يوميات مفرووسة: عصام الحضري

 فوجئت زي ما كل مصري وكل أهلاوي أصيل فوجئ بتصرف الحضري.. صحيح لسه الموضوع فيه كلام لكن بجد اللي حصل وجع قلبي قوي.
 
 أولا: لأني بحبه جدا عشان كان في نظري راجل المهمات الصعبة لأنه كان في عز الزنقة والثانية بتفرق معانا والماتش ممكن يضيع كان الحضري قدها وقدود وبيصد أصعب اجوان في أصعب اللحظات.
 
 ثانيا: أني كل حد أحبه فعلا مش بقدر أشوف منه حاجة وحشة إلا أذا زاد وفاض منه كتير يعني عدد غلطاته هي إلي بتجبرني أشوف الوحش منه لكن مع الحضري كان العكس لان دي أول مرة اعرف عنه حاجة مش ولابد لكنها كانت حركة من العيار التقيل خصوصا طريقة خروجة ولما عمل الحضري إلي عمله وبالطريقة دي افتكرت المقالة بتاعة دكتور مهدي عن الأهلي ولعيبته واتفرست وقلت يا ترى تحليلك أيه يا دكتور لواحد من أهم وأحب نجوم الأهلي لقلوبنا وفي عز عز الاحتفال والكلام الكبير قوي عن الانتماء والذي منه ويعمل كدة؟
 
 وبالشكل ده.... وبما أن الأهلي ولعيبة الأهلي بقوا حاجة قومية وبتعكس معاني وخصائص نفسية للشعب المصري بأكمله............. وصحيح إلي يعيش ياما هيشوف........ هو كمان فيه سؤال هو معنى أن الواحد ممكن يلاقي مكان يديني فلوس اكتر يبقى اجري عليه حتى لو أنا فعلا مش محتاجة ومش بشحت دلوقتي مثلا ولا حاجة؟ وحتى لو هدوس على معاني مهمة؟ وحتى لو هزعل ناس قلوبها كانت مليانا حب ليا وبتتمنالي الخير؟
 ولا الواحد بقى غريب وسط أغراب؟ بجد بقت حاجة تفرس.
 
اقرأ أيضاً:
يوميات مفروسة: عيد الأم / يوميات مفروسة: الراجل أحسن م الست