يوميات مفروسة: أومال لو كانت إخوان مسلمين!!

 بسأل نفسي لو كانت إسراء بتاعة الفيس بوك دي من الإخوان المسلمين كانت الحكومة هتعمل ايه؟ كان ممكن يتقال عليهم إيه؟ أو يتلفقلهم إيه؟ ولا كانت حدوتة الستات كبرت في نافوخ الحكومة وشفنا اللي عمرنا ما كنا ممكن نشوفه لما يعتقلوا الستات راخريين ويبهدلوهم.. المصيبة إنهم مش قادرين يصدقوا إن ممكن الناس تقول لاء أو إنها تكون معترضة أو عندها إحساس ورغبة في التغيير إلا إذا كانت تنتمي لحزب أو جماعة محظورة أو مش متنيلة... 
 
 هو فيه إيه؟ هو العيال بتوع المحلة المضروبين واللي راحوا المستشفي يتعالجوا ورابطين ايدهم في سراير العلاج بالكلبش في ايد والمحاليل في الايد التانية مستنية إخوان مسلمين ولا عفريت أزرق عشان يحسوا إنهم متهزأين ومتمرمط بكرامتهم الأرض؟
 
 قلبي بقا مليان أحزان مش قادر يشيلها.. أحزان شخصية وأحزان عامة لكن لما بتيجي لحظات العقل والحكمة بقول ومالوا، الضلمة لولاها مكناش نعرف قيمة النور والاضطهاد والبهدلة اللي إحنا فيها هي السبب اللي هيصحينا ويخلينا نبقا أحسن يمكن لما ست تموت وهي بتشتري رغيف عيش لعيالها ولا عيل يقع في بلاعة ولا بنت تغتصب كل يوم نفوق بجد وانو لولا موت محمد الدرة ماكنتش قامت انتفاضة كبيرة ولولا موت حفظة القرآن في غزوة اليمامة ماكناش عملنا المصحف.. لكن تفضل الحكمة وقت التفكير بالعقل قليلة....
 
 وتفضل الأحاسيس وقت الغيظ والفرسة هي الاكتر واللي يفررررررررس صحيح بقا ان كل دة بيطنش ولا اكن فيه حاجة لاء وبيستعدوا للانتقام من للي بدع فكرة إن يوم 4 مايو هنعتبره يوم اسود علينا وعلى الل"(.......)وحبيب قلبي مطنش كل حاجة ولا أكن حاجة بتحصل ورايح يزودلنا المحافظات محافظتين جداد!!!
 قال محافظة حلوان قال ومحافظة 6 أكتوبر قال
 بجد تعبت.. يا ترى إيه ممكن يقلل أحزاني؟ مين ممكن يقلل أحزاني؟
 
اقرأ أيضاً:
يوميات مفروووووسة.... 6 أبريل / اتنين متجوزين