|
| 
|
بين العقل والقلب
السلام عليكم ورحمة الله وبركاته؛ بصراحة دي أول مرة أفتكر إن هو ده الوقت اللي الموقع بيستقبل فيه الاستشارات مع إني متابعه الموقع من فترة لكن ضيق الوقت مشكلة. والحمد لله ربنا وفقني إني أكتب لحضراتكم.
أنا عندي 24 سنة الحمد لله ربنا وفقني واشتغلت في شركة كبيرة في مجالها. وربنا وفقني إني في سنتين بس أوصل لمكان كتير من أصحابي بيغبطوني عليه (لأن الحسد منهي عنه طبعا) وعلشان مش أطول عليكم مشكلتي إن أحلامي كبيرة شوية با سعى وباجتهاد وبطلب من ربنا سبحانه وتعالى أن يوفقني واقدر أحققها.
في الفترة الأخيرة حسيت بقيمة الارتباط وحسيت إنه فعلا استقرار نفسي هيسمح لي أن أجتهد أكتر في شغلي خصوصا لو البنت اللي تمنيتها عندها العقل وطريقة التفكير اللي تساعد بها زوجها إنه يحقق أحلامه (خصوصا إن كل البنات اللي عرفتهم حياتهم منزوع منها العقل اللي أنا بتمناه) لغاية ما لقيت البنت دي هي مش بعيدة عني هي قريبتي وفي نفس سني تقريبا. والمشكلة هنا في المستوى المادي وعشان أكون صادق أكتر أنا اللي مصعب الأمور على نفسي ودي حقيقة.
عايز أوفر لبيتي ولأسرتي كل حاجة عايز أحس بالنجاح لأن ده جزء من أهداف حياتي إني أكون زوج وأب ناجح. أنا دلوقتي مش جاهز أبدا ومش مستعد إني أكلم البنت في أي حاجة في الموضوع ده وجايز هي كمان السبب لأنها صعب تتكلم أو تصرح بمشاعرها وللأسف أنا جايز أصعب منها مش هقدر أتكلم معاها خصوصا وإن الموضوع فيه قرابة. وعشان ألخص كلامي في أسئلة:-
1- هل أنا عندي حق إني مش أتكلم في الموضوع غير لما أكون جاهز, مع العلم إن مافيش فرق سن وده مش في صالحي أبدا؟
2- أبعد عن زواج الأقارب. وأنسى الموضوع ده خالص مع العلم إني متأكد إني لو مش هارتبط بيها مش هافكر في الارتباط دلوقت خااااااااالص؟
3- هل الفرق الموجود في المستوى المادي ممكن يكون عائق. مع العلم إنها بنت محترمة جدا وإن مافيش أي فروق أخرى (مستوي علمي أو اجتماعي, ........)؟
4- أنا الحمد لله محبوب جدا من العائلة كلها. لكن ده وبالنسبة لي مش معناه أتقدم لها طبعا؟
5- إن وجودي بالشركة أكيد مؤقت لأني بحلم بأكبر من كوني موظف في مكان مهم بشركة مع إن مرتبي كتير يتمنى يوصل له . وده مسبب لي نوع من القلق لكني متأكد إن قضية الرزق محسومة ومش ينفع إني أفكر فيها من أساسه. خصوصا وأنا الحمد لله براعي ربنا سبحانه وتعالى في شغلي .
6- أنا رافض تماما أي مساعدة من جانب والدي خصوصا وأنا من ثانوية عامة والحمد لله بصرف على نفسي؟
7- التفكير في الارتباط واخد جزء من عقلي وطبيعي بيأثر على شغلي في أوقات كتير . لدرجة إني ساعات بتمنى إنها ترتبط عشان أنسى الموضوع ده خالص ودي مشكلة تانية إني وصلت لدرجة مش عارف إذا كان ده حب أو مجرد إعجاب. لكن اللي أنا متأكد منه إنه مجرد إعجاب بس مش أكتر.. وألا عمري ما هتمناها ترتبط بإنسان تاني؟؟؟؟؟؟؟
ياريت أكون رسمت صورة واضحة لكل اللي بيدور بداخلي. ويكون كلامي واضح وممكن أعرف عن طريقه إجابة عقلي يستوعبها لأني من النوع اللي بيحسب كل حاجة بعقله (جايز ده غلط لكني إتعودت على كده).
شكرا على وقتكم ودايما يا رب الموقع في نجاح وياريت تقبلوني كصديق للموقع.
سلام عليكم
09/03/2007
رد المستشار
(بَلِ الْأِنْسَانُ عَلَى نَفْسِهِ بَصِيرَةٌ) (القيامة:14) صدق الله العظيم
ما شاء الله عليك بصير بنفسك تدرك احتياجاتك وقدراتك جيدا وبإيجاز أقول لك استخر الله وأقدم على خطوة الارتباط أنت مثلك مثل كل الشباب يعانون من مشاكل ماديه ومعظم من يعمل يعمل في العمل الخاص أما بالنسبة للعمل الحكومي فقد أصبح من المستحيلات كالعنقاء والغول والخل الوفي.
أنصحك بأن لا تبالغ في تقييم الأمور فالفتاة كما تحب وتتمنى في شريكة حياتك متزنة وعاقله وأعتقد أن معظم الأسر الآن في مصر أصبحت لا تبالغ في المسائل المادية ولنتناقش سويا في العوائق التي وضعتها غير مشكلة المادة، كما تقول فرق السن أي فرق سن؟ ولماذا تريدها أصغر منك؟ سؤال ببعض من التفكير المتعقل الموضوعي سوف تجد أن الإجابة عليه غير مقنعة تماما وبالنظر للمرحلة العمرية التي أنتما بها فهي مرحلة الرشد ويكون فيها الولد والفتاة على درجة وعي كبيرة وطالما بينكما توافق فلا مانع من أن تكون في مثل سنك كما أني عندما أنظر حولي أجد أن كثيرا من الزيجات التي يكون فيها الزوجان من نفس السن هي زيجات مباركة والحمد لله.
والنقطة الأخرى التي تعدها من العوائق أنك تريد أن تكون جاهزا من كله أقول لك هذا شيء يحدث مع الوقت وما أجمل أن يكون لك رفيق في هذه الرحلة حتى تستمتعا سويا بثمرة الكفاح
ربما الشيء الذي أراه كفيلا بالتريث هو كون الفتاة قريبة لك وأنت لا تعلم حتى الآن ردها أو رد أهلها فعليك بأن تجد شخصا مناسبا للقيام بحملة استطلاع خفية وجس نبض ويا حبذا أن يكون المكلف بالمهمة فتاة.
أخي الكريم إن كلامك في النقطة رقم 7 لخص كل المشكلة التي لا أراها مشكلة وإن كانت سوف تسبب لك مشكلة فموضوع الارتباط الذي ألح عليك في طريقه إلى أن يكون عقبة إن لم تجد له حلا، والحمد لله كل شيء متاح لك واعلم أن أمور الزواج من الأمور التي ييسرها الله عز وجل إذا ما صدقت النية، فكما قلت لك اعقلها وتوكل وجعل الله لك من أمرك يسرا.
وطالع الروابط الآتية فهي ذات صلة
اختيار شريك الحياة مسؤولية من؟
الحب أم الزواج... الوهم أم الحقيقة؟؟
صراع بين العقل والقلب
الحب والعقل أيهما نختار؟
حدود فارق السن بين الزوجين
وأهلا وسهلا بك دائما على مجانين فتابعنا بأخبارك.
ويتبع >>>>>>>>>: بين العقل والقلب حيرة الاختيار م. مستشار
تعليقات الأعضاء