يوميات مفروسة: يا نهار اسوح!!!

 شوفتوا حكاية الناس اللي في أجا دقهلية دي؟ مكان فيه شوية مايه راكدة وطالع في وسطها حجر ولازم كل يوم جمعة وقت الأذان والخطيب بيخطب الستات اللي مش بتخلف واللي مش بترضع والجواميس اللي مش بتدر لبن.... حتى الكلاب اللي بطلت تطلع لسانها وكلو كلو كلو بيروح هناك ويقعد يستحمى من المية المهببة دي وقبلها لازم يتغوط أو يتبول تصوروا؟
 
 القرية دي فيها 9000 بني آدم يا هووووووه كلهم دماغهم طاقة وماليها الخزعبلات دي، والي يفرسك أن دول ناسك وأهلك (مصر أم الدنيا) وأنهم لسه على ما هم عليه رغم أننا في القرن الواحد وعشرين واللي فرسني أكتر المذيع اللي استقبل الناس الي ف القرية دي ومعاهم طبيب نفسي وعمدتهم! وسابهم يقطعوا بعض.
 
 دول يدافعوا ويقولوا كلام آخر هبل وآخر استفزاز والطبيب مش واخد حقة في الدفاع عن البديهية....... وكمان كمان كمان يقوم يتصل المذيع بشيخ أزهر؛ والشيخ طبعا قال ده نوع من أنواع الشرك.... يقوم المذيع يرد ويقول لو سمحت من فضيلتك لا تجريح ولا تكفير!!! يعني همه يروحوا يطلبوا من الحجر يخليهم يخلفوا ويرضعوا وما نقولش يا جماعه دة خبل وشرك؟!!
 
 والمذيع اللي م الصنف دة بيعفرتني لأنه مش بيدور على الحل أد ما بيدور على أنه يعمل خناقة أمام المشاهدين ويولع الدنيا وبس واحنا طبعا وراه نتشال ونتهبد معاهم ومش مهم غير أن البرنامج يتشهر، وف وسط الزحمة لقيت اشخاص بيمروا على دماغي وبقول هما راحوا فين؟ ومين هيرحمنا لما نتسئل عن قرية بحالها فيها 9000 بني آدم لسه بيستنوا الديك اللي بيطلع من الحجر واللي عاوزة بنت تقدم قلة واللي عاوزة واد تقدم ابريق!!
 
 كان منهم "زاهي حواس" مش المفروض يروح يشوف المصيبة دي يا يطلع حجر وتغور حكايته ف داهية؛ يا يطلع اثر ويرميه في أي معبد، و"علماء الدين" الي لسه واقفين ع المنبر يقولوا كلام بعيد عن مصايب الواقع ويعرفوا انهم وهما بيخطبوا في ناس مستنية خطبتهم مش عشان يسمعوها لكن عشان هي شرط وطقس من طقوس تقديم الطلبات للحجر!
 
 و"الاطباء النفسيين" عشان يشوفوا هيعملوا ايه مع الناس دي لانه بقى مزار وبيجي فيه الناس من كل العالم العربي (هاي هيء طويل العمر يطول عمره)
 و"العمدة" بردو أصلو قال ان فيه رسوم دخول علشان الستات المحترمات تقلع في الشارع وسعره رمزي جدا عشرين جنية بس لا والله يعني الست الي هتيجي من الإمارات ولا السعودية هتدفع عشرين جنية بردو يا عمدة يا بلاش؟
 بجد والله حرام... ممكن يا دكتور وائل تضيف استشارات باطنية؟ علشان الضغط والسكر والشلل...
 
اقرأ أيضاً:
يوميات مفروسة نادر السيد مشاركة / يوميات مفروسة الصباح رباح قال!