أحسن تساهل : خيبة أمل

 إمتى تحس بخيبة أمل؟؟ خيبة أمل من النوع اللي لما يهلّ، يعم ويشمل ويتوغل ويستمر ويستمر؟؟
 قوية فعلاً خيبة الأمل.. ليها هيبة لما بتوصل.. قالوا زمان في الأمثال: "خيبة الأمل راكبة جمل"، أو زي عمرو زميلنا لما قال: "وجاية وعاملة زفة كمان".
 طب بعد الإحساس الرهيب ده هتعمل إيه؟
 
 أقولك أنا.. اتعلم الدرس كويس .. ذاكره، احفظه.. احتمال يجيلك تاني.. عشان كده، محتاج تقرا السطور الجاية دي، لان فيها (بهريز) تجارب الآخرين:
 * خلي كل حاجة تعدي ف حياتك بسرعة، وما تديش حاجة أكبر من حجمها، لاني اكتشفت إن ده بيجيب خيبة أمل.
 
 * إوعى تلبس دور مش بتاعك.. إوعى حد يرغمك تتحط ف موقف وتلعب الدور وانت مش حاسه.. إوعى حد يعتبرك حاجة كبيرة وتدبس في مسئولية إنت مش أدها.. في الأول هتحسها حلوة، بعدين هتزهأ، بعدين هتتعب، بعدين هيحس هو بخيبة أمل فيك وتحس انت بحاجة مدمرة ما اعرفش اسمها..
 
 * فكر كويس قبل ما تجري ورا حاجة.. احتمال لما توصل تلاقيها ما كانتش تستاهل.. أو يمكن ما تطلعش بتاعتك أصلاً.. وطبعاً هتحس بخيبة أمل..
 
 * إحلم... إحلم حلمك الكبير.. حاول توصل.. خد بالك م الوقت.. بيجري زي الهوا.. ركّـز.. ضحّي عشانه.. أصل انت مش واخد بالك.. اللي ما بيوصلش، بيحس بخيبة أمل
 
 * حب نفسك.. دلّعها.. صدّقها. إوعي تكبتها.. خليك صريح وأمين معاها وإياك تغدر بيها.. أحسن لو قلبت نفسك عليك، هتحس بخيبة أمل
 تحب أجيبلك م الآخر؟؟
 
 لما تدوّر وما تلاقيش.. وتحلم وما توصلش.. وتقول وما تتسمعش.. وتنصح وما تأثّـرش.. وتدي وما تاخدش.. تحب فتتخدع.. تصدّق فيتغدر بيك.. يبقى أهلاً بيك في خيبة الأمل..
 وبرغم كمية الإحباط اللي مالية الكلام.. عايزة اقولك ما تخليش الإحساس ده يسيطر عليك.. وخليك فاكر إن خيبة الأمل زي الميكروب.. سهل أوي يدخل الجسم.. لكن صعب أوي يخرج منه.
 نصيحتي ليك.. لملم خيبة أملك من حواليك، وافتح شبّاك أوضتك وارميها... عيش بالأمل واوعى تسيب نفسك ولو لحظة ضحية لخيبة الأمل.
 
واقرأ أيضاً:
 الضحـايـا / خم نوم