أحب على النت: ممكن تخلونها سرية!؟

 السلام عليكم؛

بصراحة أنا عندي كذا مشكلة وبصراحة برضه كنت خايفة أقول لحد عليها لأني ببساطة خايفة تلوموني يا ريت المشكلة ماتتعرضش لأني هقول فيها كل حاجة بجد ولو هتذيعوها يا ريت بلاش خالص لأني خايفة أوي أنا هكلمكو بصراحة كأنكوا أهلي لأني صعب أكلم أهلي لو سمحتم بلاش نشر.

أنا في طب رايحة سنة تالتة وتعرفت من النت على ولد في طب رايح خامسة بس المشكلة إنه مش من نفس المحافظة وقالي إنه معجب بيه من تاني محادثة على الماسنجر لأنه عرف إني مش بكلم ولاد في الكلية وهو كمان مش بيكلم بنات وعشان بصلي وهو كمان والله بنسيب الشات عشان نروح نصلي بس في الحقيقة هو ملتزم في الصلاة عني وبنتفق نقرأ قرآن زي بعض ودايما برضه هو اللي بيسبقني في القراءة، بس المهم إن الكلام تطور لكلام حب بس عذري والله خالص يعني عمرنا ما اتكلمنا في أي حاجة عيب أو حرام وأنا قلتله لو الموضوع اللي بينا حرام بلاش خالص قالي مش حرام لأنه بالنيات يعني أنا عايز أتجوزك يبقى مش حرام علشان دي نيتي،

وقالي إنه كلم مامته عني وباباه كمان وقالهم إنه معجب بواحدة من النت واشترى دبلة عليها اسمنا وعايز يحول معايا في نفس الكلية كمان وقالي والله مش هكلمك بس تبقي تحت عيني ومراقبتي أنا والله محتارة وهو ما يعرفش أنا منين خالص أنا مش عايزة أقوله لأنه عايز يسيب محافظته وييجي يقعد في المدينة الجامعية هنا عندي وأنا مش عايزة أعمل مشاكل أو أتعبه يعني بس بحس إنه أحسن مني بكتير لأنه ملتزم ومؤدب أكتر مني مش عارفة بقى وبعدين أهلي ممكن يموتوني لو عرفوا إني بحب على النت هما أخذوا بالهم إني طول النهار على النت بس المشكلة إني مهزوزة أوي يعني كل ما أتخيل إن الولد ده ممكن ييجي يتقدملي زي ما بيقول وأتخيل إن بابا بيضربني أدامه لما يعرف الموضوع جسمي كله بيقشعر والله خايفة أوي ومش عايزة أسيبه لأني بحبه بس لاحظت حاجة إنه هو لما بيكون متضايق بديله حلول إنما أنا لما أحكيله على أي حاجة بيقولي معلش ومفيش حاجة في إيدي طب أعمل إيه وبعدين خايفة أسيبه وهو طلب مني نتكلم على الموبايل لما كان مسافر كام يوم وأنا اللي رفضت وهو ما فتحش الموضوع تاني خالص ولا طلب حتى يشوفني مع إني شفته على الكاميرة على فكرة أنا قريت كل إجاباتكم عن الحب الإلكتروني وكلها بتقول إني لازم أسيبه لدرجة إني خفت أبعتلكم لأنكم هتقولوا سيبيه وماتكلميهوش تاني والله محتارة جدا والله أنا حاسة إني تغيرت من يوم ما عرفته وبطلت أكلم ولاد على النت،

غير للضرورة كله بقى كلام محترم أوي ولا ضحك ولا هزار ولا غيره بس بكلم الاستف بتاع موقع ودول ولدين أصغر مني بس محتارة أوي و خايفة جدا بس بكرر والله عمرنا ما اتكلمنا في حاجة عيب عارفة إن حضرتك هتقولي سيبيه وما تكلميهوش ده خيال بس أنا متعلقة بيه أوي والله وبعدين إحنا في كلية محترمة حضرتك عارف يعني مش دبلوم أو كده أو أي كلية مشهورة بالضحك على الناس زي المجمع النظري وأنا خايفة أوييييييييييييييييييييييييييييي.

أرجوكم أفيدوني مع العلم إنه كان هنا عندنا في نفس المدينة قاعد كام يوم وبيني وبينه ربع ساعة مشي وأنا حتى ما قلتلهوش لأني عارفة إن إحنا نتقابل أو يشوفني ده غلط ورجع مدينته وأنا لحد دلوقتي ما جبتش سيرة إنه كان جنبي أرجوك أعمل إيه أنا في ورطة والله حاسة إنه ما حدش حاسس بيه خالص يا رب تحسوا بيه وباللي في قلبي وتدوني حل كويس.
 17/08/2007