|
| 
|
لماذا الزواج تعليق على مشاركة
ازيكم؟ عاملين إيه؟ أنا بأشكركم علي موقعك الجميل ده وبأحيي كل القائمين عليه.
المشكلة مشكلة صاحبتي مش أنا -ممكن د.علاء مرسي يرد على المشكلة مع احترامنا للجميع لكن بناء علي طلبها- هي أنها كانت بتحب واحد قريبها من سنين من طرف واحد من غير ما يعرف ولا بتلمح له من كسوفها وطنط -مامتها- كانت حاسة بكده لكن صاحبتي عمرها ما قالت لها صراحة بحقيقة مشاعرها -بس إحساس الأم- وكانت أمها ساعات بتلقح بالكلام لما بتكون معاها لوحدهم أنها عارفة الموضوع وصاحبتي بتعمل نفسها عبده العبيط ولا كأنها فهمت تلميح أمها ومن تحت لتحت كانت أمها لما بتتفرج معاها على التليفزيون ويلاقوا واحدة بتحب من طرف واحد كانت بتقعد تبستف في الممثلة وتقول بدام الحب من طرف واحد وهو مش بيفكر فيها تبقي عبيطة وعمرها ما هتبقي له
وكانت صاحبتي عارفة إن ديه رسالة غير مباشرة من أمها لها بس كانت بتنفض المهم في مرة عرفت من أمها إن الولد ده ناوي يخطب واحدة طبعا صاحبتي كانت منهارة من جواها لكن ما بينتش المهم جه وقت الخطوبة وهي طبعا ما كنتش عايزة تروح لأنها حاسة أنها لو شافت العريس والعروسة هتنفجر في العياط -خصوصا أنها شبه يوميا بتعيط بالساعات فجأة كل ما أي حاجة ولو بسيطة تفكرها به -وده هيخلي شكلها وحش وكل هيفتكر لها الموقف ده زائد إن أمها هتهزأها وهتزلها بالموضوع ده طول حياتها فنزلت مع أمها زي أخواتها يشتروا السواريه اللي هيحضروا به وهي كانت من الأول مرتبة أنها ما تروحش وتعمل نفسها عيانة وسبحان الله في نفس التوقيت جالها دور برد شديد ودي كانت حجتها إنها ما تروحش فقعدت في البيت لوحدها.
المشكلة بقي دلوقتي إن الفرح قرب وأمها بتقولها المرة دي هتحضري الفرح لو فيك ايه عشان شكلك ما يبقاش زبالة قدام الناس والعيلة, الناس هتقول إيه وأنت لغاية دلوقتي لا باركتي له ولا هنتيهم ولا كأنك من العيلة؟ ومامتها مست حفلها لاهي جاية معاهم ولو بالضرب!
أنا قلت لها يا بنتي تلاقي مامتك عايزة تعملك كده عشان تصدمي بالواقع وتفوقي لنفسك، المهم هي مش عارفة ازاي ممكن تروح وتعمل نفسها فرحانة زي بقية الناس وهي من جواها بتولع نار يا حبيبتي ولا عارفة تعمل إيه مع مامتها.
ملحوظة1: صاحبتي فاكرة إن مامتها السبب في ده لأنها كانت حاسة بحبها له وما عملتش حاجة من الأمهات لما بيحبوا يوقعوا عريس يعملوها وهي تقريبا ما بتكلمهاش من ساعة الموضوع ده.
ملحوظة2: الأم كانت دايما بتشكر في الولد وتقعد وحتى بتقول لابنها شفت فلان قريبكم يا ريت تبقى ربعه في شطارته ونصاحته لحد ما بدأت تحس بالحكاية فبقت تطلع فيه القطط الفاطس وبدل ما تتكلم عن (بطولاته) زي أيام زمان بقيت تتلكك له على الغلطة وتقولها قدام صاحبتي.
28/10/2007
رد المستشار
صديقتي؛
صديقتك مخطئة في أن تلوم أمها وتعاقبها على عدم مساعدتها على "الإيقاع" بهذا الشاب في شباك الزوجية... الحب من طرف واحد يعني أنها لا تعرفه وأيضا الدليل على هذا أنها فوجئت بخطبته.. كما قلت مرارا قبل ذلك واقتباسا من كتاب "فن الحب" للمحلل النفسي إريك فروم، الحب يتكون من معرفة واهتمام واحترام ومسئولية.. هذه الأربع كلها وبالتبادل ما بين الطرفين وبنمو مستمر فيها ولو في خطوات صغيرة.
ما يحدث مع صديقتك هو طبيعي ومعتاد في سنها وهي تتألم تألما حقيقيا ولكنه مبني على كذبة خلقتها هي وصدقتها أو على أمل كاذب تعلقت به بدون دليل أو وجه حق. من الأفضل أن تقتنع بأن تذهب إلى حفل زفافه وأن تشارك في فرحه إن كانت تحبه حقيقة وتريد سعادته بدلا من امتلاكه.
ما فعلته الأم قد يبدو قاسيا وغبيا في بعض الأحيان ولكنه بحسن نية وبرغبة في مساعدة ابنتها على تخطي الأزمة والتي ستنتهي بقليل من النضج والمعرفة بما هو الحب الحقيقي والذي لا يمكن أن يكون من طرف واحد أو علي حساب طرف دون الآخر بأي حال من الأحوال.
وفقك الله وإيانا لما فيه الخير والصواب.
تعليقات الأعضاء