يوميات مفروسة: الراجل أحسن م الست

 اتعزمت على فرح من فترة وكان المفروض إن العريس والعروسة عاملينه في مكان استايل ولكن إللي حصل قلب لي دماغي وخلاني أفكر في حكاية الراجل والست!
 
 كل مهنة ستاتي بجد بجد يقدر الراجل يعملها فعلا أحسن من الست ميت مرة..... ليه؟ تلاقي الترزي أحسن من الخياطة خصوصا في لبس الستات! وتلاقي الشيف في الفنادق الكبيرة أشطر ومذاق أكله أطعم بكتير من الستات واسأل وأنت تعرف ومصمم الأزياء إبداعه وتفانينه كلها من الراجل أحسن وأشيك من تصميم الست!.. حتى الخادم تلاقي الراجل اللي ماسك نظام بيت بيبقى أحسن من الخادمة ميت مرة يا ترى ليه؟ ويا ترى ده معناه أيه؟
 
 أيه علاقة ده بالفرح إللي كنت فيه؟ العلاقة كارثة حلّت فوق دماغ الرجالة إللي عندهم دم بس، عارفين ليه؟ لأن الفرح كان جايب فرقة كلها رجاله مافيهاش واحدة ست و قلت كويس... لكن إللي شفته خلاني مش قادرة أصدق عيني وأكدبها وكنت عاوزة أقوم أجيب إللي في بطني لأن الرجالة (مجازاً) كانوا راقصات من الدرجة الأولى ولما أقول راقصات يعني راقصات صحيح لسه مالبسوش بدل الرقص لكن كانوا بيتمختروا ويهزوا ويقسموا ويتدلّلوا ويعبروا بالتلميح والتصريح بحركات جسمهم وكلو كلو أحسن من الرقاصة الخليعه مليون مرة... بس مكنش معايا جنية انقطها بيهن يوووووه قصدي جنية انقطه بيهم والله ما عارفة بيهن ولا بيهم.... أنا حتى.
  
 كنت مش عارفة أحس بإيه بالقرف ولا بالذهول ولا بالحسرة والانكسار وف الآخر حسيت أني مفرووووسة لدرجة أني هطق من الفرسة
 
اقرأ أيضاً:
يوميات مفرووسة: عصام الحضري / يوميات مفروسة: تقزقز لب؟