|
| 
|
الوسواس الاجتراري 77000 × 77 ألف احتمال! م
اتسعت الدائرة
السلام عليكم ورحمة الله وبركاته؛
ذهبت إلى عيادة دكتور وائل أبو هندي، وحضرت جلستين، وواظبت على العلاج لمدة كبيرة، لكن للأسف انقطعت عن العلاج بسبب عدم قدرتي على تحمل النفقات، دخلي المادي لا يتحمل حضور جلسة أسبوعيا أو حتى جلستين أسبوعيا... لكني استمريت في تناول العلاج دون فائدة، بل إن الأمر زاد واتسع، أصبحت لا أفكر كثيرا في المشكلة نفسها وهي شكي في كوني مسحت الفيديو أم لا؟؟؟؟ وهل رآه الفني الذي يصلح الموبايل أم لا؟؟؟
الأمر اتسع أكثر من ذلك، أصبحت لدي مشكلة لا تفارقني، وهي مشكلة نظر الناس إلي والتحديق في وجهي، كلما نظر شخص في وجهي سواء حدث هذا في الشارع أو في المواصلات أو في العمل أو في أي مكان ينتابني شعور بالرعب وأبدأ في تحليل الموقف، هي النظرة دي عادية؟؟؟ طيب مش يمكن الراجل ده شاف الفيديو واتعرف عليّ؟؟؟ طيب اشمعنا هو اللي شاف الفيديو وأنا لأ مثلا أو أصحابي ما كلنا بنقعد على النت؟؟؟ طيب مش يمكن بيبص لي عشان قريب من سكني وبيشبه علي؟؟؟ طيب ماهو فلان بص علي امبارح ومش قريب من سكني ولا حاجة؟؟؟ وفلان اللي ساكن جنب محل الموبايلات ده مش يمكن يكون الراجل أطلعه على الفيديو وهو بيصلح الموبايل؟؟؟ أيوه بس في ناس تانية بتنظر إلى وجهي ومش بيكونوا ساكنين جنب محل الموبايلات...
أكون قاعد في البلكونة مثلا وألاقي حد ماشي في الشارع وأنا بلكونتي في الدور الأرضي يقوم الراجل يبص على البلكونة ويبص علي ويبص في عيناي يركبني 100 عفريت... هي صدفة إن حد يبص علي كده؟؟؟؟ وكمان جاي لحد البيت يبص علي وأنا في البلكونة؟؟؟؟ في اليوم ده أنا ممكن لا آكل ولا أشرب ولا أنام وأفضل أفكر في الموضوع وأسأل نفسي إزاي كلهم عرفوا وشافوا الفيديو واتعرفوا علي وأنا معرفش؟؟؟ اشمعنا هما اللي شافوا الفيديو؟؟؟ شافوه على النت؟؟؟؟ طيب ما أنا وأصحابي وأهلي بنقعد على النت ليه مش شوفنا الفيديو؟؟؟ ودلوقتي هما بيتكلموا علي بقى؟؟؟
يا نهار أسود لو سمعت اتنين بيتكلموا مع بعض وفي نص الكلام سمعت اسمي أو كلمة قريبة من اسمي... بقعد أتصنت على الناس حتى زمايلي لو سمعت حد منهم بيقول لفظ قريب من اسمي... ساعات بروح أسألهم إنتوا بتنادوا علي؟؟؟ طيب بتقولوا إيه؟؟؟
أنا بجد أصبحت مش عارف هل ده طبيعي؟؟ طبيعي إن الناس تبص على وشي في كل مكان حتى وأنا قاعد في البلكونة؟؟؟؟ وأنا ماشي في الشارع؟؟؟ وأنا راكب مواصلات؟؟؟ يا سلام بقى لو واحد وأنا في الشارع أو البلكونة بص علي ودور وشه وبعدين رجع بص علي تاني، يبقى يوم أسود، هو رجع بص عليا تاني ليه؟؟؟ طب المرة الأولى عادي إنما التانية دي مش دليل إنه عرفني؟؟؟ طيب مش يبقى عرفني من الفيديو برضو؟؟؟ يا نهار أسود هي الناس كلها عارفاني؟؟؟ كلهم شافوا الفيديو على النت؟؟؟ اشمعنا أنا وأصحابي مش شوفنا الفيديو ده؟؟؟
أنا بجد يا جماعة على وشك الجنون وأطلب منك المساعدة
ممكن الرد يكون مفصل شوية؟؟؟ كل مرة بتردوا علي نفس الرد وهو أني محتاج علاج، ممكن تناقشوني في اللي أنا بقوله والاحتمالات اللي أنا بفكر فيها دي؟؟؟؟؟
آسف إني طولت عليكم، ربنا يبارك فيكم
سلام عليكم
28/11/2013
رد المستشار
أهلا وسهلا بك يا أستاذ "أحمد" إن من المؤسف أن يضطر المواطنون في بلادنا إلى تحمل نفقات العلاج الطبي وهو ما لا يحدث في أغلب بلاد الدنيا..... تستطيع بالتأكيد البحث عن خيارات علاج معرفي سلوكي أكثر مناسبة لك يا "أحمد"... وكذلك يمكنك اللجوء لأي من عيادات الطب النفسي الخارجية في أي من جامعاتنا.... المطلوب منك هو في جميع الأحوال واحد:
1- العلاج المثالي في بلادنا هو خلط العلاج العقاري بالعلاج المعرفي السلوكي، ويستلزم الأخير أن تكون متفتحا جريئا مستعدا لأن تكون فعالا في الخلاص من مرضك.
2- إن كان العلاج المعرفي السلوكي غير متاح أو كنت غير مستعد له فإن بإمكانك استخدام العلاج العقاري وحده... وينتظر حدوث تحسن كبير في حالتك ولكن عند جرعات أعلى من العقاقير (وأحسب أني وصفت لك الفافرين 100 مجم بعد العشاء).... هذه الجرعة كان يفترض أن تزيد لو أنك أخبرتني بأنك لن تتمكن من مواصلة العلاج... على كل زدها إلى 150 مجم بعد العشاء لستة أيام ثم ارفعها إلى 200 مجم بعد العشاء يوميا....
3- واصل قراءة ما قلناه لك سابقا أنا أو مستشارك السابق أ. عبد الرحيم الريفي، وتذكر أنك إن أنعم الله عليك بالتحسن باستخدام العقار وحده فإن عليك ألا توقفه ما استطعت....
4- لست على وشك الجنون بمعناه الذي تخشاه ولن تكون في أسوأ الأحوال ستبقى توسوس وقد تكتئب، وأخيرا نعتذر عن الرد على الاستفسارات التي لا تحمل أي جديد فلا تطالبنا بمزيد وتابعنا بالتطورات التي تبين أنك من ردودنا تستفيد.
ويتبع >>>>>>>: الوسواس الاجتراري 77000 × 77 ألف احتمال! م2
تعليقات الأعضاء