حتشبسوت... قفلوا عليك يا حلوه تابوت

 كانت هذه هي المرة الثالثة في حياتي لزيارة الأقصر.... الأولى كانت في أول سنوات كلية الطب.... عام1971مع فريق الجوالة بالكلية والثانية في سنه رابعة عام 1975مع أسرة الصواريخ بالكلية وكانت هذه هي المرة الثالثة لحضور مؤتمر علمي......
 
 الأقصر...... مش مدينة دي صندوق الدنيا....... صندوق مهما فتحته وأخذت منه عمره ما يخلص أبدا لكن أنا مش هاتكلم عن الأقصر دلوقتي ولا عن تراثنا اللي سايبينه ملطشه..... للي رايح واللي جاي ولا هاتكلم عن معاملة السياح من جهة رجال الأمن اللي أصبحوا في الآثار أكتر من الآثار نفسها..... وبرضه بتتسرق وتتهرب على بره...... مش هاتكلم عن معاملتهم المخذية للسياح كفاية إني صورتها بكاميرة الفيديو بتاعتي......صوت وصورة........ وعندي استعداد والله....... أرسلها لمنى الشاذلي......... صاحبة البرنامج القوي...{ العاشرة مساء...} عشان تتفرجوا ع الفضايح........ ألفاظ نابيه....... بالعربي طبعا عشان الأجانب.
  
 ما يفهموش.... حركات تصل لدرجة التحرش بالسائحات الأجانب من قبل..... واد عسكري ولا أمين شرطه جربان مايسواش تلاته مليم......... عشان يسوأ سمعة بلد بحالها....... سمعتها ترجع لآلاف السنين ولا موظف الكهربا.... في معبد الكرنك أثناء عرض الصوت والضوء....... الذى تأخر عن ضبط الإضاءة حوالي ساعتين كده على ما صحي م النوم وطفح الشاي الصعيدي عشان يفوق..... والناس واقفة على رجليها من العاشرة إلى الثانية عشرة منتصف الليل.......... منتظرة بدأ العرض........ عرض لأعظم ملوك مصر والتاريخ.......... يعطله.... موظف.. تأخر في الحضور ولا أحد يتكلم...... حتى السواح.... كان ناقص يقولوا بالعربي... حسبنا الله ونعم الوكيل.......
 
 دا غير بلاوي كتيره....... زجاجة الميه أمو إتناشر جنيه.... للمصري و5 دولار للأجنبي.... لم تكن هذه الأشياء الغريبة موجودة على الإطلاق في زياراتي السابقة............. كل ده بره الموضوع......... دا بس مجرد.... فش للغل....... بدل ما يحصل لي حاجه........... الموضوع يا ساده......... يقولون أننا الشرقيون لم نعط طوال التاريخ للمرأة حقها............ مصر في عز مجدها.. وقوتها..... كانت تحكمها واحده ست.... الست دى أطلقوا عليها في عهدها وبحق وبدون نفاق إعلامي زي اللي موجود دلوقتي..... أطلقوا عليها من غير تلميع أو تزوير من أي صحفي {.....سيدة النساء الشريفات.....}........حتشبسوت.........
 
 الست دي حكمت مصر....حوالي عشرين سنه.......ودي مدة حكم....... بالنسبة للملوك....... طوووووووووويله جداااااااا، يعني اللي عندنا مش ملوك..... دول لزقه أمريكاني........ وكانت سنوات حكمها هي أحلى أيام مصر. وأزهاها.... وفى عهدها انتصر حزب الكهنة والمثقفين وكان اسمه أيامها حزب المؤسسة العسكرية وساد السلام الإجتماعى كل البلاد وخرجت قوافل التجارة في الأساطيل المصرية... تحمل المنتجات اليدوية لتبادل عليها في الشمال والجنوب وترجع لمصر بالخامات والحبوب....، وفى عهدها ازدهر فن العمارة... وكان عندها وزير مخلص ومش مرتشي...... ومش مشكوك في أمره........
 
 كان مهندس شاب..... وكان اسمه المهندس.... {سنموت...} وصمم لها أفخم الآثار المعمارية وهو معبد الدير البحري ذو الثلاث طوابق.... الفخمة الرائعة.... وهو يقع على الشاطئ الغربي للنيل مقابل مدينه طيبه.... {الاسم القديم للأقصر...} وعلى جدران هذا المعبد..... سجل المؤرخون والنحاتون.... صفحات من التاريخ المصور لحملات التجارة البحرية المصرية إلى بلاد {نونت..} ويقال أنها الصومال وواضح أن حتشبسوت كانت سابقة لعصرها.....
 
 فكانت تأمر بتجهيز رحلات الأسطول التجارية بالخبراء والحكماء والفنانين بجانب كبار التجار.... ويختار الجميع مجموعة من المنتجات المصرية اللي شايفيين لأنها تناسب البلاد اللي هايزوروها ويلعب الحكماء دور السفراء لتوطيد العلاقات وتسويق البضائع المصرية ويشترون البضائع الأجنبية ويرجعون ليتولى الفنانون دور الصحفيين في تدوين الريبورتاجات المصورة..... على جدران المعابد.... واللي يزور المعبد ممكن يقرأ هذه التقارير المصورة التي تشرح في بساطه وجمال بلاد بونت... وغيرها من البلدان من جميع النواحي الجغرافية والاجتماعية والبيئية.... وعادات الناس فيها.... دا غير أجمل دراسة لمختلف أنواع الأسماك والأحياء المائية......
 
 في البحر الأحمر وقتها....... ببساطة وسهولة..... علشان الأميين.... اللي مش مثقفين اللي زي حالاتنا.... ممكن يقروا ويعرفوا كل حاجة حصلت.... بأمانة حتى أنواع البضايع اللي كانت بتيجى...... واندفع مقابلها إيه من البضايع المصرية.... كشف حساب مفتوح........ بدون كذب..... لأن اللي كاتبه.... من الشعب مش من الحكومة...... يعني بالعربي كان من حق كل فرد من الشعب المصري وقت حكم حتشبسوت أنه يعرف كل حاجة بتحصل وبتحصل ليه أصلا.......
 
 الناس دي....... قصدي حتشبسوت وحكومتها.... كانوا فاهمين مصلحة البلد صح...... وكان عندهم ولا مؤاخذه شفافية بس مش زي ابتاعة حكومة نظيف....... دي شفافية أصلي مش تايواني..... ما كانوش يبعدوا مراكب النفايات النووية في القنال وبعدين الصحافة ابتاعتهم تقول يا جماعه أنتوا فاهمين غلط..... ويبيعوا صحة الشعب كله...... بكام مليون دولار..... وزغرطي يا اللي مانتيش غرمانه.....
 
 يا ما كان ف نفسي...... أعيش ف زمانك يا حتشبسوت....... إن شاء الله يكون أسمى......... آتيف ست...... الرابع...... بدل ما أنا باخد على قفايا.... واسمي الدكتور عاطف

واقرأ أيضاً:
بسم الله.... حلال الله أكبر.... / يا عيني ع الدكاترة....