يوميات مفروووووسة.... 6 أبريل

 6 ابريل.. 6 ابريل.. 6 ابريييييييل... يا ترى هحطك فين يا دي اليوم؟ حاكم احنا في مصر بلدنا العظيمة دي عندنا تواريخ كتيرة محفورة في دماغنا... منها تواريخ تشاور على انتصار وحقيقتها هزيمة زي تاريخ كامب ديفيد.. ومعاهدة السلام اللي حطت رؤوسنا في الطين وسففتنا التراب بجدارة... وتواريخ تشاور على هزيمة وكان حقيقتها انتصار زي يوم النكسة لأننا نفدنا من إننا نبقا شيوعيين من غير ولا نص كلمة.... وتواريخ ماسخة كان حدثها كبير بس معملناش فيها حاجة لدرجة مخزية قدام نفسنا وقدام العالم زي تاريخ الزلزال الأول العظيم في مصر... وتواريخ مهضوم حقها مع أنها كانت تواريخ عملاقة لكن غبائنا أو جهلنا خلانا نمر عليها مرور أقل من الكرام بكتير زي تاريخ معظم غزواتنا الإسلامية الرائعة... وتواريخ بقت مجرد تواريخ لحاجة ما بقتش موجودة أساسا رغم إنها اتعملت علشانها مخصوص زي أول مايو كده والاحتفال بعمال مصر العظام اللي مرميين في الشارع وبيلحسوا التراب وتلت أرباعهم متقاعد عنوة وهو في الأربعين!!!
 
 وتواريخ هاطلة بنحتفل بيها بفرحة وحقيقتها حزن زي تاريخ ميلادي وميلادك لما نحتفل بيه ونعمله زيطة وزمبليطة ونهوف شمعتنا واحنا أبو قردان مع إننا قربنا من موتنا سنه.... وتواريخ عظيمة بس ذكراها خاص جواك لوحدك فيها عرفت حد حبك بجد.. فيها لقيت نفسك.. فيها قررت أول مرة ف حياتك قرار صح؛
 
 يا ترى 6 ابريل الميمون ده هيتحط فين؟؟ مش عارفة ليه مش شاغله بالي هنضّرب بجد ولا لاء وبقيت متوقعه الحاجة وعكسها بنفس القوة فأقول ممكن إضراب 6 ابريل يكون يوم فارق بجد.. وممكن يبقى يوم يزعلني قوي أنه كان فرصة لينا نبقى بني آدميين بجد بس كالعادة بفففففففففف خدت الشر وراااااحت؛
 
 واكتر حاجة ضحكتني هو بيان الحكومة!!!! يااااااه من أيام ما نادوا في الراديو على أحمد إبراهيم القاطن بدير النحاس إنه مايشربش الدواء لأن فيه سم قاتل ماسمعتش حاجة كده خاااااالص
 مابقتش مصدقة وداني... وإن صحيح صحيح وزارة الداخلية اتنحررت قوي وشدت حيلها وعبرت أبونا وقالت في بيان فهمي نظمي رسمي أنها تهيب بالمواطنين الشرفاء الانصياع لحديث أقلية منحرفة!!! إيه الحلاوة دي
  
 إيه الطعامة دي يا جدعان... والله وبقا عندنا فئة منحرفة قال وعندنا وزارة تهيب بالمواطنين الشرفاء؛
 همة لسه شرفاء؟!! بعد ما علمتوهم بأنانيتكم وسرقتكم ازاي يبعوا ضميرهم عشان ياكلوا؟ بعد ما خليتوا الست تبيع لحمها عشان تصرف على عيلة؟! بعد ما خليتوا الذمم فاسدة في كل حتة؟! بعد ما اكلتونا لحمة الحمير وكل ما الواحد يتاوب يلاقي نفسه بينهق.
 
 شرفاء؟! خلاص الكلمة دي بقت شبة أمينة رزق وماما نجوى وإسماعيل ياسين لما نشوفها نقول يااااااه فكرتوني بالذي مضى
 تصدقوا بالله أنا أرفانه وزعلانه والاكتر من ده كله متنيلة مفروووووسة.
 
اقرأ أيضاً:
يوميات مفروسة: تقزقز لب؟ / يوميات مفروسة: أومال لو كانت إخوان مسلمين!!