|
| 
|
قمة وعقلانية مشاركة
السلام عليكم أختي في الله؛
لقد أحسست بمشكلتك جدا جدا ولامست قلبي لأني قريبة منك جدا في كثير من الأشياء، سأحاول التعليق على كلامك بترتيبه وعلى فكرة أنا مش كل كلامي هيكون علمي لكن كلام بنت لبنت وخلاص (^_^).
أولا بالنسبة لموضوع الشكل.. انتي لما بتتعاملي مع شخص كتير بتتعودي على شكله أيا كان ولو كان جميل بتنسي انه جميل اوي زي مانتي كنتي حاسة ولو وحش بردو بتنسي انه وحش مش هتاخدي بالك من شكله بالتعود، لكن يبقى أيه يبقى الكلام والتصرفات والتعاملات اللي هتوصل لعقلك ومن ثم قلبك ولو بنت جميلة وخلقها مش اوي يذهب الشكل بالتعود ويبقى الأثر السيئ لخلقها والعكس لو بنت مش جميلة لكن شخصيتها ممتازة يذهب الشكل ويبقى الأثر الجميل اللي بتتركه في نفوس الناس.
طبعا واضح أن الكلام منطقي ومقنع لكن بردو عشان أكون واقعية فلا يعي هذه الحقيقة إلا صاحب العقل (العقلاني) وتلاقيه فاهم فعلا هو بيعمل أيه وبيدور على مين في الشباب أو الفتيات أما الناس اللي (اي كلام) فطبعا هيضربوا بالكلام ده عرض الحائط ووقتها أحنا مش نادمانين عليهم أبدا لان هم أصلا بعقليتهم دي مش هيناسبونا، فعايزاكي يا أختي الجميلة خلقا وشخصية تنسي خااالص الحكاية دي لان مسيرك تلاقي الشخص العاقل اللي يفهم الكلام ده ويقدرك صح.
طبعا أنتي لما تقتنعي بكده فان شاء الله مش هتلاقي مشكلة النظر لزميلاتك دي والتعب النفسي اللي بيعود عليكي لما تلاقي واحدة منهم اتخطبت (وبعدين يا بنتي العبرة بالنهاية) مش مهم مين اتخطبت الأول المهم مين اللي هيسعد في الأخر وبردو كلام بيني وبينك، (أنا يمكن من الأربعة المخطوبين في دفعتي بحالها لكن والله مش سعيدة خالص وعلى وشك إنهاء الخطبة لأسباب عقلانية بردو بس ده موضوع تاني أصلا ) بس الفكرة يعني أن مش كل مخطوبة سعيدة ولاقيه الإشباع العاطفي اللي أنتي بتتكلمي عنه.
بالنسبة بقى للماسنجر فده هم تاني بصي يا بنتي ووالله كلام بنات لبنات الشات ده غير الواقع نهااااااااااائي واسألي مجرب، عارفة والله العظيم أنا متأكدة أن بنسبة 95% مثلا لو شفتي الشخص ده و ده على الواقع هتتصدمي (على فكرة ممكن تتقبلي نفس الشخصية في حياتك مش لازم زوج يعني بس تقبل عام لو كنتي شفتيها علطول على ارض الواقع بس عشان خاطر موضوع الشات ده مخصوص فانتي لازم هتنصدمي) وانتي حتى بصي لنفسك أو لأي إنسان مفيش إنسان بيروح يقول لواحد تاني على فكرة أنا بخيل يعني ده لو ماكنتش عارف فانا بعرفك مثلا، وهو طبعا لو ماقاللهوش أنا بخيل مش معناها انه بيغشه لكن أصلا مفيش إنسان غاوي يذم في نفسه من غير ما يتطلب الموقف، امتى يكون غش لما أجي امثل عليكي الكرم مثلا أو تسأليني على الصفة دي فيا وأنكرها.
يعني اللي اقصده أن أنا أو أنتي أو هو ولا هي لازم غصب عنها ماتظهرش بشخصيتها الحقيقية ومش معنى كده أنها بتمثل ولا بتخدع يعني، الظاهر غير الحقيقة ومايكشفش الحقيقة إلا التجربة ومعروف مثال سيدنا عمر لما جه واحد وقاله الراجل ده كويس فسيدنا عمر قاله أتعاملت معه بالدرهم والدينار قاله لا قاله يبقى ماتعرفهوش، دة كده لو بنتكلم على الشخصية بس، تعالي بقى لموضوع الشكل مين قالك ولا مين قاله انه برغم الشخصية الرائعة ليه أو ليكي انك ممكن تتقبليه بشكله ده مش عيب على فكرة لان دي نفس بشرية ممكن غيرك تتقبله جدا بقصره مثلا بس أنتي كارهة كدة اوي هو موضوع نسبي بردو ومالهوش علاقة على فكرة بدرجة الجمال هو رأي نسبي
وان كان موضوع الشكل ده موضوع هامشي أصلا.
وبعدين بلاش موضوع انك تجيبي الشخص ده لخطبتك بنفسك أفضل يعني لأنك بعد كده لو لقيتي عيوب فيه هتضطري تكتميها وتخبيها أحسن اهلك يشمتوا فيكي ولا يفقدوا الثقة أو حتى هتفضلي تتغاضي عنها عشان ما تطلعيش غلطانة قدام نفسك، ومش هيخليكي تعترفي بالعيوب دي أو بفشل الموضوع إلا الشديد الآوي زي مابيقولوا، ووقتها هتكوني استويتي خلاص وعلى فكرة حطي في دماغك أوي الله يخليكي موضوع الإشباع العاطفي ده لان والله هو السبب أصلا وكويس انك اخده بالك انه من ضمن مشاكلك، لكن في حاجة أنا بيتهيألي يعني انك مش عاملاله إسقاط كويس على الواقع.
من ضمن مشاكل شخصيتك دي (بدون افتاء يعني) إنها منعزلة في تفكيرها يعني دايما بتفكري مع نفسك وتقفلي عليكي باب اوضتك وتفضلي تفكري تفكري ومش بعيد تمسكي ورقة وقلم وأنتي بتفكري يعني،، لكن افتكري انك عمرك ماهتعرفي توصلي للإجابة والقرار الصح وأنتي منفصلة بتفكيرك عن باقي الدنيا أو باقي الناس ولو حتى نسبيا لان اللي بيحصل انك بتعملي شد وجذب مع حاجة واحدة بس هي نفسك وفي إطار محدود وهو خبراتك المحدودة بردو نظرا لسنك دي حاجة مش عيب، بس طبعا مهما وصلتي لحاجات وحقائق مهمة جدا هتلاقي فيها خلل معين بردو وغالبا مش هتكتشفيه الا بعد مرور وقت محترم كده على انتهاء التجربة.
انتي يعني مش لازم تكوني بالشخصية دي بس انا بفترض يعني وطبعا حاجة ممتازة أوي انك توسعي إطار نظرتك للموضوع ده من خلال استشارتك للدكاترة هنا أو حتى في موقع مشابهة وياريت ماتقفيش عن الاستشارة من الناس الثقة دينا وتفكيرا لان هتلاقي كل واحد هيوصلك رسالة معينة وكمان أصحاب التجارب خاصة التجارب المشابهة، وطبعا بقى في كل خطوة استخارة لان بردو ممكن تحسي أن قرار معين صح لأنك فكرتي فيه كتير أوي وتكتشفي بعد فوات الأوان انه كان غلط فيبقى عليكي بالاستخارة لأنه لا يعلم الغيب إلا الله على الأقل يعني ممكن يكون سبب فشل الموضوع ده حاجة غيبية ماكنتيش تعرفيها ولا تتوقعيها مثلا.
كفاية كده على موضوع النت والشات ولو أنت يتكتب فيه كتب يعني، وبالنسبة للشخصيتين دول فأوعي توافقي على الاولاني لأنه فقد صفة القوامة بالنسبالك أزاي يا أختي تاخدي واحد أنتي حاسة انك أعلى منه تفكيرا واصلا التفكير والحكمة دول من أهم صفت قوامة الرجل على الأقل يعني في رأيي.
وأوعي تاخدي التاني لأنه واضح انه مش هينسالك حكاية علاقتك بالشخص الاولاني، وعلى فكرة احذري من الناس الدكتاتوريين تحت قناع الديمقراطية وخاصة إذا كان عنده قدرة على الإقناع.. هتلاقيه في كل مشكلة يعمل نفسه بيناقشك بس هو من جواه يعني هعمل بردو اللي في دماغي والأخطر انه على حد قولك شايف نفسه أعلى قدلوقتي الناتج عنده أيه (انا واحد بفكر كويس وكمان تفكيري أحسن منها يبقى لازم اعمل اللي أنا شايفه لمصلحتها وهناقشها للصبح بس بردو هنفذ اللي في دماغي) هو ممكن طبعا مايكونش كده الله اعلم بعباده بس ده استنتاجي.
ولية بردو تعليق على موضوع السن وكام حاجة كده بس أنا حاسة أني طولت اوييييييي، بس يعني لو أختي حابة تكلمني على الخاص فماعنيش مشكلة اني اقدملها كل اللي أقدر عليه
ورجاء من الدكاترة اللي والله بحترمهم جدا وبقرا لهم في أي موقع وأي موضوع رجاء أنهم يعلقوا على تعليقي بالسلب والإيجاب، وجزا الله كل القارئين والمستشارين وطبعا صاحبة المشكلة كل خير، وأعتذر جدا على الإطالة.
17/05/2006
رد المستشار
السلام عليكم؛
هناك إشاعات أن النساء أكثر تحدثا من الرجال ولكني أرحب بهذا لأنه يعطيني وغيري فرصة لطيفة لنسمع أفكار الآخرين.
كلامك حول انغلاق الإنسان على ذاته فيه قول فمن الطبيعي أن يهتم الإنسان بحاجاته ويعبر عنها ويسعى لإشباعها بعيدا عن التمركز حول الذات وهو ما قصدته بلا شك في قولك بأننا يجب أن نهتم بما يحدث حولنا، والوسطية هي الصحيح في الحياة وتذكري أننا أمة وسطا يعني لا بد لنا أن نهتم بأنفسنا كي نستطيع أن نهتم بغيرنا ولكن بكل تأكيد أن الانشغال الزائد بما لا نستطيع تحقيقه يعيقنا عن الاستفادة بما لدينا وعن المساعدة في باقي جوانب الحياة، وإنها لحياة قصيرة موحشة تلك التي يحيياها الإنسان لنفسه ولرغباته فقط، نحن أمة أعمارها قصيرة لا بد لها من الاستزادة من الحسنات ومن طرقها السعي في أبواب الخير المختلفة كل منا حسب قدرته.
أما النقطة الثانية التي لا بد لي أن أشير لها من كلامك حديثك حول عدم سعادتك بخطبتك فهل كان خيارك الشخصي لذا أنت مترددة في الإفصاح عن عيوبه أو التراجع عنه كما عبرت؟ إن كان هذا الحال فاعلمي أنما جعلت الخطبة فترة للتعامل الواضح بحرية محدودة للتأكد من الانسجام الفعلي بعيدا عن همسات الحب والرومانسية فالحب الواقعي له أبعاد وأسباب مختلفة ولكن كما كنت ذكرت لصديقتنا بأنها لا يجب أن تجعل الناس تؤثر على قراراتها لا تجعليهم أنت كذلك يؤثرون عليك كي تقبلي بأمر ترين عن قرب أنه غير مناسب.
أشكرك لنصح صديقتنا بالاستخارة وتذكري قول الرسول عليه الصلاة والسلام "أسألوا الله شسع نعالكم إن انقطع" فما بالك لهداية والسداد في قرارات مهمة ولكن لنتذكر جميعنا أن زمن الوحي انتهى فلا يتوقع من يستخير أنه سيرى رؤيا أو إشارة ولكن فضل الاستخارة الحقيقي تيسير الأمر أو صرفه.
صرف الله عنا وعنكم السوء والسيئين من البني أدمين الوحشين، وشكرا لمساندتك أخت لك وجعل الله كلماتك في ميزان حسناتك ولا تحرمينا من متابعاتك دائما.
ويتبع >>>>>>>: قمة وعقلانية مشاركتان
تعليقات الأعضاء