المسخر خانة.. الحلقة الرابعة..

 المسخر خانة.. الحلقة الثالثة..  
 الشعب المصري.. عاطفي بطبعه.. والجانب الروحاني فيه له تأثير عظيم جدًا عليه.. والدليل على كده.. إن الشعب المصري كان أول الشعوب قديمًا نادت بالتوحيد من أيام أخناتون أول من نادى بالتوحيد في عصر القدماء المصريين.. والمصريين من أكثر الشعوب اهتمامًا بأولياء الله الصالحين.. ومن أكثر الشعوب حبًا لآل بيت النبي صلى الله عليه وسلم.. فكلنا نشهد تعلق المصريين بسيدنا الحسين رضي الله عنه والسيدة زينب والسيدة نفيسة.. وكلهم تشرفت مصر بثراهم.. وعلشان كده.. أي حد عايز يوصل لقلب المصريين ويعمل أي حاجة بعد كده بتكون أسهل وأقصر طريقة لقلبهم هو الدين.. فاكرين نابليون بونابرت.. بتاع الحملة الفرنسية.. لما غلب مع المقاومة المصرية أعلن إسلامه.. وكمان قائده ونائبه الجنرال مينو.. أعلن هو كمان إسلامه.. سمى نفسه عبد الله مينو وتزوج من مصرية مسلمة..
 
 وبعد ما الحملة اتهزأت واتبهدلت من المصريين والإنجليز.. وانسحبت الحملة الفرنسية من مصر.. رجع أبوك عند أخوك وعاد الحاج نابليون والحاج مينو.. يتسكعان في شوارع باريس.. ويشربان الشامبانيا في صحة طيبة المصريين..
 
 ومع أن التجارة بالدين من أكبر الكبائر عند الله سبحانه وتعالى.. إلا أنها ناجحة جدًا مع المصريين.. مثلاً.. خد عندك: محلات شارع الهرم اللي شغالة شبه كابريهات طول السنة، تيجي مع بداية رمضان.. وتقلب موائد الرحمن.. ويروح صاحبها معلق يافطة كبيرة: "ويطعمون الطعام على حبه مسكينًا ويتيمًا وأسيرًا" الآية. وفي المساء والسهرة تتقلب خيمة رمضانية تقدم فيها كل أنواع المشاريب مع الشيشة والمعسل والقص، والتفاح.. واللعب فيها ع المشاريب.. بس لازم صاحب الخيمة يكون معلق يافطة كبيرة: "وسقاهم ربهم شرابًا طهورًا" مع إن كل اللي بيحصل ملوش علاقة بالطهارة من أصله..
 
 وعلى الناحية الثانية من الخيمة تلاقي محل جزارة كاتب على واجهة المحل: {وفديناه بذبحٍ عظيم}..الآية
 
 وهو الذبح العظيم يامفتري ينفع يكون مدبوح بره السلخانة زي اللي عندك؟.. ولا مرضان ولا عنده جنون البقر؟؟ ولا الكيلو منه من غير ورق كيلو إلا ربع زي اللي بتبيعو للزباين الغلابة اللي دخلوا المحل وقلبهم منشرح من الآية الكريمة المكتوبة ف واجهة المحل.. والزبون بيدخل وحاسس بالتقوى بتخر من حبابي عينيك..
 
 ونفس القصة مع بتاع الفراخ.. اللي مهريه أنفلونزا طيور وواخده كل سيفاجين البلد.. ومدوبه كراتين كلينكس م الزكام.. وتلاقيه مصدر لك:{ولحم طيرٍ مما يشتهون}،، والفكهاني.. فاكهة جايبها من ع السكك.. وقِّيْعْ.. وتلاقيه معلق اللوحة العشرة متر:{..وفاكهةٍ مما يتخيرون..}..
 
 واحنا هانروح بعيد ليه؟؟.. كلنا عارفين الشحرورة الأمورة صباح.. معجزة الأجيال.. أول ماجت مصر.. والبلية بدأت تلعب معاها.. استشعرت ازاي تكسب المصريين.. راحت مدياها شهادة.. وأعلنت إسلامها وتزوجت من المذيع الفاضل: أحمد فراج وكان من الشباب الملتزم في ذلك الوقت كمان -شوفو البجاحة- وحبها المصريين جدا.. وع الحب ده جابت نص لبنان شغلتهم فنانين ف مصر.. إيشي فهد بلان وإيشى كيغام وإيشى شوشو.. كله تبع الست صبوحة..
 
 وهب هب.. خلصت القصة وكبرت صباح وتحول عنها المنتجين والسَبّوبَة ف مصر نشفت.. راحت راجعة لبنان وراجعة كمان عن الدين الإسلامي.. والكارثة.. إن حكم المرتد في الإسلام يعرفه الصغير قبل الكبير في كل أنحاء مصر.. رغم ذلك جاءت الصبوحة لمصر زيارااااات عديدة بعد ارتدادها عن الدين الإسلامي ولا حد قال لها تلت التلاتة كام.. والناس البسطاء حتى الآن فاكرين إن الشحرورة لسه مسلمة..
 
 واللي زاد وغطى.. واحد مرشح لمجلس الشعب من السنبلاوين.. واخد رمز الكأس.. يقوم بسلامته يكتب في كل اليفط الإنتخابيه بتاعته:{إن الأبرار يشربون من كأسٍ كان مزاجها كافورا}.. وكذلك رأيت بعيني من بعض المرشحين من الحزب الوطني والمستقلين يرفعون لافتات.. الله هو الحل.. نظرًا لما وجدوا من الناس تأييدًا لمرشحي الإخوان الذين يرفعون شعار الإسلام هو الحل..
 
 حتى في العيادات الخاصة.. تلاقي لو الدكتور راجل معروف عنه الاستقامة والالتزام.. شركات الأدوية تروح مصدراله مندوب للدعاية.. طول ما بيتكلم عن الدوا يقول إن شاء الله يافندم إحنا أحسن منتج أحسن من بتاع أمريكا نفسها بلد التصنيع.. وبعون الله وتوفيقه ستضيء روشتات سيادتك بنور الحق على يد المنتج بتاعنا اللي هايتكتب له النجاح بعون الله وتوفيقه وهمة سيادتكم.. مع إنه بيكون منتج زبااااالة.. ودوا بيئه.. بيئه فعلاً إذا ماقورن بالمنافس له في السوق المحلية.. إنما هي نقطة الضعف التي يتمسك بها بعض الخبيثين.. وهي تمسك المصريين بالتدين.. لدرجة أنني سمعت مقولة يدَّعي صاحبها أنها عن سيدنا عمر رضي الله عنه، ولا أعتقد أبدًا أنها صدرت عنه، وهي: ..{من خدعنا بالله أنخدعنا له}...
 
 ياجماعة المؤمن كَيِّسْ.... فَطِنْ....
 
 مش كِيْسْ قُطْنْ.... 
 
واقرأ أيضاً:
دعاء واحد مصري مطحون / هي الناس اتهبلت من شويه؟ / أفضفض قبل ما الفيوزات تضرب