دماغي طويلة الشكل وأصحابي بيقللوا مني جامد ..!؟
السلام عليكم أنا عندي مشكلتين جامدين أوي بتخنق منهم الأولى أنا دماغي طويلة الشكل ومع إني وشي جميل وبنات كتير أعجبت بي وأنا متأكد من الحكاية دي بس المشكلة في طول دماغي طويلة مع إني لما ببص في المرايا ساعات بشوفها عادية وساعات طويلة بس مش قوي، وأصحابي وبعض أقاربي بيقولوا لي يا أبو دماغ يا أبو رأسين أنت إزاي يا بني بتقلع التيشرت وأنا طبعا بتخنق أوي وثقتي بتقل في نفسي وطبعا الوش الحلو مع الرأس الكبيرة وحش.
السؤال هنا إزاي أتعامل مع الناس وأنا كد وإزاي أتخلص من الزعل السؤال التاني صحابي ساعات واحد يقولي هو أنت بتتفرج على المصارعة قولتله آه قالي أنت وضحك علي ومرة قولت أنا نفسي أطلع زي كرستيانو رونالدو قال لي احلم على قدك والتاني مات من الضحك السؤال هل أنا ما أستحقش حاجة من دول وتحياتي للجميع والموقع الممتاز.
04/06/2011
رد المستشار
طبعاَ تستحق، وهو رونالدو ديو كابريو كان عنده كام سنة لما كسر الدنيا بفيلم تايتانك، والطالب المصري الذي كرمه أوباما امبارح كأفضل طالب في خلق مفاهيم جديدة للبحث العلمي على ثلاث ولايات من أكبر ولايات أمريكا وعنده 14 سنة كان إيه؟، وسيدنا معاذ بن جبل الي اهتز لموته عرش الرحمن لما توفيّ وعنده 26 سنة فقط مما قدم للإسلام وللمسلمين، المشكلة ليست في أننا نستحق ولا ما نستحقش؟؟؟
المشكلة في إحنا بنعمل إيه عشان نوصل للي نستحقه، هل احنا مركزين في تطوير أنفسنا وتدريبها للحاجة اللي بنحبها وبنحلم بها وبنختار الدايرة اللي حوالينا عشان تكون معينة لينا وشبه طريقة تفكيرنا ولا بس بنكتفي بالفرجة والصويت كل ما يحصل معجزة قدام عيننا، وكل اللي حوالينا لا بيشجعوا ولا بيجتهدوا ولا بيعملوا حاجة غير التريأة والكلام الي مالوش لازمة، وانت وقعت في الفخ ده للأسف لدرجة أنك تسأل هو انت تستحق ولا ما تستحقش؟، انت كده بتخليهم يلعبوا في دماغك ويوقفوك مكانك بدل ما تشوف اللي وراك؟؛
حتى رأسك وشكلك بقوا بيأثروا فيها عليك وانت نفسك الي قلت انك شايف ان راسك كويسه وان وشك جميل وكمان فيه بنات معجبة بيك ولا ليك مزاج تصدق كلامهم بالعافية عشان تعيش دور يشغلك عن المهم لأنك كسول؟، بص على أي حد مشهور أو بيعجبك في مهارة أو شخصية وقولي كده ان مافيهوش أي حاجة يتعلق عليها!، وهتعرف انك غلطان عشان 3 حاجات مهمة جدا جدا:
الأولى ان ثقتنا بنفسنا مش بناخدها من بره؛ يعني الثقة في نفسنا بتكون طالعة من جوانا وعشان تقوى وتكبر وما نحتاجش اننا نسمع كلمتين حلوين من حد غيرنا عشان نحس بنفسنا لازم نقويها بجد بالثقافة والتطوير والتهذيب المستمر لعيوبنا ساعتها لو الجن الازرق قال كلام تافه مش هيفرق معانا كتير،
والتانية انك واقف موقف المتفرج من أحلامك؛ تقدر تقولي عملت ايه عشان تكون زي كريستيانو؟، اتدربت؟، اتعلمت؟، بتتدرب أد ايه؟، على ايد مين؟، كام ساعة بتقضيها في التدريب؟، قريت ايه عن تاريخ الكورة وقوانينها الدولية؟... إلخ،
الثالثة انك تتصرف تصرفات تجبر الي حواليك باختيار كلامهم والفاظهم معاك، تتصرف تصرفات موزونة، كلها ثقة، كلها ثبات، ولو الي حواليك مش مناسبين ليك غيرهم، وعلى فكرة تغيرهم سهل جداَ وهيريحك وهيخليك تشوف الدنيا بشكل غير الي شايفها بيه دلوقتي، وهيكون شكلها أحسن لأنه الأصح، أما قرايبك فمش هتغيرهم؛ لكن تقدر تغير اسلوبهم معاك بتصرفاتك وتغيير نفسك بالانشغال بطموحاتك فعلا وبرفضك الصريح أو بالتلميح لأي تعليق لا يعجبك عشان يتعلموا الذوق والأدب، وده هتعمله مش عشان يتكلموا كويس ادامك؛ لكن عشان انت فعلاَ معندكش مشكلة وما تقبلش الكلام معاك يكون مش مناسبك..... هستنى اعرف التطور وانك بتعمل حاجة بجد تجاه حبك للكورة... سلام.
ويتبع>>>>>>: وساوس فقط والاستشارة مقتضبة م