معدش رباح نوهااااائي.. بتاتا.. خالص وبقت أصعب لحظة في اليوم هي لحظة الفوقان من جديد علشان نلف ف الساقية.
ومالو... مش مشكلة الواحد بردو بيقوم بحاجات هو راضي عنها وعاوزها بتحسسه انو لسه بني آدم وله قيمة... لكن لما الواحد ينام الساعة واحده ولا اتنين مش عشان كان بيتفرج على التليفزيون وادامه طبق اللب ومش عشان كان سهران يعد في النجوم ولا بيرغي في التليفونات يبقى ابسط حقوقه أنو ينام الساعتين العُمي دول علشان يلاقي الصباح بجد رباح.
لكن الواحد يجي يحط راسه من هنا يلاقي بقدرة القادر الناس جلها جنان رسمي وابص في الساعة لحسن أكون غلطانة ولسه الدنيا بدري ألاقيها أبدا اتنين يعني اتنين مش هزار... لا حول ولا قوة إلا بالله يا رب يعني اللي معلّي الاستريو على الآخر ده عارف إن الساعة اتنين وفيه بني آدمين عاوزين يناموا أو يذاكروا؟
والعيال اللي تحت عمالين يهرجوا ويهزروا ويا ريتهم بيهزروا عدل ده دمهم سم يلطش ولا على بالهم صدى صوتهم الي مجلل في وسط الشارع وهو ساكت.
والهانم الي حلي ليها تأديب عيالها والقاء الخطب العصماء في الساعة دي وطبعا بالصوت والإحساس لان تبعات الخطب العصماء زغد وركل وشتم وبتوصل كل أصوات العياط وأي ومعلش أخر مرة يا ماما لحد مخدتي!!
أنام فين يا ناس هما أربع ساعات مش اكتر والله فكرت اعدي عليهم ونعمل جدول ونشوف حل للنيلة دي لحسن خلاص دماغي هتنفجر من قلة النوم وبعدين قلت أبعت لكم الاستشارة واهو انتو بردو أهل العلم والخبرة مع العلم أني في كامل صحتي النفسية ولا أعاني من الأرق أو اضطرابات النوم الثانوسفسطائية اللوذعية لكن أعاني من بشر معندهوش ابسط قواعد الذوق أو الفهم... ويقولك الصباح رباح قال.
اقرأ أيضاً:
يوميات مفروسة: يا نهار اسوح!!! / يوميات مفروسة في النص؟!
تعليقات الأعضاء