كل سنة وأنت طيب!!

 كل سنة وأنت طيب يا حبيبي... وعقبال ميت سنة كمان أحنا لينا بركة إلا أنت.
 يبك من الحاقدين والي مش شايفين تعبك ولفك في الساقية طول السنين إلي فاتت دول... لسه بيفكروا بعاطفية مش بعقل.. واقفين قدام الغلاء قال ومش شايفين تعبك في سد رأب الصدع بينا وبين الغرب مثلاً؛
 
 واقفين قدام انهيار التعليم ومش شايفين إننا اكتر دولة عربية محققة نسبة إشغال وظيفي وحرفي للفئة غير المتعلمة.... 
 واقفين قدام العيش أبو مسامير وقش وظلط وسايبن الجهود المبذولة في إضافة محافظتين جداد واقفين قدام المواصلات إلي بتشربنا ثاني أكسيد الكربون وملوثات الدنيا والآخرة ومش شايفين أنك سايب صرح سياحي يتبني في عهدك زي بورتو مارينا...
 
 طب دة أنت أكتر ريس كان بيكلم الشعب بدفء وهزار طب حد من الرويسا إلي فاتوم كانوا بيهزروا معانا وينكشونا زيك كدة وأنت بتتكلم في خطاب رسمي؟؟ حد كان بيقولهم دة انتو بتزيدوا بمقدار شعب كل سنة والله عسل... معلش معلش بكرة يفهموا ويقدروا.
 
 المهم ما تتعكننش أنت بس عشان مصر كلها لابسه اسود انهاردة.... ولا تتضايق لما الأطفال و الشباب يرموا في الهوا ميت ألف بلونة سودا في الهوا بردو انهاردة...... ولا تكلضم عشان محدش راح الشغل أو ناوي يقطع الكهربا عن نفسه انهاردة لمدة ساعة...
 
 دي تصرفات فئة منحرفة لا بتفهم ولا عاوزة تفهم.. خليك أنت بس على طريقتك وسط حبايبك إلي حواليك وأنت تفضل قاعد معانا 88 سنة كمان واللي مش عاجبة وريلوا الصورة دي...............
 
 هيييييييييه ربنا يصبرني للسنة الجاية عشان احتفل بعيد ميلادك تاني أنت عارف بستناه من السنة للسنة، بس عشان أقولك كل سنة وأنت طيب.
 
اقرأ أيضاً:
اتنين متجوزين / يوميات مفرووووسة جدا... غزة!