أمهات جاهلات

رد المستشار

 أقولك إيه بس؟، ماما طبعا غلطانة، وأكيد بتتصرف كده عشان فاهمة إن كده الأحسن والصح، حبيبتي أنتِ بقى عندك 16 سنة، يعني لازم تقدري تتعاملي مع مشاكلك، خلينا نتكلم بصراحة، أنت معندكيش ثقة في نفسك؛ لأن من وأنت صغيرة محدش شجعك، ولا قالك هايلة وبرافو على حاجة، وده لما بيحصل بيأثر على الثقة بالنفس أوي، لكن هتفضلي كده لحد ما تتجنني وتعملي حاجة تخليكي تقابلي ربنا كافرة؟، ولا تجمدي عشان تبقي أحسن وتخلي مستقبلك جميل؟

هو وانتي عالفيس مش بتبقي عارفة تتكلمي كويس؟، ولما بتجيلك أحلام اليقظة بتحلمي بحاجات كتيرة بتقدري عليها؟، أنا عاوزاكي بالتدريج خالص خالص مش مرة واحدة تبدئي تنفذي الاحلام دي في الواقع، وكمان تحطي بينك وبين نفسك خطوات عشان تثقي في نفسك وتعتمدي عليها، مثلا لو هتشتري حاجة الأول اعرفي انتي محتاجة لإيه بالظبط لو هدوم مثلًا...

عاوزة تشتري بلوزة زرقة طويلة فيها ابيض، أو سادة، تنزلي تجيبيها كده مهما شفت، ومها لقيتي ألوان تانية، عاوزة تعملي مشوار، تسألي المكان ده نروحله ازاي ونركب ايه، واحسن وقت للنزول امتى وتتوكلي على الله لوحدك، ادخلي في فريق رياضي زي الباسكت مثلًا واستمري فيه، وواحدة واحدة تفكري نفسك بحاجات انتي فعلا نجحتي فيها لوحدك، وكل ماما ما تشوفك عرفتي تعملي حاجات لوحدك هتغير طريقتها معاكي، حتى لو في الأول قالتلك لاء، قوليلها هجرب وصممي، والي كان بيحصل معاكي زمان من تجريح وتعوير ده بسبب انك حاسة من جواكي انك مذنبة وتستاهلي العقاب وده عشان بتفكري بطريقة مش مظبوطة، أو عشان تحسي بالألم بدل ما هو يبقى مكتوم جوه فبتطلعيه لبره طب ده كلام؟

أنت أهم واحدة في أنك توضبي نفسك وتحددي ملامحك اللي عاوزاها لنفسك، ولو فيه شخصية بتحبيها حاولي تعرفي ماذا تحبين فيها واتعرفي هي بتعمل ده ازاي واعملي شبهها ده هيساعدك، وهسيبلك لينكات بتتكلم عن الثقة بالنفس، والهبل الي كنتي بتعمليه في نفسك عشان تفهمي اكتر، وابقي ابعتيلنا اخبارك عشان نعرف تطورك ونساعدك كمان وكمان.يلا شدي حيلك.

المستشار: أ. أميرة بدران