاجة مزعلاك؟؟؟) وأنا أرد وأقول (معرفش !! ) كله اجتمع على أتغيرت ولم أعد أمرح ولا بضحك زي زمان... بقيت كل أما امشي معاهم او عيني تيجي في عين أي حد أحس أن هو بيقول عليا حاجه.. اني متغير او اني بقيت غريب.. أو أي كلام من الكلام ده يعني..
دماغي ابتدت تفكر في كلام كتير أوي ابتديت اكلم نفسي بجد من كتر التفكير.. مكنتش قادر أتحمل اكتر من كده.. بقيت كل إما اخرج أحس أني عايز أرجع البيت تاني في أسرع وقت.. اول فرصة جاتلي اني ابعد عن اصحابي بعدت... ومن ساعتها وأنا قاعد في البيت وباتحجج بأي حجة عشان ما اخرجش معاهم تاني.. و هما كمان تقريبا زهقوا مني ومعادوش بيسالوا عليا ولا بيسالوا انا ليه مبخرجش معاهم لأني ببساطة مبقدرش أقول لهم الكلام اللي أنا قلته لحضرتك ده يا دكتور.. فبقولهم أي حاجة تانية أو ما بقولهمش حاجة خالص..
أرجوك يا دكتور تساعدني.. علما بأن أنا كنت شاطر أوي وجايب فوق ال 99% في ثانوية عامة بس الموضوع ده مأثر عليا جامد ومش عارف أركز في المذاكرة كويس.. علما كمان باني كان عندي طموحات كبيرة اوي وكنت عايز ابقي طالب شاطر أوي في الجامعة بس الحكاية دى مخلياني افقد الثقة في نفسي وفي كل قدراتي. وانعزالي عن الناس كمان بيفقدني مهارة التعامل معاهم و بيزود خوفي منهم يوم بعد يوم!!!!
أرجوك يا دكتور تساعدني لأني فعلا بفقد نفسي .. وخايف يجيلي اكتئاب ده إذا مكنش جالي فعلا.. لأني حاسس اني فعلا بقيت مكتئب.... يعني أنا عايز حل للانعزال و حل للاكتئاب ساعات بحس اني مبسوط أوي (طول ما أنا في البيت طبعا) و ساعات بحس اني مضايق و عايز أموت نفسي.. هل ده جنون.. و هل ممكن للعزلة و كتر التفكير ان تسبب الجنون فعلا؟ و ازاي الواحد يعرف انه بقي مجنون يعني هل المجنون لا يعرف انه مجنون.. ولا ايه؟؟... انا حاسس اني بفكر كتير و مش عارف اعمل ايه؟؟ بس سواء انا مبسوط أو مضايق عمري ما بنسي اني في مشكلة حتي و انا بعمل أي حاجة ما ببقاش مركز في الحاجة دي خالص.. و حاسس إن عمر دماغي ما هتروق الا لما احل المشكلة مش أنساها..!!
أرجوك يا دكتور تقولي اعمل ايه وبلاش تقولي (اتجه لأقرب طبيب نفسي) لأني مش هعمل كده و إذا حضرتك قولتلي كده يبقى اعرف اني هفضل زي ما أنا..
أنا عايز أعالج نفسي بنفسي.. يا ريت تقوللي..
هل الحل إن اغصب نفسي علي الخروج معاهم (اللي هما أصحابي يعني) و خلاص.. و اللي يحصل يحصل؟؟؟
ولا اعمل ايه...؟؟؟؟ أنا عارف اني طولت علي حضرتك بس صدقني..
أنا فعلا استريحت لأني أخيرا لقيت حد افضفضله و أتكلم معاه ويسمعني للآخر..
يعني هبقي مبسوط حتي لو ما رديتشي عليا..بس يا ريت بجد ترد عليا بسرعة...
شكرااااااااااااااااااااااااااااااااااااااا
25/02/2005
رد المستشار
بسم الله الرحمن الرحيم
مرحباً
تقول أنك لم تكن بهذا الشكل، إذن فلماذا أصبحت هكذا!!
هل مثلا كنت تنسحب عن أصدقائك بغرض الاستذكار أم مثلا كنت غاضبا من شيء ما..... لم تذكر لنا السبب
وإن كنت أرجح أن سبب ابتعادك عنهم كان الاستذكار
عزيزي لا زلت صغير السن لكي تتحدث بهذه اللهجة المحطمة وهذه النفسية المنكسرة، لازالت أمامك الحياة فلم تضيعها في البكاء على "لقد كنت" وأنت مازال بيدك أن تكون ؟؟
لا تعجبني هذه اللغة الاكتئابية التي تكتب لنا بها والندم على ما فات إذا كنت تريد الخروج من الهوة الاكتئابية التي تتداعى فيها عليك أن تخرج نفسك من هذه الحالة فلماذا لا ترجع لأصدقائك أو تحاول أن تتعرف على أصدقاء جدد لماذا لا تشترك في نشاطات الجامعة العديدة كالجماعات الفنية أو الرياضية أو الأدبية أو تشترك معهم في رحلات فكل هذا سوف يحسن من نفسيتك ويجعلك تتعرف على أصدقاء جدد
مساعدة نفسك بيدك طالما لا ترغب في الذهاب للطبيب النفسي حتى يقف على حالتك الوقوف الصحيح وأطمئنك أن علاج الاكتئاب سهل وبسيط والأفضل لو عرضت نفسك عليه
وفى حالتك فأنت إن وجد لديك الاكتئاب -لأننا بالطبع لا نستطيع التشخيص من بعض أسطر- نقول أنه إن وجد فهو بسيط إن شاء الله
هل فكرت أن تغير من نمط حياتك؟ أتدرى كيف؟ سأحاول أن أجيبك كيف
لماذا مثلا لا تغير من نظام غرفتك وتضيف عليها بعض اللوحات المبهجة
أو تخرج لشراء بعض الملابس الجديدة
أو تمارس رياضة كان تبدأ يومك بممارسة بعض التمارين الرياضية كالجري
لماذا لا تذهب في نزهة لحقل أو لحديقة أو لشاطئ وتمتع عينك بجمال خلق الله عز وجل
هل فكرت بدلا من أن تحدث نفسك أن تحضر ورقة وقلما وتزيح كل هذه الأفكار التي تملأ رأسك عليها
أو تعبر على الورق عن رسومات كما تحب
إذا ما اتبعت ما سبق سوف تشعر بتحسن إن شاء الله ولا تنسى أن قلوبنا بين يدي الرحمن فأكثر من الدعاء له واصقل من صلتك عن طريق الصلاة وقراءة القرآن
فإن الله لا يغير ما بقوم حتى يغيروا ما بأنفسهم، فغير من نفسك للأفضل حتى تصبح أفضل إن شاء الله وطالع الروابط الآتية ففيها ما يفيدك إن شاء الله:
عسر المزاج ، والاكتئاب
الاكتئاب الدائم أم عسر المزاج ؟
الاكتئاب والتركيز أم عدم الثقة بالنفس أيهم أولاً ؟
علاج الاكتئاب المعرفي : فتح الكلام
مللٌ وصراخ واكتئاب: ولا تقولوا كذا !
مع أطيب الدعاء لك بالشفاء والهداية
ويتبع >>>>>>>: ساعة الصفر: إنت حر م.مستشار