حكومة 2006.. كي ...جي وان

ألف. ألف.. ألف مبروك الحمد لله نجحت حكومتنا الاليكترونية في أنها تعدي بالسلامة السنة الأولى السنة دي بالعافية وبعد ملحق كانت ها تسقط فيه في مادة المراجيح..... ومسابقة البلي مسافات طويلة..... 

لكن أهوه نجاح وخلاص وتقدير مقبول مش وحش برضه..... ربنا يجعلها من المقبولين

في المرحلة القادمة......... 
في المرحلة الجديدة اتشالت مواد بايخة مثل ماده الشباب والرياضة
وماده الشئون الاجتماعية والتنمية المحلية....... وكانت مواد صعبة ورخمة

وملهاش لزمه من أصله.......{ والله ولا المواد الباقية لها لازمه.... لكن أهو دستور والسلام.....بدل ما يمشوا حافيين في الشتا.....}

لكن ده مش معناه أن السنة الجاية هاتبقى سهلة......لأن كي...جي.... تو..... أكيد بتبقى أصعب من كي...جي...وان اللي الحكومة عدت فيها على الحركرك....

لأن فيها مواد جديدة وعلى فكره.... المواد دي مش سهله لأن السنة دي فيها سقوط ونجاح مش نقل أوتوماتيكي.....ولأن المواد الجديدة الناس منتظره أنها تكون ترفيهية على الشعب المكتئب ربنا ينجح الحكومة في السنة الصعبة دي وما تكسفناش... المفروض بقينا كبار خلاص..... وف كي... جي... تو ومش معقول حد يعملها على نفسه زى السنة اللي فاتت..... اللي هايعملها على روحه....

الأبله ح تضربه ومش ها تنفعه تبرعات ولي الأمر  

مش عاوزين نكون متشائمين ونعقد المسائل من أولها لكن بصراحة شغل الغش والنجاح بالفكاكه والفهلوه
ما بقاش ينفع ويا ريت الطلبة الجدد يتعلموا من الأولاد اللي أترفدوا السنة دىي وقعدوا في بيوتهم زى الولايا
علشان تنجح وأسمك يتحط ف لوحة الشرف..... لازم ياضنايا تبذل مجهود وتذاكر من أول يوم

ساعة الامتحان لا ها ينفعك غش ولا غيره... وتلاقي نفسك لايص لوصة الحرامي اللي أتمسك ف جامع
على العموم مع بداية العام الجديد.... أتمنى من كل قلبي النجاح لكل الطلبة الجدد.....

والوشوش القديمة دي يا تخلص..... يا ربنا يخلصنا منها ..مش ناقصين كل سنة ننقلهم من فصل لفصل.. 
نقول أهو يمكن الفصل الجديد يكون وشه حلو عليهم..... يمكن يتأتى من الخيار أته.............

ويا ريت يكون فيه تحسين للمجاميع عن السنة اللي فاتت..... كده شكلنا كمدرسه بقى { بايخ}
قدام الحكومات التانية..... يا ناس دي كل حكومات العالم التالت..... يا إما في الإعدادية يا أما في الثانوية العامة
أما حكومتنا المحروسة........ لسه يا دوب.... كي....
ويتبع >>>>:  حكومة 2006 حكومة الاستكشافات
واقرأ أيضاً:
المسخر خانة.. الحلقة الرابعة / أفضفض قبل ما الفيوزات تضرب / حكومة 2006 حكومة الاستكشافات