أحلام اليقظة والانفصال

توتر وقلق وعدم ثقة وأحلام يقظة 

السلام عليكم ورحمة الله وبركاته؛ منذ عام تقريبا حدثت مشاكل في الأسرة بين أبي وأمي وأول مرة كانت أمي تسيب البيت، وأول مرة أشوف بابا بيكلم عن ماما بأسلوب مش كويس وأول مرة أكتشف أن بابا بيكدب علينا، حسيت فجأة إن المعايير كلها تغيرت بقيت زعلانة جدا لأن كل كل حاجة اتربيت عليها اتغيرت، أنا بحب بابا جدا، بس بعد ما حصل كل ده بقيت مش بصدقه ومش بثق فيه ولا بثق في حد بقيت مش عايزة أشوفه وفي نفس الوقت نفسي يرجع زي الأول.

المشكلة إن بابا وماما مش بيقبلو إن حد يقول لهم أنهم غلطو في حاجة وهم دايما صح، بيكون نفسي في أوقات حد يحس بي ويهتم بي وبخاف جدا إن في مرة أصاحب ولد بس أنا ضد الموضوع ده خالص، بس في أوقات بحس إني عايزة أحكي لحد ومش بلاقي حد أكلمه. وبسبب موضوع الاهتمام ده دايما أحلام اليقظة مسيطرة علي إن في حد بيكلمني ويسأل علي أو مثلا حصلتلي حادثة والكل جه يسأل علي، وأنا الحمد لله متفوقة في دراستي بس الموضوع ده بدأ يأثر على دراستي، نفسي أفكر في أي حاجة تانية.

أنا بحب أعمل أعمال فنية وممكن تبهر إخواتي بس في نفس الوقت بكون عايزة أسمع آراء ثانية،
أنا عايزة أحول طريقة تفكيري وتكون أكثر إيجابية وأتخلص من أحلام اليقظة، أرجو المساعدة
24/01/2013