|
| 
|
سامحني
أنا عارفة أنه مينفعش أبعت هنا بس أنا مش ضامنة إن بكرة أبعت رسالتي وتوصل ومعرفش إن كنت هبقى مبسوطة ولا زعلانة. يوم الخميس اللي فات كنت مبسوطة فمبعتش حاجة ومفكرتش أحاول أكتب
دكتور متزعلش مني لأني هكتب في المكان دا بس عندي شوية حاجات مهمة عايزة أسألك عنها وبالله عليك جاوبني ممكن؟
أنا بكره التخن وبحاول متخنش ورغم كدا بتجيلي نوبات فجع في الأكل وبعد ما آكل أبقى عايزة أعيط، المهم إني باخد جلوكوفاج500 بعد الأكل لو اتفجعت طبعا غير كدا أنا مظبطة أكلي الحمد لله، لو أخدت أكتر من حبيتين في اليوم بتعب جدا. المهم أني من يومين أخدت 3 حبات بعد الأكل أنا عارفة أنه غلط أنا متعودة ساعات آخذ 2 وعارفة أنه غلط كبير آخذ3 حبات، المهم أن الحباية التالتة أخدتها بعد الحبيتين بنص ساعة وأنا باخد الحباية كنت حاسة ان مش مركزة دماغي شبه تايهه، بعدها خفت جدا لأني عارفة الآثار الجانبية المهم إن الصبح جاء لي هبوط وربنا ستر ومعرفش إزاي قمت وأخدت مايه بسكر وشيكولاتة.
لما صحيت لقيت نفسي مش قادرة أتنفس وشبه مشلولة ومش قادرة حتى أفتح بقي، أنا كنت بموت بس حاولت أقاوم وبدأت أنادي على بنتي صوتي مكنش طالع وبعدين قعدت أقول يا رب لحد ما قمت، كنت حاسة حد مكتفني ومش بيخليني حتى قادرة أتنفس، لما قمت قلبي كان بيوجعني جدا ونفسي مكتوم.... دكتور دا كان حلم ولا حقيقة؟ التكتيف والشلل ومش قادرة أتنفس حلم؟
قبل كدا صحيت من النوم مش قادرة أفتح عيني كلها شفت جوزي معدي ناديت عليه صوتي مكنش طالع، حسيت حد مكتفني وأعصاب وشي مشدودة قرأت قرآن في سري لحد ما فكيت، رحت مناديه على جوزي بصوت عالي فرد علي وقعدت أعيط وقلت له ينام جنبي ومينمش في أوضته ونام جنبي يوميها.
التكتيف دا كان حلم؟ ولا بجد؟ وازاي قدرت أشوف جوزي وهو رايح المطبخ فعلا ولا دا حلم مع حقيقة.
سؤال تاني في حاجة اسمها صرع عرضي؟
جاءت لي مرتين بعد الولادة قبل ما اصحى من البنج فالدكتورة قالت لماما أنه صرع عرضي. أنا باخد جرعة زيادة في البنج مبنمش بسهولة وإن نمت بصحى في وسط العملية لدرجة أن دكتور البنج افتكرني بشرب حاجة بس أنا اكدت له أني مبشربش حتى سجاير ولا جوزي ولا أخواتي ولا بابا الحمدلله.
دكتور وائل ممكن متطنشنيش أرجوك أنا عارفة إنه غلط بس أنا خايفة استنى لبكرة وأكتب الرسالة ومتوصلش كالعادة وأضطر أكتب هنا، أنا هنزل مصر إن شاء الله في مارس ربنا يصبرني لحد ما أنزل.
أرجو عدم الضيق مني والرد عليّ لأني هفضل متوترة لحد ما ترد
ملحوظة: أنا صاحبة تشخيص اضطراب الشخصية الحدية
تحرشات جنسية وصور انتحارية وسمات حدية!
5/12/2012
رد المستشار
استشارة نفسية علاجية Psychotherapeutic Consultation
نظرة عامة Overview : متابعة لسيدة راسلت الموقع سابقاً ومصابة باضطراب الشخصية الحدية.
التوصيات Recommendations :
٠ شكراً على استعمالك الموقع متمنياً لك الصحة والسعادة.
٠ ما تطرقت إليه في رسالتك يشير إلى اضطرابات انفصالية برمتها، وليس هناك دليل على أنك مصابة بالصرع.
٠ هذه الأعراض الانفصالية تعني أن الإنسان ينفصل عن المحيط الذي يعيش فيه ويفقد التواصل مع البيئة ومع المقربين منه بين الحين والآخر. أسباب هذه الحالة الحميدة هي الشعور بالقلق والاكتئاب مع فقدان السيطرة على التحكم بهذه العواطف. من جراء ذلك يحدث الانفصال ويريح الإنسان من عواطف لا يتحملها.
٠ تميل الأعراض الانفصالية إلى التحسن في الكثير من المصابين باضطراب الشخصية الحدية مع الوقت. المشكلة تكمن في تشخيصهم باضطراب الصرع أحياناً وهم غير مصابين به.
٠ نصيحتي لك بمراجعة طبيب نفساني بأسرع وقت ممكن وليس هناك ما يمنع شفائك من هذا الاضطراب قريباً.
٠ وقفك الله.
ويتبع>>>>>: الفستان، تحرشات جنسية وصور انتحارية وسمات حدية! م2
تعليقات الأعضاء