السلام عليكم،
أنا بنت مولودة في مصر وعندي حاليا 23 سنة، أبويا دكتور معروف ويعتبر مستوانا الاجتماعي كويس، درست في مدرسة خاصة والجامعة كانت خاصة، فيعتبر أهلي صرفوا عليه أنا وأخواتي كويس، مبخلوش علينا في التعليم، بس من وإحنا صغيرين كان في مشاكل في البيت كتير كانت بتوصل للضرب وكنا بنشوف ده بعنينا.
أنا أكتر واحدة في أخواتي شوفت الضرب بجد وكنت في مواقف لوحدي تماما، أنا فاكره إن وأنا في الثانوية العامة بابا ضرب ماما جامد جدا لدرجة إني سديت وداني وفتحت باب الشقة وجريت، ده بس اللي خلاهم يبطلوا ضرب، خلصت أنا وأختي جامعة، هي أكبر مني، كان دائما يقول إن الدراسات العليا دي أحسن حاجة كده بس أختي مكنتش حابة تكمل أو تسافر بره مصر وده لأنها كانت بتحب واحد معاها في الكلية، فقررت تشتغل في مصر بس بابا كان بيجبرها تشتغل معاه ولو مسمعتشي الكلام كان يقطع المصروف ويسحب العربية.
كان هو ده دائما أسلوبه في التعامل اللي ميسمعشي كلامه، فضطرت أختي تشتغل معاه، جيت أنا أتخرجت بس أنا أصلا كنت مجربة الشغل معاه وكان بيجيلي اكتئاب جامد جدا، فقررت مشتغلش معاه بس مكنش هيديلي فرصة أو مكنش هيسعدني أشتغل في مكان تاني فكان أنسب حاجة إني أسافر فكده أكون بعدت عن المشاكل وفي نفس الوقت عملت اللي هو عايزه فميقطعشي عني الفلوس.
سفرت للدراسات العليا وهنا قبلت واحد صاحبه كنت أنا أصلا عرفاه من قبل السفر بتلات سنين وكنت برتاح جدا لما أتكلم معاه في التليفون. بعد أول شهر أقعده لوحدي هنا حسيت فعلا إني بحب صاحب أبويا وكنت بحاول أقوله ده بطرق غير مباشرة مع العلم إنه أكبر مني بحوالي 18 سنة ومش مصري ومتزوج من جنسية تانية ومخلف، المهم بعد أول شهر مقابلات وخروجات معاه ومع أهله، في يوم أتفتح الموضوع وعرف إني بحبه وهو كان بيتكلم عموما إن الزوجة الثانية في البلد دي ضد القانون، وده كله مقليش إنه بيبحبني المهم سفرت أنا لمكان الدراسة وفي يوم اتخنقنا فيه وقررت مكلموش فاتصل هو وقالي إنه بيحبني.
وبعد شهر من سفري جالي البيت وابتدت علاقة أنا عمري ما تخيلت إني أكون فيها في يوم من الأيام، وده لأننا نعتبر أتربينا كويس وكنت بصلي وبصوم ومحجبة وجمعات خاصة وأصحابي ولاد ناس كبار في مصر المهم حصلت علاقة جنسية غير كاملة في كل مرة بنتقابل كنت بحس إني زي بنات الليل.
بس هو كان يقولي إننا هنتجوز، جت فترة قلت لأمي إني هتجوزه وبحبه طبعا رفضت، وأهلي وأصحابي كلهم رفضوا وحاولوا يكرهوني فيه من كنت مانا كنت حاسة إني بغضب ربنا كنت ساعات بقولوا نتجوز وخلاص اللي يحصل يحصل. أنا أصلا قبل ما أسافر كان في مشكلة كبيرة في البيت وبابا جه وقعد معايا أنا وأمي وأختي وقالنا إنه اتجوز ومراته حامل والوقت ده أختي كانت بتزعق فيه جامد لدرجة إنه كان هيضربها فماما ضربت نفسها بالفازة وأغمى عليها ورأسها اتفتحت، ده كله عشان كان هيضرب أختي في الحقيقة إحنا كان بقى لنا شهور شكين إنه متجوز وأنا عرفت بالصدفة إن مراته حامل بس مرضتشي أقول ليهم لعل وعسى يصلح الموضوع، بس هو لما ادبس بقى جه يقولنا المهم اليوم ده أنا كنت هديت إلى حد ما وقلتله إني هتجوز واحد متجوز وهخرب بيوت الناس زي ما الست دي عملت.
قال لي مادام مقتنعة بكده خلاص المهم أنا دلوقتي بقالي حوالي سنة برة مصر نزلت مرات قليلة أوي، دلوقتي أبويا برة البيت وأمي لسة بتحبه ومش عايزة طلاق، هو بيهدد إنه مش هيصرف على تعليم أخويا لو أخويا معملشي اللي هو عايزه أنا أصلا من كتر ما أنا حاسة بالذنب تجاه مرات حبيبي ده واللي هي أصلا كانت بتتصل بي وبتحكيلي حاجات شخصية عنها وعنه قررت أنا أقولها إني بحبه عشان مبقاش بخونها، فقلتلها إني بحبه بس طبعا مقولتش إن في أي علاقة مبينا ومقولتش إنه بيحبني هو بقى من الناحية التانية عارف كل حاجة بس مقلهاش أي حاجة.
وأنا قربت أخلص دراستي وخلاص هرجع، بقولوا يشوف أي طريقة أفضل بيها هنا يقعد يقول لازم نقول لبابا إيه الخطوات اللي أنا عايزة أعملها في الدراسة ولو وافق هو هيساعدني إني أفضل هنا المشكلة إنه مبقاش مهتم زي زمان بقى يقولي إني عملت مشاكل كتير وبحكي عن الموضوع مع ناس كتير قولتله أنا مش حاسة بالعار إني بحب واحد متجوز.
وأنا عندي القدرة إني أقول لناس كتير وحتى قلت لمراته هو اللي مش جري هو دايما يقول إن ابنه من أولوياته وأهم من كل حاجة وإنه بس متجوز أم ابنه عشان ابنه مايعشي بين أهل منفصلين المشكلة دلوقتي إني مش عارفة أتعامل معاه إزاي وكل ما السفر يقرب بيتحايل أكتر في موضوع الجواز أنا أصلا حاسة بحاجة جنسية كبيرة جدا وبقيت أعمل بده لوحدي بس بعديها أقعد أعيط أنا عارفة إني أقول لمراته ده حاجة كانت هتضايقه ومع ذلك قلت أنا مش عارفة هل أنا بنتقم منه لأنه صورة من أبويا ولا أنا فعلا بحبه أنا عارفة إني مفتقدة الحنان وبالذات مع الغربة بس أنا حاسة أي بقيت أتغاظ وبغير من أي 2 متجوزين ومبسوطين
حاسة كمان إن أفكاري كانت طفولية أوي وإنه أثار في الرغبات الجنسية بدري أو في غير وقتها أو في نطاق غير شرعي وفي نفس الوقت الرغبة موجودة على الرغم من كبر سنه إلا أني حاسة إني مش هتبسط إلا معاه بس فجأة حسيته بيتهرب مني أو ما أعرفشي بس حاسة إنه بيفكر أكتر من الأول هو أصلا كتوم جدا بس هو وقف جنبي معنويا في مواقف كتير أنا عارفة إني مش هكون سعيدة معاه بس نتجوز حتي أسبوع ونطلق عشان تعذيب الضمير وهو كده كده مش بيحب مراته فمش فارقة لو طلقها عشان نتجوز هل أنا مريضة نفسيا هل أنا خطر على الناس؟
11/08/2011
رد المستشار
أترك رسالتك يا صديقتي أمام كل رجل يضرب زوجته، وأمام رسائل غير مباشرة تطلق في جو الأسرة مثل "اكسر للبنت ضلع يطلع لها أربع وعشرين.." ولن أنسى في حياتي منطق رجل يضرب زوجته حين قال أمامي مدافعا عن نفسه.. "إنها كانت تضرب في بيت أبيها..إنها اللغة الوحيدة التي تفهمها..!!"يا رجال، رفقا بالقوارير، كانت آخر كلمات الرسول عليه الصلاة والسلام في حجة الوداع.
هل يسبب العنف الأسري المشكلة التي نراها الآن؟؟ بالطبع نعم.. وعشرة مرات وألفا نعم.
يغلب على تلك الرسالة طابع التردد وعدم الأمان وعدم القدرة على المواجهة، ورؤيتها أنها غير جديرة بالحب وأنها يجب أن تدفع من جسدها ثمنا لقاء كلمة حانية أو حضن يشعرها بالأمان، هل هي صدفة أن تقع فريسة لصديق والده، لشخص يكبرها ب 18 عام؟؟ أم أن هذا يتفق مع الصورة العامة لفتاة صغيرة تبحث عن التقبل والحب وكلمات الإطراء من والدها أو حتى من (بديل) عنه، كان لابد أن يأخذ ثمن، وأي شيء في هذه الدنيا بلا مقابل؟؟
ومن المؤلم أيضا كلماتك عن كونك من أسرة طيبة وتلقيت تعليما غاليا في أفخر المدارس والجامعات، من قال لك يا سيدتي أن الأموال مهما كانت كثرتها تغني عن الحب؟ عن سعادة الفتاه الصغيرة وأول رجل في حياتها (والدها) يخبرها كم هي جميلة، كم هي محبوبة، كم أن الدنيا تضيئها ابتسامتها.. كم من الرجال يعتقد أن مسئوليته فقط عن أسرته هي الأكل والشرب؟؟ "عن عبد الله ابن عَمْرٍو قَالَ قَالَ رَسُولُ اللَّهِ -صلى الله عليه وسلم- «كَفَى بِالْمَرْءِ إِثْمًا أَنْ يُضَيِّعَ مَنْ يعول» رواه أحمد وأبو داود
لست خطرا على الآخرين يا صغيرتي بل أكثر خطرك على نفسك، هل تستطيعين أن تقفي مع نفسك وقفة صادقة وتقولين لنفسك "كفى إيذاء لي، إني أستأهل ما هو أفضل من ذلك؟؟" أي علاقة يا صغيرتي قوامها جنسي، أي أنه إن لم يكن الجانب الجنسي موجودا فلا توجد علاقة، أو هي ليست علاقة صحية، ومصيرها الانتهاء طال الوقت أم قصر، أحبي نفسك قليلا وسامحيها على ما مضى، ما أذنبت فيه وما حدث معك وكنت ضحية له، اغضبي وقولي لنفسك أنك تستحقين رجلا تفتخرين به، وتمشين جواره أمام كل الناس، تحملين أطفاله وتحترمين وجوده في حياتك،، رجلا إن كان لن يعطيك السعادة فعلى الأقل لن يسبب لك هذا الألم.
والسلام.
التعليق: بجد رعلانة علشانك لكن عايزة أقول لك على حاجة إنك زي ما ذكرت تعلمت تعليما كويس وأصحابك من أسر محترمة والمستوى المادى ليكوا كويس معنى كدة أن فرصة إنك تكوني شخصية كويسة ومحترمة (وأنت بالطبع محترمة) ويكون مستقبلك جميل فرصة كبيرة جدا مش بتتوفر لناس كتير
فنصيحة من أخت لك أنك تحاولي تنسي كل اللي حصل لك في الماضي والحاضر كمان وتفتكري سارة وبس وتحبيها كمان
وأنا واثقة إن ربنا هيرزقك شاب صالح وخلوق ويعوضك عن كل اللي مريت بيه........ ونصيحة مني كمان أنك تنزلي مصر في أقرب فرصة متاحة لك وتنسي صديق بباكي واعتبريها مرحلة وعدت وقربى من ربنا اكتر وثقى ان ربنا بيحنك اكتر من نفسك وهيسهلك طريقك لو انتى فعلا عايزة تكونى شخصية كويسة..........وأتمنى لك من كل قلبي حياة سعيدة