قايم الصبح من النوم على غير العادة.. منشرح.. نشيط مقبل على الحياة بشكل غير عادي.. خير اللهم اجعله خير.. فرصة.. في موجة الابتهاج المفاجئة دي.. أنزل جري ع المستشفى وبعدين.. أمر ع النقابة أسدد اشتراكاتي المتأخرة وبعدين أروح أغير زيت العربية وأشحمها بالمرة.. وبعدين ع العيادة دوغري..
ممممممم.. عايزين آخر الأسبوع ده نعمل ويك إند كويس.. زهقنا من راس البر ودوشتها..
إسكندرية مشوار وزحمة برضه، تيجى نروح الإسماعيلية، ولا بلطيم.. بيقولوا بقت حلوة أوي
ههههه.. على آخر الأسبوع إن شاءالله أكون استقريت أنا ومرفت على المكان.. طبعًا الواد أحمد والهانم أخته مش هيرضوا ييجوا معانا كالعادة.. مش مهم.. أنا ومرفت خلاص اتعودنا على كده..
وقفزت في خفة من على السرير علشان أدخل آخد الحمام بتاعي وبعدين أقعد أفطر وآخد رأي مرفت في مكان عطلة نهاية الأسبوع يمكن يكون عندها اقتراح عبقري ولا حاجة..
دخلت الحمام وأنا أدندن.. ياليلة العيد.. آنستينا.. وجددت الأمل فينا.. ياليلة العيد.. ترم.. ترم.. ترم..
وفتحت الدش الجميل.........
يامرفاااااااااااااات....... فين الميه........؟؟؟؟؟؟؟؟
-المية مقطوعة م الصبح ياعاطف.. مش كنت تسألني قبل ما تدخل الحمام......؟؟؟؟؟
معلش ياواد.. البانيو مليان ميه.. مافيهاش حاجة أوعي تخلي حاجة هايفة زي دي تعكر مزاجك الحلو ده..إديها كوز من البانيو واسترجع أيام زمان.. واديتها فعلاً بالكوز م البانيو وعدت أدندن يالليلة العيد.. آنستينا وجددت الأمل .. فينا يالليلة العيد..
شوية وشعرت أن أرضية الحمام بدأت تمتلئ بالمية والمية بتعلى في الأرض شوية.. شوية..
يانهار أغبر.. يامرفااااااااااات.. هي بلاعة الحمام مسدودة ولا إيه.....؟؟؟؟؟؟؟
-لأ يا عاطف.. دا ماسورة المجاري في الشارع ضاربة.. وسادِّين المجاري على كل عمارات الحي. ماتستعملش مية كتير عشان البلاعة مش هاتصرف المية
اللهم.. طولك.. ياروح.. هممممممم.....قولنا إيه ماتخليش حاجه هايفة زي دي تعكر المزاج العالي ده كفاية كده.. مش لازم تتليف مرتين ياواد، كفاية مرة واحدة.. ههههه.. وآدي فوطة...
يالليلة العيد آنستينا وجددت الأمل فينا يالليلة العيد...
مرفت.. ميموووووووو.. الشاي والفطار ياجميل..
-عشر دقايق بس ياعاطف.. أصل الكهربا قطعت دلوقت عن سخان الشاي وأشعال البوتوجاز برضه
-ولعيه بالكبريت ياحبيبتى..
-مانا بعت محمد البواب يجيب كبريت.. عشر دقايق، الجرنان عندك بص فيه على ما محمد يكون وصل
زي بعضه.. فكرة كويسة آدي الجرنان وآدي البلكونة
يالليلة العيد آنستـ...
-عاطف.. ياعاطف.. إنت فين...؟؟؟؟
-فيه أيه يامرفت..؟؟ ؟؟ مالك.....؟؟
-الواد محمد جاب الكبريت وبيقول لي بلغي الداكتور مايبقاش يركن العربية بعيد عن بوابة العمارة..
-ليه يامرفت....؟؟؟
-الرفرف الشمال.. إتحك.. والغماز.. إتكسر..
-بتقولى ايه....؟؟؟
-يظهر العربيات بتاعه معدات الغاز الطبيعى كانت راحه جايه بالليل...وانت عارف سواقين الحكومة
وهنا وجدت نفسي وقد عدت لطبيعتي اليومية وصحت بأعلى صوتي:
الله يخرب بيت الحكومة ع اللي عايزينها.. مية ونور ومجاري وعربية مخبوطة؟؟.. دا إيه العيشة اللي تغم دي...؟؟؟؟
-إيه ياعاطف..؟؟ وأنا ذنبي إيه..؟؟ بلاش عصبية وزعيق ع الصبح.. هي دي أول مره ولا إيه...؟؟؟
وقبل أن أسترسل في الرد.. دخلت ولبست هدومي وتوجهت لباب الشقة.. ودماغي شغالة ف العربية اللي هدوخ بيها عند السمكرية.. ويروح اليوم كله عليهم..
-استنى ياعاطف.. الشاي.. طب كل لك لقمة.. طب ماقلتلش.. هانروح فين آخر الأسبوع..؟؟
وهـنــــــــا تسمرت في مكاني ونظرت إلى مرفت وقلت لها والدخــــان طالع من وداني......
-هانروح السرايــــــا...........
-آه.. فندق السرايا.. ف اسكندرية.. عارفاه يجنن
-لأ ياحبيبتى.. فندق السرايا الصفراااااا ف العباسية عارفاه؟؟؟.... يجنن أكتر...
الله يخرب بيت العيش والعيشة واللي عايشينها.....
واقرأ أيضاً:
خلى بالك من عيال اليومين دول.. / دعاء واحد مصري مطحون / المسخر خانة.. الحلقة الأولى
تعليقات الأعضاء