|
| 
|
قرار.......
أساسا مش عارفة أبعت الرسالة دي على أي باب بس حاسة إني عايزاكم تساعدوني وتدعموني في قراري اللي فكرت فيه كتير,
أنا خلاص قررت أسيب العلاج والدواء كمان, أنا مريضة بالاكتئاب وشوية وساوس صغيرة خالص بس المشكلة إني خلاص تعبت... تعبت من مصاريف الدواء اللي لوحدها عملالي اكتئاب تاني.... تعبت من التحويش والتجميع وفي أقل من ساعة تضيع تحويشة شهر ونص.... وبعد كام شهر ونص لسه مفيش نتيجة... مش قادرة أوفر أكتر من كده.....
الإنسان هو اللي بإيده يغير نفسه... القرار ده أنا أخذته من أسبوعين وأعراض انسحاب الدواء ما عملتليش أزمة كبيرة... كل يوم بنزل مكان جديد.... قلت لهم لو لقيتوا باب أوضتي مقفول أكسروه منعت نفسي خالص من الوحدة... مش بحاول أقعد مع حد عنده أي مشكلة حتى نشرة الجزيرة بطلتها.... بس خايفة... خايفة أوي أنتكس تاني... مش هينفع.... من يومين حصل موقف مش كويس وللأسف ماتعاملتش معاه صح ودخلت في مود مش حلو بس الحمد لله لحقت نفسي وقعدت أقول لها مش مهم مش مهم مش مهم.... أنت أقوى أنت أقوى أنت أقوى..... وعدت الحكاية بستر اللي خلقني....
أد إيه مشتاقة دلوقت لحنية دكتوري الحكيمة والمكلفة... أد إيه محتاجة حد يقول لي ماتخافيش...
أنا بقيت عصبية أوي اليومين دول واللي لفت نظري لكده أمي.... يا ترى هقدر أكمل؟؟؟؟ يا رب
على فكرة أنا مش ببعت الرسالة دي عشان حد يقول يا عيني يا بنتي تعالي لما أعالجك!!! لأ لأن الفقر مش عيب بس التسول هو اللي عيب..... أنا بس بحبكم أوي وبقدركم أوي أوي وعايزاكم تقولون لي إني هنجح وهقدر وهبقى من غير اكتئاب...
حتى لو مش عايزين تنشروا الرسالة دي مش مشكلة أهم حاجة إني فضفضت لكم وأنتم أكيد هتدعولي... صح؟؟؟
شكرا
19/6/2008
رد المستشار
عزيزتي؛
أهلا ومرحبا بك على الموقع، عانيت من الاكتئاب وهو من الاضطرابات التي تؤثر على استمتاع الشخص بحياته وعلاقاته بالآخرين، وعانيت أكثر من استخدام الأدوية ومن سعرها أكثر، ولأنني لا أعلم كيف تم علاجك ومدته وغيرها من الأمور الفنية، وبالتالي لن أعلق على كفاءة الدواء وطريقة العلاج إلا إذا سمحت لنا بمعرفة تفاصيل منك.
المهم أنك قررت في لحظة قوة أو لحظة إحباط أن تعتمدي على نفسك اعتمادا كليا في العلاج، وهو شيء جيد جدا خاصة أنك اتبعت أسلوبا علميا في ذلك وهو ما نطلق عليه العلاج المعرفي السلوكي (لو لقيتوا باب أوضتي مقفول اكسروه منعت نفسي خالص من الوحدة، مش بحاول أقعد مع حد عنده أي مشكلة) وعلاج تدعيمي (أنت أقوى أنت أقوى أنت أقوى) وهي فنيات جيدة خاصة أنك اعتمدت على نفسك في صياغتها وتنفيذها، فكيف لو تم هذا بطريقة مقننة ومتسلسلة.
وبالتالي لأننا نحبك مثلما تحبيننا فسوف نقترح عليك أحد الاقتراحين أحدهما أن تحضري إلينا في مستشفي الجامعة (الحسين / سيد جلال) أو أقرب مستشفي جامعي لك وهناك العلاج مجاني وبالتالي ليس فيه تسول بل هو حقك.
أو أن تدخلي على الموقع وخاصة المقالات وستجدين برنامجا متكاملا أعده زميلنا الفاضل د.محمد شريف سالم لمن يعانون مثلك فربما يكون مفيدا لك ويدعمك في محاولاتك للعلاج الذاتي، ويا ليت تأخذي الاقتراحين معا فكلاهما يدعم الآخر
نتمنى لك التوفيق .
تعليقات الأعضاء