أحب على النت: ممكن تخلونها سرية!؟ م

 أحب على النت: ممكن تخلونها سرية!؟
 السلام عليكم؛
 
 أنا اللي بعت المشكلة لكن والله ما كنت أعرف حاجة... أنا قلت مستقبلي لازم ما يرطبتش بولد كل فكرتي هي اللي هو قالها لي....... يعنى لازم أحب واقع مش خيال، وعشان كده كلمت صاحبه على الماسنجر من إيميل مختلف وطبعا بعد لف ودوران كلمني عنه، وكانت صدمة عمري والله.
 
 قلت له أنا نفسي أتجوز دكتور عشان كان نفسي أدخل طب والدكاترة دول كلهم محترمين قال لي لا طبعا.
 قلت له طب وصاحبك الدكتور ده مش محترم ولا إيه واتصدمت!.... هقول لحضرتك ازاى.
 الولد اللي بحبه كان بيقول لي إنه مؤدب ومحترم وعمره ما بص على بنت، صاحبه بيقول لي أنه كذا مرة يلاقيه بينزل أفلام وحشة وهو يمنعه! 
 وكمان لما اللي بحبه قال لي أنا عمري ما كلمت بنت في الحقيقة، صاحبه بيقول لي أنه ماشي مع بنت وبيروح لها شقتها....... وموبايله مليان مقاطع بلوتوث وحشة أوي لولاد مع بنات أو بنات مع بعض كمان حضرتك متخيل الصدمة اللي كنت فيها مستحيل والله مستحيل كل اللي حسيته كان كده ازاي؟؟؟؟
 
 وسألته طب هو خاطب أو كده أو لابس دبل؟؟؟ قال لي عمره ما لبس حاجة في إيده! 
 طب لو كده إيه اللي كان في الكاميرا ده؟؟؟ إيه يعنى معدن حاجة جايبها من الأرض.
 
 ده حلف إن عليها اسمي وحلف إنه يحبني وحلف إني أول بنت في حياته والله حلف بربنا والله، ولما قال لي أنه مامته تسأله عليّ كان كدب......... وإن مامته بتقوله ليه زعلتها كان كدب! ولما قال لي والله بحبك كان كدب........ ولما اتفق يقرأ قرآن معايا وقال لي اسم السورة اللي واصل عندها وأكيد مش جنبه مصحف كان برضه كدب....... ولما كان بيسيبنى وبيروح يصلى لربنا كان كدب......... ولما كان بيستنى الجماعة في الصلاة كان كدب ولما قال لي عايز أتجوزك كان كدب......... ولما اتفقنا إن ربنا هو أهم حد كان كدب، ولما قلت له أني ساعات بسرح في الصلاة أفكر فيه واتخانق معايا وقال لي كله إلا حق ربنا عشان احنا اتفقنا نخليه أهم حاجة في حياتنا كان برضه كدب........ طب ازاااااااااااااااااااى ازاى
 
 تعرف حضرتك رغم كل ده بقول يمكن مظلوم، يمكن صاحبه ظالمه يمكن ما يعرفهوش كويس، على فكرة أنا مثلت أني معجبة بيه من كلام صاحبه وعايزه أكلمه وصاحبه وافق... وقال لي هييجي بالليل رغم أنه اللي بحبه قال لي أنه مسافر عشان باباه هيعمل عملية!!
 
 تتخيل حضرتك فعلا سافر مع باباه ورجع تاني بالليل بلدهم وقعد مع صاحبه يستنى المعجبة بسيادته ومشي سافر الصبح تاني.......... كل ده ومافكرش حتى يفتح الماسنجر بتاعه يشوفني أنا بعت حاجة ولا لا، ولا فكر فيّ أصلا رغم أنه كان مواعدني مايكلمش بنات!! 
 
 صاحبه بيقول لي فرح أوي لما عرف إن واحدة معجبة بيه وقعد يسأله عنها تتخيل..... ازاى مش مصدقة، على كده باباه اللي قعد يقوله عنى قصايد كان برضه كدب! مش عارفة أعمل إيه والله أنا بعت له ايميل كتبت له حسبى الله ونعم الوكيل فيك ويا رب كل كلمة كدب كتبتها لي تترد لك في صحتك وصحة أهلك وسمعة أخواتك البنات ويا رب أختك تتجوز واحد أخلاقه زيك وتبقى على عماها زى مانا كنت على عمايا والله أنا تعبت!
 
 صاحبه بيقول لي أنه سافر وراجع بعد خمس أيام رغم أنه المفروض كان راجع بكره عشان باباه عمل العملية انهارده........ بس الغريب إن باباه لسه تعبان ومش قادر يتحرك والله أعلم يمكن صاحبه بيبالغ مش معقول ربنا استجاب لي بسرعة كده الله أعلم!
 
 والله أنا اتعقدت وكل ما افتكر كلامه الحلو وحلفانه أنه بيحبني وهيتجوزني أحس أني عايزة أعيط...... والله يا دكتور عمري ما حسيت أنه بيكدب عليّ طب ازاي مش عارفة وبيقول لي صاحبه أنه مش متدين ولا حاجة خلاص أنا والله ما عارفة أفرح ولا أزعل؟؟؟؟؟
 
 زعلانة أني كنت بحبه وأني واضح كده لسه بحبه وخايفة عليه وبدعي أنه يكون مظلوم رغم أن صاحبه أكد أنه وحش اوى وحلف أنه متأكد وهو طرف على الحياد وفرحانة أنه ماخدش مني حاجة ولا حتى سمع صوتي ولا شافني هو خسران خسران........ يعنى في الوقت اللي كان ممكن فيه يشوف بنات بالهبل طبعا هو كان بيشوف، افتكر أنه ممكن بشطارته يوقعني معه بس والله كل ما كنت أجي أكلمه على الموبايل كنت بلاقي نفسي قلبي يتقبض وأحس أني هعمل مصيبة ألاقي إيدي ترمى الموبايل والله حركة لا إرادية وربنا يعلم.
 
 أنا والله بحمد ربنا إنه فوقني وكل حاجة قبل ما الموضوع يكبر بس خايفة من الدنيا أوي أوي وحاسة أني كل الناس هتضحك عليّ زيه وأنا هصدق عشان أنا هبلة.
 أرجوكم ساعدوني والله ما عارفة أعمل إيه كل ما افتكره بموووووووووووووت والله عمري ما تخيلت أنه يكون بيكدب لأنه حلف وأنا أكيد عندي إحساس هو كان بجد جنبي ومعايا وحاسس بي وحاسة بيه بس إيه الكلام ده مش عارفة اللي سمعته من صاحبه ربنا يعمل اللي فيه الخير.
 
 شكرا على الاهتمام والرد
 3/9/2007