بغير عليه....طيب أعمل أيه؟؟

السلام عليكم 

يا ريت لو في أيديكم تساعدوني لأني تعبت تعبت، والله خلاص مش قادرة أتحمل. أنا مشكلتي بالشك ثم الشك ثم الشك؛ حيموتني أنا أبي وأمي من جنسيات مختلفة بس أمي مصرية وعايشين طول عمرنا في مصر وأبي طول عمره مسافر، بيجي زيارات كل سنة كل 6 شهور حسب شغله. كنا وإحنا صغار بنحبه علشان كان بيجيب لنا هدايا بس لما كبرنا كرهناه لأنه كل زيارة بيجي يقرفنا، بيتشدد علينا وكنت بقول لنفسي ده مغفل أنا أقدر أعمل إلي أنا عايزاه وهو مش هنا ليه هو دلوقتي بيعمل كده.. ما علينا. اتعرفت على واحد وحبيته، جنسيته غير جنسيتي كمان وأول ما اتعرفنا كانت صحوبية وبس وحكى لي كل ماضيه وطبعاً ماضيه مزفت بنيلة، كان بيعرف ستات وبيسافر كتير لندن قبرص البحرين بلغاريا لبنان سوريا، سافر كثييير وعرف ستات كثير وحكى لي عن أغلب إلي عرفهم.

المهم بدينا نحب بعض واتعلقنا ببعض وحبينا بعض جداً وأنا بديت أحس أنه ملكي وخلاص إلي فات فات وكنا بنتقابل في شقته ونمارس جنس خارجي بدون إدخال وقابلتنا عقبات من أهالينا لأن الجنسيات مختلفة ومشاكل وصراعات لحد ما أهلنا وافقوا بالعافية، بس مشكلتي أننا كنا كل شوية نسيب بعض ونرجع ونسيب ونرجع، في الأول السبب أهالينا ورفضهم بس بعد كده السبب القوي كان شكي وغيرتي الزايدين عن حدهم، وكنا كل ما نسيب بعض أسبوعين ثلاثة -هو يعرف واحدة يتسلى بها تسلية يعني مش واحدة بس كثير- وده كان بيزيد شكي فيه، خصوصاً أن جنسيته أنا اتربيت على أن جنسية صاحبها يعشق الستات.

المهم بعد 3 سنين من الصراعات من أهلنا والشك والغيرة اتجوزنا بس الشك زاد مع أنه بطل يعمل حاجة، حتى أنا متجوزاه من 7 سنين عمري ما شفته مع واحدة، ودايماً أفتش في موبايله وجهاز الكمبيوتر بتاعه كام مرة معدودين عالصوابع إلي لقيت صور إباحية، بس شكي كل يوم في زيادة واتخرب بيتي 3 مرات قبل كده بسبب الشك بس الحمد لله مرتين منهم ما اتحسبوش.

أنا حوصف لكم شكي إزاي:
مثلاً لو شفت مسلسل أو فيلم عربي أو أجنبي وفيه واحدة حلوة ومغرية أنا نار تضرب في رأسي وبطني توجعني ودمي يغلي وأحس أني مش قادرة أفكر كأني واحدة مش طبيعية مش بعرف أعمل كنترول على نفسي ولا على أعصابي وأقلب بوزي وأحس أن نفسي أتخانق معه، أنتقم منه لأن من جوايا بحس أن المنظر أعجبه مع أنه بيغير المحطة بسرعة لما يلاقي حاجة زي كده بس مش بثق فيه. مثلاً: لو شفت واحدة عدت في الشارع حلوة ومغرية وهو مش موجود أقعد أتخيل لو جوزي كان واقف مكاني كان حايعمل إيه لو أنا مش موجودة أقول لنفسي أكيد حيبص لها لأنه بيحب الستات وحيتخيل نفسه معاها وأبدأ أتنرفز والدم يغلي في رأسي وطبعاً حتى لو هو ملوش ذنب لو ما ضربتش ببوزي قدامه الموضوع بيأثر على علاقتي به ويخليني أعامله بجفاف وشدة ونتخانق في الآخر.

لو خرج بره البيت أفضل على نار، أكيد مع واحدة أكيد نايم مع واحدة، لو جاله سفر تبع شغله أكيد رايح يزني ما هو كان بيعمل كده زمان لما حاسة إني بجد حموت من التفكير والتخيلات إلي بتيجي في رأسي، حتى جه علي وقت أشك أنه ممكن يفكر في أختي أو صحبتي! لو جت مطربة ولا ممثلة في إعلان نفس الحكاية، لو قعد يذاكر أو يعمل شغل عالكمبيوتر أبقى على أعصابي على أعصابي على أعصابي ونفسي أعرف بيعمل إيه وأفضل أحوم حواليه ولو معرفتش أستنى لما ينام أو يخرج وأشوف هو كان داخل فين وطبعاً دايماً بيكون مظلوم، لو حكى لي عن حاجات بيسمعها يعني مثلاً صاحبه بيحكي له أن في واحد بيقعد في كوفي شوب ويفتح البلوتوث وبيستقبل ويرسل أفلام سكس، أنا أرد على جوزي أقوله أكيد شاب مش متجوز يقولي لا متجوز ومخلف أنا على طول أحط في بالي أنه بيتكلم عن نفسه أو على الأقل عن صاحبه، ولو صاحبه كده أو حتى صاحب صاحبه كده يبقى هو كده لأن الطيور على أشكالها تقع.

كام مرة هو احتلم -يعني كل كام شهر كده- أفضل أستجوبه حلمت بمين واتخيلت مين تقلب بخناقة لرب السماء، لأني بقوله إلي بيحتلم العازب وبس ولو واحد متجوز احتلم بيكون لأنه بيشوف أو بيفكر في حاجات وسخة!!.
لو حلمت أنه خانني أصحى متعكننة وأتعامل معه على أنه خانني فعلاً مش في الحلم وبس. أول طلاق تم بيننا لأنه كان مخبي كليبات أغاني أجنبية عني ولما شفتها بهدلته وقلت له طلقني راح مطلقني في وقتها وقال أنه حس كأني أمه بتحاسبه، ودايماًً يقول: أن الشباب بيعملوا بلاوي وحريمهم مش حاسين وهو مظلوم وعلى الرغم من كدة قارفاه، وطبعاً الكلام ده مش بيدخل رأسي لأن في نظري الرجال كلهم ضعاف قدام الستات. والثاني برضه حصل بنا جفاء لمدة 3 أو 4 شهور وشك وقرف -نفس الموال- وحصل طلاق. والثالث كده كمان لولا ستر ربنا، وما اتحسبش طلقتين.

أنا للأسف كل ما انقهر منه أو أشك فيه أعمل حاجة غلط؛ إما أدخن أو أدخل النت للمواقع الإباحية أو أتعرف على واحد ونمارس جنس إلكتروني، وبميل كمان للتحدث إلى بنات جنسي في الأمور الجنسية عالنت، ومرة وأنا متجوزة مارست جنس مع صحبتي وبمارس العادة السرية كل فترة... بحس أني بنتقم منه مع أنه أحسن من غيره بس مش عارفة أنا بعمل كده ليه! وعلى الرغم من كده بندم بعد كده على الغلط إلي بغلطه. حالياً إحنا كان بيننا مشاكل من شهرين وضرب، لأن هو خلاص وصل لآخره مني ودلوقتي عندنا ولد صغير عمره شهور بس وهو قال أنه مخليني على ذمته علشان ابننا بس وابننا كبر حايسبني، غير هم الشك والغيرة كمان عايشة مذبذبة وخايفة.
 
أنا عارفة إني مريضة بس هو ما عندوش استعداد يوديني دكتور نفسي لأنه رافض الفكرة ومش مقتنع بها، ودايماً يقول لي مفيش حاجة اسمها طب نفسي ودول بيضحكوا عالناس خصوصاً أن عنده أمه بتتعالج نفسياً من سنين طويلة فهو اتعقد. وكمان أحب أضيف إني بحس أن أبي مريض بالشك زيي طول عمره يشك فينا ولما يجي إجازة يراقبنا، وأمي غيورة لأبعد الحدود مع أن أبي عرف ستات غيرها كثير وهي كانت بتسمع وتعرف وبتغير أوي عليه، هما حالياً منفصلان وكمان أنا اتعرضت للتحرش الجنسي من أستاذي وأنا في الابتدائي، وأنا في الإعدادي كمان من أستاذي ومن بنات الجيران وأنا في الابتدائي كمان، وأنا في الثانوي اتعرضت للتحرش الجنسي في المواصلات.

ومن أسباب تعقدي كمان وشكي في جوزي أني على درجة قليلة من الجمال وهو وسيم ويلفت النظر في كل مكان حتى ساعات كنت اتكسف أخرج معه أحسن حد يبص علينا ويقارن بيننا ويحرجني قدامه، وكمان أهله هو مشتتين أمه أنانية وتحب مصلحتها، وأبوه خمرجي وبتاع ستات وطول عمره يخون أمه وهما حالياً مطلقين وده سبب بيخليني أشك فيه لأني بحسه شبه أبوه في أشياء كثير. وكمان جوزي بيغير علي مش زيي بس برضه بيغير يعني ممنوع أطلع من البيت من غير رجله على رجلي وطبعاً محجبة ومغطية وشي لأني عايشة في بلده وده سبب بيأكد لي أنه خائن لأن إللي بيخون بيخاف على أهل بيته بزيادة. وأحب كمان أقول أن الناس إلي أعرفهم كلهم بيقولوا عليه خلوق وغير ما أنا بفكر بس للأسف فكرة أنه بيحب الستات أو على الأقل بيفكر فيهم مش بتتشال من رأسي.

أنا قلت لكم عن حالتي وأتمنى ألاقي عندكم الحل لأني، تعبت والله العظيم خلاص نفسي أبطل أحس بالغيرة والشك إللي تعبوني وحايخربوا لي بيتي وخايفة أكون ظالمة وعمايلي تخليه يخوني بجد لأنه متحملني من 7 سنين وقبلهم 3 خطوبة، وحتى لو بيعرف حد أنا عاوزة أرتاح من الإحساس المقرف بالشك والغيرة

يا ريت تقولوا لي إذا حالتي ينفع لها حل بالكلام ولا العلاج الدوائي
وارحموني من إللي أنا فيه.
16/12/2007