موسوسة تطلب السرية وطبيبة مصرية م2

موسوسة تطلب السرية وطبيبة مصرية م1
أريد الطبيبة رفيف للرد على.

رسالتي مش الواحد بردو لما يكون أرفان من نفسه أو من حاجة مثلا المفروض أن يستحمى أو لو كانت هدومه متوسخة يغيرها وخلاص كدا خلص الموضوع! أمال ليه أنا مش بعمل كدا أنا بقعد أرفانه من نفسي وبقعد أعيط وخلاص كدا.
 
أنا كانت لي رسالة سابقة (موسوسة تطلب السرية وطبيبة مصرية) وطلع عندي وسواس قهري شوفي الأفكار الغريبة اللي بتجيلي أنا أساسا بتعقد من بابا وبقرف أني أمسك حاجاته بحس كدا أني هضر نفسي طيب طالما أنك بتقرفي تمسكي حاجاته ببساطة اغسلي إيدك وبس كدا! أنا بقى بعمل إيه؟ بمسك حاجاته ومش بغسل إيدي وأي حاجة أمسكها بعد كدا بقرف منها وأبطل أمسكها وبقعد أعيط وطبعا لو أهلي سألوني مالك بقلهم ولا حاجة مهو طبعا هيقولوا علي هبله!!..

مع أنه يعني فيها ايه لو مسكت حاجة بابا ما بقية أهلي بيمسكو حاجاته ومش بيحصلهم حاجة ولما آجي أقول خلاص مثلا هنظف الحاجات اللي مسكتها تلاقيني بعقد المواضيع بزيادة بقول لون المنشفه الي هنظف بيها مش عاجبني أصله لون فلان المفضل ولو استخدمتها هكون بفكر فيه والحاجات اللي اتنضفت لو مسكتها هكون أكني مسكته هو شخصيا وعلى كدا بقى!

أنا أصلا متعقدة من بابا من زمان وبحس أن الأفكار دي لما تجيني بكون مبسوطة بيها بس بعدين بقرف من نفسي ليه بعمل كدا وكمان حاجة تانيه اللي أن تلاقيني اتعقدت وقلت والله ما أنا منظفة حاجة وخليها كدا وتلاقيني تلقائي بمسك الحاجات عادي بس الغريب في الموضوع أن الأعراض دي بتزيد عندي من الظهر إلى المغرب والصبح لما أكون في البيت وبالليل بتخف جدا الأفكار دي بس لما أكون مع صحابي ولا بفكر في المواضيع دي وبعد كدا لما بقعد مع نفسي بقول أدي الموضوع ده طلع عادي أهو ومش هيأثر عليك طب افرضي بقى لو مطلعش الموضوع ده عادي كان حصلك إيه؟؟؟ 

وعندي على كدا بقى مواضيع كتييييييييييييير ده هبل ولا إيه؟ وكمان أنا من زمان مكنتتش بتنشف كويس ومكنش بيحصلي حاجة بس بعدين أخدنا في الجامعة أن الماء على الجسد بيسبب فطريات أنا بعد ما سمعت كدا المفروض خلاص أني أنشف كويس أنا لا مش بتنشف كويس وبقعد أعييييط وبقول هيجيني فطريات مع أن بقية أهلي بيتعرضو لكمية مية أكبر ومش بيحصل لهم حاجة ما أنا بكون بقول تلاقيهم هم كمان مش بيتنشفو بس مثلا لو عرفت أنهم بيتنشفو هموت ساعتها وهقول لنفسي أني عيانه بس بعدين بقول لا دي وساوس بس بقول طب لو طلعت حقيقة أعمل إيه في نفسي ساعتها وقيسي على كدا مواضيع كتير.

بعدين مشكلتي إني مخي بيفكر كتييير طيب لو بطلت التفكير ده كله هيحصل إيه يعني وساعات لما مش بيكون جايلي أفكار أنا بقعد أجيبها شكلي اتعودت على الأفكار دي بس ساعات خلاص مش قادرة أتحكم في نفسي.
 
المشكلة الأعظم أني عارفة إيه العلاج بس مش بعمله! إيه الهبل ده أنا خايفه أنه يكون قلة أدب مش وسواس وأنا حطاه في نطاق الوسواس عشان أكون في السيف سايد يعني اللي قصدي أقوله أن الأفعال طبيعية بس الأفكار هي اللي مش كدا.
 
بخصوص الشاب الي كنت تكلمت عنو في رسالة سابقة احنا دلوقتي متخنقين عشان نفس الموضوع أنه عايز رقم التليفون وأنا مش راضية اديه له أنا مش بحب الأسلوب ده وبخصوص الاستخارة أنا بجد مش حسة بحاجة هو ده طبيعي ولا أنا اللي مش فاهمة الاستخارة بتبقى ازاي ومش عارفة دلوقتي كلامي معاه صح ولا غلط والمشكلة أني لما أحكي له أني لسه بصلي استخارة بيتريأ علي.
 
دلوقتي أنا مش عارفة أعمل إيه بقول يمكن الخناقة دي جت من عند ربنا عشان أسيبه؟ والمشكلة أنو بيقول لي أني وحشته. طب دلوقتي لو رجعنا أعمل إيه ساعتها وحكاية أني بشبهه بحد دي لسه عندي أنا ساعات لما تجيلي الأفكار دي أنا بغيرها أو مثلا أُكَره نفسي في الشخص ده أو ساعات بفكر في حد تاني بتربطني بيه علاقة أخوة بس المشكلة أني لما ألاقي صفة من الصفات الوحشة اللي أنا زرعتها في مخي عن الأشخاص دي في الشاب ده بقول ده شاب مش كويس وبكرهه وبيفكرني بالناس التانية دي أنا تعبت بجد.
 23/04/2010