اتنين متجوزين

 كنت أسمع أن أي اتنين متجوزين اللي بينهم ده حاجة جامدة قوي.. روح واحدة وجسم واحد وتفكير واحد... ما هي علاقة بقا بدأت بكلمة من ربنا وامتدت من الأرض للسما ههههه....
 لكن الحروف الاينجيليش غيرت كل الكلام ده.
 
 وبيقولك إيه يا سيدي ولا ستك إلا أنا إن الزوجين اللي بينهم بقى زي أشكال الحروف فمنهم مثلاً حرف ال X ودول بقا مكنوش يعرفوا بعض واتقابلوا في نقطة واحدة بس وبعدين بيرجعوا تاني بعيد عن بعض خالص وغالبا بيسيبوا بعض.... واتنين اللي بينهم زي حرف ال O ودول مش متقابلين في حاجة خالص بس بيفضلوا دايرين في فلك بعض بيجروا ورا بعض من غير ما يبقا فيه حاجة مشتركة بجد بتجمعهم ودول اغلب البيوت عايشين والدنيا ماشية والقصة بينهم حقوق وواجبات سواء بذوق أو من غير ذوق لكن مكملين مع بعض حتى لو ما اشتركوش في حاجة....
 
 وفي اتنين اللي بينهم زي حرف ال H ودول بقا مفيش أي حاجة تجمعهم ببعض لا في البداية ولا في النهاية والي بينهم الولاد وبس.... وفي اتنين الي بينهم زي حرف Y ودول ماكنش بينهم حاجة من الاول لكن التقوا في نقطة وكملوا مع بعض على أساس الالتقاء ده حسب ما يكون.... وفيه اتنين العلاقة بينهم زي حرف الV دول كانوا بادئين سوا واتفرقوا ومابقاش ينفع يتقابلوا تاني أبدا وفي اتنين إلي بينهم زي حرف الA ودول أحلى وأجمل اتنين بيبقوا متقابلين من الأول ومتفقين وبيجمع بينهم الأولاد كمان.
 
 إذا كنت من فئة المنكوبين (المتجوزين) اجري الحق شوف انت انهي حرف مع مراتك أو جوزك وحاول أو حاولي تنقي الحرف اللي يريحك وإذا كنت من فئة المحرومين (مش عارفين إلي مستنيهم) حاول وحاولي ما تتجوز إلا اللي هتعمل أو يعمل معاكي حرف الـA ، وإذا كنت من فئة المفروسين خليك واقف في النص جنبي تحمد ربنا انك ما تجوزتش وتضحك ع هبل اللي مستنين أن كل حاجة حلوة هتبقا في الجواز... مع تحياتي مفروسة هانم.
 
اقرأ أيضاً:
يوميات مفروسة: أومال لو كانت إخوان مسلمين!! / كل سنة وأنت طيب!!