(97)
قلة أدب
قلة أدب
يصح برضه إن المظاهرات تتحول لشتيمة في السيد الرئيس، ويقعد كمان الشباب قليل الحيا يغني الأغاني الشعبية على الريس. واد من العيال إياهم عمل نفسه شكوكو ويقول
السح إدح إمبو
الواد خلع من أبوه
الواد هرب على لندن
طظ في أبويا خدوه
السح إدح إمبو
الواد طالع لابوه
حتى مشجعين الكورة بتوع مدرجات الدرجة التالتة بقوا ماشين في المظاهرات ويهتفوا ويقولوا "مبارك تاه يا أولاد الحلال". حرام عليكم بجد هو برضه الريس قائد المسيرة يستاهل منّا كل ده.
(98)
حوار مالوش أي تلاتين لازمة
دخلت النت أعمل حوار مع الشباب الوحشين اللي بيشتموا الرئيس قائد المسيرة. أنا عن نفسي زعلان جداً علشان اللي بيحصل للريس ومش قادر أتخيل إحنا اتغيرنا إزاي للشكل ده؛ معقوله نشتم الريس. ولاّ هو يعني زي المثل المصري اللي بيقول "العجل لما يقع تكتر سكاكينه". المهم قعدت اتكلم بمنتهى الذوق والأدب زي عادتي طبعاً؛ علشان أقنع شاب منهم إنه ما يشتمش الرئيس وحصل حاجات مش قادر أتصورها. الحوار كان بالظبط كده:
- كابتن .. كابتن.. ممكن يا كابتن لو سمحت مفيش داعي للشتيمة بالأب
- بتقول إيه يا أخ؟
- يعني قصدي أقولك يا كابتن إن أنت تحب مثلاً؛ إن حد يشتم باباك يا اسمك ايه؟
- أنا أبويا مات يا أستاذ
- الله يرحمه؛ والله ما أعرف؛ طب يعني أنت تحب يا كابتن إن حد يشتم باباك؟
- ممكن نتعرف الأول
- أنا شفيق البدر والنك نيم بتاعي الحنين
- شوف يا حنين من الآخر كده أنا لو أبويا حرامي زي اللي سرقنا ح أقتله بإيدي، ما بالك بقى لو كان أبويا حرامي وسفاح؟ بقول لك إيه يا حنين؛ زمان كنت داقق عصفورة وقتلها قناص أبوك؛ روح بعيد عني بدل ما الشتيمة تبقى في الأم بعد كده.
- إيه الوحشية دي، المفروض إننا شعب طيب ومتسامح، طول عمرنا بننضرب على قفانا إشمعنا يعني دلوقت واخدين الموضوع بحساسية وزعلتم كده؛ إنتم ليه واخدين الموضوع جد آخر حاجة، أخس عليكم أخس.
وخرجت من النت يا جماعة وأنا تعبان ومش مصدق نفسي؛ والله والله والله، كنت مكسوف قوي أحكي اللي حصل لحد بس قلت بقى أقول لكم علشان استريح؛ وعلشان نقعد كلنا نفكر في حل نعمله للريس علشان هو بصراحة ما يستاهلش إنه يتشتم كل الشتايم دي يعني هو عمل فينا إيه يعني؟!!! باي بقى يا جماعة؛ وأشوفكم بكره على النت بس نعمل جروب اسمه حبايب بابا قائد المسيرة.
(99)
شعار النظام
أتصور بعد أن أصبح شفيق العاشق رئيس الوزارة، وكذلك أصبح حسام الحساس رئيس أمانة الحزب الوطني، فإن الرئيس المصري سيرفع شعار "أنيابنا قوية وكلها حنية" ليكون هذا هو شعار الحكومة في المرحلة القادمة. ويعبر الشعار عن أن سياسة الحكومة ستكون زي شكة الأبرة. بس إحنا بقى هنفضل لغاية لما نغير النظام.
5/2/2011
ويتبع >>>>>>: حكاوي القهاوي (25)
ويتبع >>>>>>: حكاوي القهاوي (25)
واقرأ أيضاً:
تعليقات الأعضاء