|
| 
|
ذهان حاد..!؟
السلام عليكم أخي عنده 24 سنة خريج نظم ومعلومات ولد وحيد على 3 بنات من شهر 8 ترك العمل وحاول البحث عن عمل آخر لكن دون جدوى من فترة حوالي 3 شهور ابتدأ يتغير بدأ يصلي ويقرأ قرآن وينزل يصلي بالمسجد قولنا الحمد لله ربنا هداه ولكن كان هادئ بطريقة غريبة يقول دائما الإسلام سلام والدنيا سلام وبطل يزعق وبيتكلم بهدوء وبدأ يتكلم كلام غريب إنه مات من قبل وصحي وهو طفل وأن ملك الموت جاء له وكان هيقبض روحه وهو قاله سبيني وسابه وهو عاش من بعد ما مات طبعا إحنا افتكرنا إنه تعمق بالدين زيادة فبيقول كلام مش منطقي ابتدأ يتكلم أنه مش خايف من الموت لأن ربنا بيحميه ووقف لأختي على سور البلكونة وقالها أنا مش خايف من الموت وقال لها اطلعي قولي لهم إني مجنون ما هما بيقولوا عليا كده...
احنا ابتدينا نحس إن فيه حالة مش طبيعية وبلغنا بابا إن فيه مشكلة وماما ألحت على أنه لازم يتدخل بس بابا أخذ الموضوع على أنه عادي واحنا مكبرينه وهو كويس مفهوش حاجة طول الوقت يتكلم عن الزرع وأنه بيكره يجيب خير وهيبقى معاه فلوس كتير وهيدي للناس ويشتغل بيهم وأي حد يقولوا ده غلط ولازم تشتغل يزعق ويقول أنا مش هشتغل عبد زيكم أنتم عبيد إن شاء الله أبيع ترمس في الشارع مش هشتغل عبد وبدأ في الفترة الأخير ينزل الشارع لأنه فضل من شهر 3 مش بيخرج ولا بيشوف أصحابه زي الأول وكان أغلب وقته على الإنترنت أو أفلام أكشن على الكمبيوتر أو ألعاب حرب واستراتيجية بس بعد الحالة اللي وصلها مبقاش يقعد على الكمبيوتر كتير ابتدأ يقول إن المهدي المنتظر موجود وأن من صفاته ضلع وعلامة وكلام غريب وأنا ممكن أقول أني المهدي المنتظر والناس تصدقني...
طبعا إحنا كنا بناخد الكلام على أنه مش طبيعي بس مش واخدين إن فيه مشكلة بدأ نزوله الشارع يعمل مشاكل اكتشفناها مؤخرا كان ينزل يفضل طول الوقت بره من بعد صلاة الفجر ويرجع الصبح أو ينزل بلليل ويرجع بعد الفجر الفترة الأخيرة كان بيصلح الكمبيوتر عند واحد صاحبه زي ما قالنا وكان ده شغله إحنا قلنا الحمد لله إنشغل بحاجة رجع وقال لماما أنا حجزت محل والراجل حبني وقالي خده ببلاش وأصحابي كانوا معايا وقالوا لي هتشغلنا إيه معاك وكان مبسوط تاني يوم رجع قال أنا نزلت أتعرفت على الناس اللي حوالينا في الشارع إحنا كنا بشقة قبل اللي موجودين بيها حاليا بقالنا تقريبا 7 شهور ومالوش أصحاب بالمكان لكن ليه داخل المدينه أصحاب فرجع قال أنه اتعرف على ولاد جنبنا وقال لأختي وهي توأمه إن فيه عرسان كتير عيزنها وشفوها وقال لماما أنا هجوزلك بناتك بس الصبر وإنه هيجيب فيديو لكل واحد علشان تشوفو طبعا احنا قلنا ده اتجنن ولا إيه وأخدنا الكلام على أنه عادي بس طول الوقت عارفين إن فيه مشكلة من يوم الجمعة 24/6/2011 نزل الساعة 12 بلليل على صوت جيرانا واحدة بتصرخ نزل وقال هشوف فيه إيه نزل ومارجعش إلا على الفجر وكان جايب من صيدلية تحت العمارة فاتح شهية نوعين مختلفين وقال لأختي إنه حلو والصيدلي قاله يأخد الاثنين هو كان خاسس جدا لأنه بدأ يرفض أكل اللحم وأن ده حرام إننا بنذبحهم...
المهم يوم السبت نزل طول اليوم ومارجعش وقال إنه عند صاحبه بيصلح الكمبيوتر لما رجع قال إنه اتخانق معاه وسابله الكمبيوتر ومشي تاني يوم الأحد كان نزل من الفجر يصلي ولما صحينا الساعة 7 مكانش موجود بابا اتصل عليه موبايله مقفول أهلي نزلوا الشغل وأنا رحت امتحاني وأختي كانت نايمة ماما كانت قلقانة عليه اتصلت بأختي على 10 وقالتلها أخوكي جه قالتلها معرفش هقوم أشوفه مالقتهوش المهم فضلت تبص من الشباك وفجأة لقيت حد بيزق الشباك إحنا بالدور الرابع وفيه دور فوقينا هو طلة قال للناس مفيش حد في البيت افتحولي السطح أقعد لحد مايوصلوا فتحولوا وقعد فوق لاقى حبل ربطه في حديد ينزل على شباك في الصالة أختي كانت واقفة ولاقت رجل حد بيكسر الشباك بدأت تصرخ بهيستريا وتحاول تفتح الباب كان مقفول بعد كده نزل ودخل وقالها افتكرتوني مت.
بدأت تعيط وقالتله حرام عليك أنا كنت هموت قالها علشان ماتخفيش بعد كده وبدأ يقولها أنا نمت في الجامع وكان جاي بفردة شبشب واحدة وشكله مبهدل ومترب وقالها لما صحيت لقيتهم بيصلوا على واحد قمت فتحت التابوت وصحيته والناس بقت فرحانة بيا وقولتلهم مفيش موت بعد النهاردة وأنه المهدي المنتظر وقالها رحت عند شقتنا القديمة وخبط على الجيران الساعة 5 الصبح محدش فتحلي خايفين مني وقالها لو قلتي لحد على الكلام ده هختفي ومحدش هيشوفني تاني أنا ميت ومختفي ومحدش بيشوفني غير لما بقول سلام عليكم هي كانت منهارة بابا رجع بيقول سلام عليكم أخوي قاله متكالمنيش ودخل وقفل باب أوضته قبلها بيوم كان بيقول لأختي إن ده مش بابا ده شيطان بعد شوية صاحب جه وجايب فردة شبشب وقال إنه مش طبيعي وبيعمل حاجات غريبة راح عنده لابس 6 جواكت ومعاه دفتر البنك وكارنيه الشغل القديم بتاعه.
بابا خبط عليه وقاله صاحبك هنا فتح الباب قال لصاحبه إنت تدخل وهو لأ على والدي وقفل الباب في وشه أختي كانت في أوضتها سمعت خبط خرجت لاقت أخويا عاوز يضرب بابا وصاحبه بيحوش وبيقول لبابا أخرج بره قالتله إلا بابا إنت اللي تخرج فسكت وفتح الباب ونزل جاري على الشارع حافي وقال مش راجع تاني بابا إده لصاحبه كوتشي ونزل وراه ركب عربية صاحبه ركب معاه فتح باب العربية وزق صاحبه وقال للسواق إطلع وعالي الكاسيت صاحبه أخذ تاكسي وراه نزل عند مسجد كبير عندنا السواق قاله الأجرة رماله الجاكيت بتاعه وقاله ديه أجرتك بابا وصاحبه كانوا وراه دفعوا للسواق وأخذه الجاكيت دخل المسجد قعد على جنب وأخد مصحف وقعد يقرأ فيه وشوية وقام وهو ماسك المصحف زق المنبر وطلع عليه ومسك حامل المصحف وحط عليه المصحف فوق ونزل بابا استعان بناس من المسجد علشان يساعدوه قالوا لو أن ديه حالة نفسية وفيه شاب زيه من أسبوع كان بيقول إنه المهد المنتظر ونصحنا بدكتور نفساني بابا وصاحبه حاولوا يخدوه مارديش اتصل بعمي جه وخرج معاه وبدأ يقولوا إن كان فيه ميتين كتير لما التبوت اتفتح وهو صحاهم عمي.
بدأ يسايرو ويقولوا أنا مصدقك وأنت عندك علم كتير واديني منه فبدأ يثق في عمي ورجع معاها لما رجع فضل يقول ده مش بابا ده شيطان بابا كان بياخدني من إيدي ويلعب معايا وأنا صغير ويقول لماما أنت لو كنتي موجودة مكنش ده حصل إنت ملاك كنتي هتأخديني في حضنك الشياطين هتبعد عني ودخل أخد دش قعد ساعة وكلما حد يخبط عليه يزعق بعد ما خرج قال أنا حلقت دقني كانت مخوفه الناس وهو معندوش دقن طبعا إحنا اتصدمنا مكنش حد متوقع عمي قالنا خلوه ينام ولازم دكتور نفساني بقينا دوريات حد ينام التاني يصحى علشان ماينزلش ولا يعمل حاجة في نفسه تاني يوم صحيت لقيته بيتفرج على التليفزيون ولابس سألته إنت نازل ولا هتنزل قالي لأ عادي بس هنزل، ماما قالتله تأكل قالها لأ هكبر وأبقى مارد لو أكلت الناس هتخاف مني، قولتله لو ما أكلتش هتبقى ضعيف.... فأكل وقال لماما إنت لو جبتي سيرة الشغل تاني هختفي ومش هتشوفيني تاني وهجيبلك واحد شبهي يقعد مايعملش حاجة.
بعدها دخل الحمام فضل ساعة بعد ما خرج دخل أوضته بابا لما رجع خبط عليه قاله تعالى أقعد معانا قال شوية ونازل هبقى أقعد معاك وقفل الباب خالي جه خبط عليه وقال أنا جيت أقعد معاك قال أنا نازل قال هاجي معاك قال تنزل معايا كده دقنك طويلة وريحك وحشة الحسين ماينزلش كده ومسك برفان وغرقه بيه وكان لابس طقم أسود كلاسيك وكرافته وقبل ما ينزل سلم علينا وباسنا وقال أنا هختفي ومش هرجع ونزل ركبوا تاكسي وراح عند الجامع ونزل قال فين المشرحة اللي هنا خالي بدأ يهديه خربشه في وشه وقلع القميص ورماه في الأرض ورماه حاجته وجري على الجامع وعمل نفس اللي عامله اليوم اللي قبله خالي كلم بابا وهو منهار وقال يجي وبابا كلم أصحابه يحصلوه لما راح ولاقاه كده راح لدكتور نفساني يقول يعمل إيه علشان يجيبوا يتعالج الدكتور قال إنه ذهان حاد ولازم يروح المستشفى وإده لبابا جواب يروح بيه قالوا له إنه هيروح يشوف الشيخ محمد حسان فراح معاهم ودخلوا المستشفى يوم الأحد في المستشفى قالوا ده اضطراب عصبي والدكتور بيقول ذهان حاد وفي خلال 10 أيام هيخف وبعد كده قالوا اضطراب وجداني وبيدلوا مهدأة وبينام وهيدلوا جلسات كهرباء خفيفة أنا قرأت إن جلسات الكهرباء ديه آخر حاجة بيلجأ إليها الدكتور ده صح! وهل يخف في 10 أيام ولا هيستمر معاه بعد ولو غيرنا الشقة اللي إحنا فيها ده يساعده لما يخرج ولا لأ ويعمله مشاكل وكمان عرفنا إنه أخد في خلال 3 أيام فاتح الشاهية ومهضم الزجاجتين كاملين وأسمائهم "DIGENORM , DIGESTIN " هل ده سبب في زيادة الحالة لأني قريت إن ممكن يعمل مشاكل بالعصاب لو زادت جرعة الدواء أرجو المساعدة ولكم جزيل الشكر.
30/06/2011
رد المستشار
الأخت الكريمة، السلام عليكم ورحمة الله، وحياكم الله، أهلاً بكم على شبكتنا، ونشكر لك تواصلك وثقتك بنا...
وأعانك الله على كل ما مر، من ما حصل مع أخيكِ من ظروف صعبة، ويبدو أنه كان أمراً ضاغطاً عليكم كأسرة لأنكم أيضاً واجهتم صعوبة كبيرة قبل ذهاب أخيكِ للمستشفى، وكم يبدو أنه كان قرارا صعبا أن تتوجهوا إلى الطب النفسي، ولكن أختي الكريمة، كان هذا هو الحل الحكيم، والرأي الصواب والصحيح، فمهما كان التشخيص "ذهان حاد" أو "اضطرابات وجدانية" فكلها تابعة لمحور واحد من الاضطراب الذي يستدعي بدايةً دخول مستشفى للإشراف علاجياً على الحالة، ومن ثم إعطاء الأدوية الموصوفة التي من الواجب أن يستمر عليها الشخص لمتابعة التحسن، ومنع الانتكاس، أما عن العلاجات الأخرى أو جلسات الكهرباء، فكل ما أقوله أختي أن تحاولي رؤية الأمور بواقعية، فمهما كان العلاج الذي يوصف لأخيكِ، مقابل كل ما حصل منه، سواء من كلام ، أو تصرفات وادعاء أنه المهدي، وكل ذلك، فهل ترين أن المعالجات أصعب من الاضطراب؟
ومن ثم أختي الكريمة لاحظي أن المعالجين هم أطباء سيكونون أكثر قدرة على التعامل والعلاج المناسب، فلا ترهقي نفسك بالتفكير والمخاوف، حيث انه إذا لم يتعالج ستسوء الأمور أكثر لا سمح الله، وأختنا الفاضلة أخوك بحاجة للمعالجة من الداخل، أما عن تغيير المكان والشقة، فلا داعي لذلك، لكن سيكون من الضروري أن يتم متابعة أخوكِ بعملية تأهيل نفسي، وذلك لأهمية التأهيل النفسي لمثل حالة أخيك، كما أنصحك بقراءة كتاب الدكتور عادل صادق –يرحمه الله- "في بيتنا مريض نفسي" لتتعرفي أكثر على دوركم كأسرة للتعامل مع حالة أخيك، وكيف تقدمون الدعم بالشكل المناسب، أما بالنسبة للأدوية فأترك المجال لأستاذنا الدكتور وائل أبو هندي حيث أن ذلك من اختصاصه هو، وفقنا الله لما يحب ويرضى، ورزقنا من خير العلم والعمل، ولا تترددي أختنا في السؤال والمتابعة، ولكم جزيل الشكر على التواصل.
* ويضيف د. وائل أبو هندي الأخت الفاضلة أهلا وسهلا بك، ليست لدي إضافة إلا أن أطمئنك بالنسبة للعقاقير المذكورة فهي لا تضر الحالة وكذلك أتفق مع الرأي بأن جلسات الكهرباء واحدة من أنجع طرق العلاج في الطب النفسي وأكثرها إحداثا للاستجابة العلاجية... شفا الله أخاك وعافاه وأهلا وسهلا بك دائما على مجانين...
تعليقات الأعضاء