|
| 
|
غواية الانتقام : النار تحرق حاملها
آسف.. بس محتاج لكم جدا
أنا آسف جدا أنا ببعت الرسالة في مكان غلط بس محتاج لكم ضروري جدا يا ريت تتعاملوا مع مشكلتي بجديه شوية ومتهملوهاش : أنا شاب لسه بدرس.. من حوالي سنة ونص اتعرفت على بنت من نفس سني تقريبا وأنا اللي طلبت أتعرف عليها وأنا اللي عرضت عليها الحب..
بعد ما اتعرفنا بشهرين قالت لي بحـــبـــــك أكيد زي كل الشباب "سوري" الهايف فرحت بالكلمة جدا من غير أي تفكير كنت ناسي نفسي خالص معاها.. بعد ما كلمتها بدأ يوصل لي كلام عنها أن هي سمعتها مش كويسة وأن ليها علاقات مش كويسة كتير..
المهم أنا كنت بكذب كل دا وأصدق الملاك البريء بتاعي.. بعديها بكام يوم أخذني الشك والفضول أني أفتح إيميلها.. فتحته وشفت كل اللي كان بيتقال لي وزيادة كمان.. رسايل لصبيان وصور كمان وكلام حب وهيام وكمان مع أصحابي..
أقسم بالله أنا جتلي رعشة مش هانساها أبدا.. عينيا دمعت.. ولكن.. وما عرفش إزاي حصل.. لما كلمتها مقدرتش أقول لها عللي جوايا حكيت لها عللي حصل وهيا كالعادة نزلت دموع التماسيح بتاعتها وأنا صدقت وسامحتها وأخذت منها وعد متخبيش عني أي حاجة تأني.. بعد حوالي 6 شهور من الاستقرار نوعا ما بس مابنكرش أن احترامي ليها قل كتير وقلبي مش صافي منها..
عرفت إن بعد ما أخذت الوعد إياه أنها كانت اتصلت بواحد من أصحابي اللي كانت بتحبهم قبلي واطمنت عليه في امتحاناته وافتكرته في عيد ميلاده وكله تمام.. المره دي بقه مسكتش.. رحت شتمتها "أيوة شتمتها" وهزأهتها أدام أصحابها.. علاقتها مع أصحابها البنات والصبيان أنا دمرتها.. رحت قابلت أهلها وعرفتهم كل حاجة.. خليت سيرتها في كل لسان.. خليت ثقتها في نفسها صفر.. سقطت سنة في الدراسة بسببي.. بيوصلي أنها منهارة طول الوقت.. ورجعت لأصحابي الصبيان اللي طبعا كنت متخانق معاهم علشانها..
بعد كل دا كانت بتحاول ترجعلي بمليون طريقة وفي كل مرة أنا بعايرها بماضيها.. كنت بحب أذلها وأشوف دموعها وأعملها مشاكل.. كل أما أعرف أنها كانت بتكلم حد قبلي أروح وأقعد أحكي له على كل حاجه.عرفت عنها مصايب تودي في داهية.. معايا ليها صور وجوابات وحاجات ممكن أضرها جامد بيها.. دا غير إني عارف ماضيها حرف حرف..
أنا عملت فيها حاجات كتير جدا بس لسه جوايا نار عايز أطفيها.. أنا عمر ما حد ضحك علي ولا أنا شخصية سطحية يتلعب بيها.. لكن ساعات بفتكر أد إيه دا حرام.. بس ما بيدومش الإحساس دا كتيير الإخلاص.. نفسي أنتقم أكتر وأكتر وخايف من ربنا... أعمل إيه أنا بمتحن دلوقت وتركيزي مش كامل؟؟
1/6/2005
رد المستشار
إذا كانت هي أخطأت مرة، ولا أدري ما هو حجم خطئها في رأيك؟!!
تقول أنها ضحكت عليك؟!! طيب.. هل كان بينكما أي ارتباط أو أي التزام رسمي حتى يتطلب وفاءا وإخلاصا من طرفها؟!!
ثم لما اكتشفت أنت أنها متعددة العلاقات بالتجسس على صندوق بريدها، -وهو ليس من حقك ذهبت تواجهها فتنهار هي وتبكي وتعترف وتطلب السماح، بأي حق فعلت أنت هذا كله، وبأي منطق، وعلى أي أساس بنيت أنها صادقة أو ينبغي أن تكون مخلصة لك وحدك؟!!
هل مجرد أنك تعرفها وتقول أنك تحبها، وهل مجرد أنها أيضا قالت لك أحبك يبقى لك عليها حقوق، وهي ملتزمة ناحيتك بشيء؟!!
ثم لما اكتشفت خيانتها لهذا الالتزام الصوري بدون علاقة رسمية، لما عرفت أنها تقول لك ما تقوله لغيرك لأنكم جميعا سواء، يعني تقولون بالحب دون أي ارتباط أو التزام، لما اكتشفت أنها كسرت قواعد اللعبة كما تصورتها أنت ذهبت تحطم كل شيء بهذه الشراسة، بأي حق وبأي منطق؟؟
يا سيد أعود إلى أول سطر كتبته لك إذا كانت هي أخطأت في عدم صدقها معك، وعدم احترامها لقواعد اللعبة لأنه ليس هناك شيء أو رابط بينكما بجد، فكم مرة أخطأت أنت ليس في حقها، أو في حق ربنا، ولكن كمان في حق نفسك.
طايح تضرب يمين وشمال؟!! لا شجاع يا ولد.. برافو عليك، "دكر"، وعايش في دور المنتقم الجبار، أهمس في أذنك أن كل ما تفعله هذا ليس من حقك، وأن من يتتبع عورة غيره يفضحه الله ولو في عقر داره، فما بالك بمن يفضحها ويذيعها؟!! كف عن هذا يا بني، والتفت لدروسك، واتق الله في بنات الناس، وفي وقتك وطاقتك، فأنا أرى فيك ذكاءً وحماسة أشفق أن تتبدد في مثل الترهات، وتابعنا بأخبارك.
ويتبع>>>>>>>>>>>>>>>>>>>>>>>>>>>>>>>>>>> غواية الانتقام : النار تحرق حاملها مشاركة
تعليقات الأعضاء