بين الشماريخ والإعلام: يا رب سترك

 قالت البنت لأخيها: ربنا
 قال أخوها: ماله؟
 قالت: ربنا سبحانه وتعالى
 قال: ونِعمَ بالله! إيه فيه إيه؟ إيه اللي فكّرك بيه دلوقتي؟
 
 قالت: هو حد يعرفه يقدر ينساه، اللي فكرني اللي أنت شايفهْ في النيلة التليفزيون ده. قال: إيه مش عاجبـِك؟ ما هم لازم يورُّونا اللي جاري، مش إعلام بقى!
 قالت: إعلام إيه وهباب إيه، الإعلام مش بس يِعْلـِمْ، دا لازم يعلّم،
 قال: يعلّم مين؟
 
 قالت: يعلّم كل الناس، خصوصا الغلابة اللي مضيعين نفسهم، وهما بيخربوها كده.
 قال: وهمّا دول بيوصل لهم كلامْ ولاّ علامْ؟
 
 قالت: وهوه ده كلام، ولا علام، دا زعيق وشتيمة، وشماتة، وتهييج وحقد ونصايح خايبة.
 قال: إنت عايزاهم يعملوا إيه بالضبط؟
 
 قالت: مش عارفة، إذا كانوا مش عارفين يعملوا حاجة، يسكتوا خالص.
 قال: قصدك مين؟
 
 قالت: قالت اللي بيزعقوا دول.
 قال: ما هو لازم يزعقوا عشان يفهّمو الناس خطر اللي بيخرّبوا.
 قالت: وهي الناس ناقصة فهم؟ الناس لازم تعرف ربنا الأول، تقوم تفهم كل حاجة صح.
 
 قال: مش فاهم
 قالت: إنت مش معايا خالص، أصل أنا ساعات بدوّر على ربنا سبحانه وتعالى في وش اللي ماسك سيف، واللي ماسكة شمروخ، واللي متشنج، واللي مستحلف، واللي بيزعق، واللي بيتوعد، واللي بيهدد، ما ألاقيش في وش حد فيهم ربنا.
 قال: وش مين وبتاع مين؟ ربنا بينوّر القلوب مش بيظهر في الوشوش
 
 قالت: وهوه اللي قلبه منوّر بربنا، مش يبان على وشه برضه؟
 قال: آه صحيح، بس إنت قصدك مين بالكلام ده بالضبط؟
 قالت: كلهم
 
 قال: طب نعمل إيه؟
 قالت: نعبده إحنا، ونحمده، يمكن ينور قلوبنا
 قال: ونسيبها تخرب على الناحيتين؟
 
 قالت: هوه إحنا لما نسيبها تخرب، يبقى بنعبده، ولاّ بنحمده؟؟!!
 قال: طب نعمل إيه إعملي معروف، رسّيني
 قالت: نِنَــوَّر الناس، خصوصا الشباب الصغير ده، والبنات اللي زي الورد اللي نسيوا إنهم خلقة ربنا، نوريهم قد إيه هما خسرانين لما بيبعدوا عنه،
 
 قال: يعني إيه؟ وإزاي؟
 قالت: يعني يتأكدوا قد إيه هما حايبقوا حلوين لما يعرفوا ربنا بطريقة تانية.
 قال: يعني هما عارفين ربنا بطريقة أوّلانية لما حانوريهم الطريقة التانية
 قالت: مش متأكدة، لكن ما داموا صغيرين، يبقى قدامهم فرصة أكبر
 
 قال: فرصةْ إيه؟
 قالت: إنتَ مالك النهارده، زي ما يكون مخك قفـّل
 قال: بالعكس، إنت عمالة تلهلبيه بالكلام اللي بيخـُضّ ده
 
 قالت: خلاص، يبقى قلبك هوه اللي قفــِّـل
 قال: يا شيخة حرام عليكي
 قالت: أنا نفسي حد يوصّل لهم إن ربنا جميل جدا
 
 قال: وده وقت الكلام في الجمال والرومانسية
 قالت: رومانسية إيه، بأقول لك ربنا، تقول لي رومانسية
 قال: طب نوصلـّهم إزاي، وهمّا ما بيسمعوش من أصله
 
 قالت: نشيل الحجاب اللي بينهم وبين ربنا
 قال: حجاب إيه؟ ونشيله إزاي؟
 قالت: يمشوا في الأرض
 
 قال: إيه؟ أمال هما بيمشوا فين؟
 قالت: هما بيمشوا جوّا نفسهم، وبيسمّعوا اللي بيتقال لهم، وهات يا عمَي: جوّه، وبرّه
 قال: يعني إيه يمشوا في الأرض؟ قصدك إيه؟
 
 قالت: أصلهم لما حايمشوا في الأرض، حايكتشفوا ربنا خلقها ليه، وخلقهم ليه، ويستحيل يقدروا يعملو اللي بيعملوه، أو يقولوا اللي بيقولوه لما يسمعوا تسبيح الجبال والطير مع تسبيح خلق الله
 قال: يسمعوا أإزاي؟ يعني إيه؟
 قالت: لما تطلع لهم ودان بتسمع
 
 قال: إيه؟ إيه؟ تطلع لهم ودان!!؟
 قالت: آه، وقلوب بتعقل
 قال: قصدك عقول بتعقل
 
 قالت: لأ..، "قلوب"!!.. عن إذنــَكْ
 قال: رايحه فين؟
 قالت: رايحه أقفل التليفزيون، أنا ما عنتش طايقة، نصايح نصايح، نصايح خايبة، وشتيمة، وزعيق،
 
 قال: وإنت لمّا تقفلي التليفزيون، حايعرفوا ربنا توموتيكي؟
 قالت: يمكن يسمعوا قلوبهم ثواني قبل ما يناموا، والدنيا هس هس، ما فيهاش إلا رحمته
 قال: آه صحيح، والله ما أنا عارف هما بيناموا إزاي بعد اللي بيعملوه ده، طب وإن ما سمعوش؟ وإن ما عرفهوش؟
 
 قالت: نعرفه إحنا، إدعي معايا يا شيخ: ربنا يحمي مصر
 قال: يحميها إزاي؟
 قالت: يحميها بينا، ما هي أرضه، وإحنا بنعمّرها، نملاها باللي عايزه.
 
 قال: ما همّا بيقولوا إنهم هما اللي عارفين اللي عايزه
 قالت: يقولوا اللي يقولوه، شوف قلبك بيقول لك إيه، وإنت بتشتغل وفاكرُه كل ثانية، وبس! كده تعمر مصر، وكل مصر، تعمر ونُص!
 قال: ياه !!
 قالت: آه
 قال: يارب
 
 نقلا عن جريدة اليوم السابع
 الجمعة 11-4-2014
 
واقرأ أيضاً:
ثقافة الحرب، ونظرية المؤامرة، والجهاد الأكبر‍!/ هل نحن في حاجة إلى........../ مزيد من الخيال، ومراجعة في نتائج انتخابات الرئاسة/ قصة قصيرة (جديدة) "هاييتي"!!