مكالمة هاتفية...، من سورية!!

  -السلام عليكم...
 -وعليكم السلام...، كل يوم وأنتم بخير...، عفواً كل دقيقة...
 -طمنونا، كيف الحفلات عندكم اليوم؟
 -والله عامرة، الرقص شغال تمام...، من فوق، ومن تحت، ومن جميعه..، الله يفرج..
 -ييي..، نحنا ما نمنا طول الليل!! كان في قصف جنبنا، قال في بناية نزلت على الأرض...
 -الله يفرج يا رب، تعب قلبنا، نيال يلي ماتوا.
 -الله يسترنا، يا رب نموت مستورين، الواحد ما بخاف من الموت، بس بخاف يبقى بلا إيد، بلا رجل..
 -ليش الطلعة من البيت، والعيشة بالشارع أسهل؟ الصانع يلي عند أبو عبدو، كان ساكن ب(...)، بالزور هرب وقدر يطلع من بيته، أكتر من تيابه يلي على بدنه ما أخد معه، نام على الرصيف، هو وعيلته...، يا رب تفرجها بقى
 -لا..، نحنا جنبنا حالتهم أحسن شوي، نايمين بالجنينة...، الله يعينهم..، واحد ساكن ب(...) طلعوه، راح على ضيعته بمحافظة تانية، مشي 2 كم لحتى قدر يلاقي شي يوصله على بيته هنيك...
 -يوووو، في ناس مشيوا 7 كم وبعدين ركبوا بشاحنات نقل الغنم ودفعوا أجرة على الواحد 2500 ليرة، طبعا بالأحوال العادية كان واحدهم يركب باص مريح ومكيف، ب350 ليرة بس!!
 -وما مات من ريحة الشاحنة؟
 -بلا ريحة بلا بطيخ، الواحد بس بده ينفد بريشه...
 - شو هل الابتزاز؟! هلأ جايين يتاجروا على حسابهم بدل ما يساعدوهم؟ يلا جاييهم الدور....، ونحنا إيمتى جاية دورنا؟
 -والله مو باين شي...، بس طول ما بيتنا ما في شي نحنا بأمان...، جارنا يلي جنبنا انضرب بيته، بس الحمد لله نحنا بس انكسر الشباك...
 -الله ستركم، وإن شاء الله ما صار أذى؟
 -لأ الحمد لله، بس انجرحت إيدي...
 -نعمة...
 -طلعتوا عايدتوا حدا اليوم؟
 -لأ يا عيني، ومنين بدنا نطلع، بالحي الواحد في 3، 4، حواجز تفتيش، وإذا بدك أكتر!!! يا إما الطريق مسدود...، يا إما الحي صار على الأرض!! مضينا الشغلة بالتلفون...
 -نعمة في اتصالات...، ب(...)، مقطوع كل شي عندهم، وما حدا بيعرف شي عنهم...
 -شو تغديتوا اليوم؟..... ييييييييييي يا لطيف..يا لطيف بدوا يضربوا...! شو صوت طلع هلأ! وصل من على التلفون؟
 -إي وصل مباشر كمان، بعدكم بثواني، معناها قريب إلكم، الظاهر الضربة كتير قوية...
 -يا رب نخلص بقى، تعب قلبنا...، ما عاد نقدر نتحمل أكتر من هيك...
 -إي والله، الكل هيك، بس بدنا نصبر شو نساوي...
 -طيب إذا وصلنا الدور لوين بدنا نهرب؟
 -ما بعرف والله، نحنا مقررين نموت ببيتنا....، يييييي طلعت الطيارة...، يلا بدت ترش...
 -يا ترى وين؟
 -يييي، طلع الدخان، وغطى مساحة كبيرة!! يا رب تعينهم...
 -الصراحة، نحنا فكرنا كتير نسافر، بس شو بدنا نعيش متل المطرودين؟ ههه على أساس نحنا مالنا مطرودين...، الله يفرج يا رب، إجتنا هل البلية طب غم، يعني يا تارك الصلاة إجاك الموت فجأة!!
 -سمعتوا؟ فلان انشق...
 -عن جد؟ إيوه....، إي تفو عليه، الوطن تعب بتربايته وبعدين ما طلع فيه خير....
 -...ء..ء...ء...إي الله يلعن العصابات المسلحة، هلكتنا، لوما الجيش الله يقويه نازل فيهم كانوا نزَّلوا البلد فوق راسنا...
 -إي الله يخليلنا ياهم...
 -ء..ء... شو أكلتوا اليوم؟؟؟
 -بطاطا...طا...طا...
 -صحتين وهنا....
 -نحنا أكلنا بطيخ..طاخ، طيخ ...هههه
 -هففففففففف، حاجة نحكي بهي القصة بقى، طق قلبنا...
 -صح، مزبوط، الواحد ما عاد يتحمل، يمكن بعد ما تخلص الشغلة بدنا ننام 24 ساعة متواصلة باليوم على مدى شهر...
 -هههه، إي وكل واحد بيلزمه 10 أطباء من كل الاختصاصات....
 -طيب والدكاترة مين بده يعالجهم؟ ههههه
 -بدبروا حالهم، يصطفلوا، بس ما يكونوا نايمين هنن كمان....
 -بعتقد اتفقنا نترك الحكي على يلي عم بيصير من ثانيتين بس!!
 -ليش في براسنا غير هل القصة؟ شو بدك يانا نعمل مكالمة ساكتة؟!!!
 -إي صحيح نسيت قول لك...، ابن أم مصطفى –الله يسلموا ويكون بعون أمه- راح زيارة...
 -من إيمتى؟
 -الأسبوع الماضي...، يا رب يرجع بالسلامة، الرايح مفقود، والراجع مولود...، وهاد إذا رجع بيرجع مكسر، معوَّر..
 -حسبنا الله، ونعم الوكيل...
 -عن جد الموت أرحم بهاد الوقت...، كل شي عم يغلَى إلا الناس...، يلي كنا نشتريه ب100 ليرة، صار ب300...، ونص الشغلات ما عاد لقيناها....
 -حااااااااااااااااااااجة بقى، طق قلبي، ووجعني راسي، وما عاد فيني اتحرك من الزعل.... رح سكر بوجهك التلفون، وأخلص منك ومن قصصك البايخة..، ما بدي اسمع ولا شي بيتعلق بيلي عم يصير.....، ولي!!! صار انفجار أقوى من الأول.... يا لطيف....، مع السلامة...مع السلامة...، قال ما بدي اسمع قال!!!
 
واقرأ ايضًا: 
في الثورة السورية كيف وصلنا إلى المجازر الحالية؟3/ طفل يُقتل ويُذبح..... كيف ولماذا؟!!!!؟/ إنهاك سوريا ثم إنهاؤها!/ الدعم النفسي لأهل الشام: تيلي دعم/ الكفالة الربانية للشام../ هل تبكي الكلمات؟