رئيس اتحاد الملاك محتار مش عارف يقعّد البوّاب ولا يمشيه, بيقول هو عليه شوية ملحوظات لكنه بيجتهد وشغّال وعايز يكمل معانا وأنه أعطاه فرصه شهر يظبط كل ملحوظات السكان.
- فاكرين أول ما جه وكان شكله غلبان ويقول أنا تحت أمر الصغير منكم قبل الكبير.
- دلوقتي آجي اكلمه مايردش عليّا.
- دا كمان جايب عيلته كلها قاعدين في العماره، قال بيخوفنا عشان ماحدش من العماره يقدر يفتح بقه، وحجته إن فيه حراميه كتير حوالين العماره وهو عايز يمنعهم مايقربوش!!
- والأكتر من كده أنه وقّع السكان في بعضهم بنقل الكلام وتلفيق الحكايات لحد ما بقاش حد منهم طايق التاني وكل ده علشان يفضل هو قاعد.
- وده السبب إن احنا مش عارفين نعمل اجتماع لاتحاد الملاك علشان نشيله, كل واحد في العماره مش عايز يبص في وش التاني.
- وكل حاجة عايز يعملها بفلوس، مسح السلم بفلوس، تنضيف المدخل بفلوس، الاتصال بشركة صيانة الأسانسير بفلوس، غسيل العربية بفلوس، تطليع الحاجة للشقق بفلوس، دانا لو صبّحت عليه ناقص ياخد فلوس علشان يرد، وكل شويه يغلّي علينا واللي عاجبه يدفع واللي مش عاجبه يسيب العماره.
- والفكهاني الل قدّام العمارة ابن خالته... والسوبر ماركت اللي قصادنا بتاع عمه، والبنزينه اللي على راس الشارع بتاع نسايبه. بصراحه بقى مسيطر ع المنطقه كلها.
- المفروض إن له شهريه تنظيف سيارات فمن فضلكم حاسبوه عليها.
- هو ما عادش بينضف إلا لما ياخد في كل مره، هانعطيه كمان الشهريه؟؟!!
- انتوا اللي عودتوه على كده.
- والمفروض ان له شهرية زباله لا تقل عن 15 جنيه وكل واحد وكرمه بردو معاه عشان هو بياكل عيش معانا في العماره.
- يافندم هي فين الزباله اللي بتنشال، العماره مليانه زباله.
- بصراحه انا بقيت حاسه ان احنا اللي بناكل عيش جنبه في العماره... دا بقى حوت.
- دا باع شقتين من العماره لناس خلايجه من غير ما يستأذن اصحابهم وأخد فلوسهم وقال إيه هاصرفهم على إصلاحات في العماره... وقبل كده كان بيؤجر الشقق المفروشه اللي اصحابها مسافرين، دا ناقص يبيعنا، ما بيشبعش فلوس، وشه نحس ع العماره. من يوم ماجه والسكان في النازل، وشكلنا كده هانبيع العماره بسببه.
- ما هو انتوا اللي بتخلوهم كده، بيبقوا جاييين كويسين وغلبانين انتوا اللي بتنفخوا فيهم وتسكتولهم لحد ما يتوحشوا والآخر تشتكوا، اشربوا بقى!!
- ما عادش فيه بوابين كويسين دلوقتي ولو مشيناه يمكن ما نلاقيش حد تاني... وحتى لو هو جايب قرايبه وبلدياته معاه آهم عاملين عزوه في المكان علشان الحراميه ما يقربوش.
- وهي العماره عاد فيها حاجه تتسرق؟؟!!
- الطلبات هو المفروض ليه حاجه بسيطه بياخدها عشان في سكان بتبعته يجيب طلبات وما بتديهوش حاجه خالص وبيقولوا ان ده من مرتبه.
- لو سمحتوا اللي عليه فلوس صيانة وتطوير المدخل يبعت الفلوس عشان أنا بقى لي فتره بادفع من جيبي.
- ولو فيه مشكله في البواب بلغوني لحد ما يظبط معانا وهو بصراحه بيتعلم.
- السلام عليكم، نظرا لطلب السكان بأن البوّاب يمشي خلاص هابلغه دلوقتي انه يمشي آخر الشهر، وده بناءا على رغبة كذا ساكن، ممكن حد من السكان يتولى موضوع البوّاب ويشوف لنا واحد كويس على ذوقكم آخر الشهر... ولو سمحتوا اللي عليه فلوس يبعتها ضروري عشان علينا فواتير كتير... احنا بنمر بمرحله صعبه جدا في حياة العماره.
- هو ماله البوّاب الموجود، الراجل محترم وكويس، ليه نمشيه؟
- هو مين الناس اللي عايزاه يمشي... وليه ماحدش سأل ولا أخد رأينا؟؟
- هو بوّاب لا يعوّض... انا أتفق تماما انه محترم ولا يجب أن يرحل.
- البواب كويس، همّا سكان العماره ما بيعجبهمش العجب... ماهم مشّوا اللي قبله قبل ما يكمل شهر وقالوا بيحوي في العماره مجرمين ومتطرفين وعايز يأجر الجراش لناس تصلي فيه... ومشّوا اللي قبله واللي قبله واللي قبله، هما عايزين إيه بالظبط....؟
- نيابة عن سكان العماره أنا باقول البواب يجب أن يستمر.
- سألت الحاجه... وهي لا تعترض عليه وقالت انه نضيف وأمين ومجتهد وما بينامش لكن همّا سكان العماره اللي زباله ورخمين وما بيقدّروش.
- طيب هو مين بقى اللي عايزه يمشي.
- !!!!!؟؟؟؟؟؟
- كده أظن ان الأغلبيه معندهاش مشكله معاه.
- ياريت بعد كده لما يكون في حاجه نسأل الناس كلها.
- العماره دي ماشيه بالعكس.
- ياجماعه مش معقول كل ما ربنا يوفقنا لبوّاب كويس يطفش م المعامله السيئه.
- داهو سيادته اللي بيعاملنا وحش وبيبصلنا بصة احتقار وكأننا عبيد عنده... هي الآيه اتقلبت ولا إيه؟؟
- دا معلّق إعلان ممنوع ركوب الأسانسير بعد العاشره مساءا... وممنوع طلب ديلفري بعد الحادية عشره مساءا, وان بوابة العماره هاتتقفل الساعه 12 بحجة المحافظه على أمان السكان!!!
- ماهو عنده حق برضه, مش شايف الحوادث اللي بتحصل كل يوم حوالينا.
- انا تكلمت مع مدام... وبعد مناقشات قالت لي انها لا تعترض على بقاء البوّاب, وشرحت لي سوء التفاهم وأوجه الخلاف ووجدتها مقنعه وشرحتها للبواب أمس ولم ينكر أسباب الخلاف وتفهم الأمر... ومع ذلك قالّلي أنا مش هاقعد لحظه واحده لو حسيت ان حد من السكان مش عايزني او انكو ملّيتوا مني.
- رأيي اننا لا نترك البوّاب يلعب بنا أكثر من ذلك ولا يمكن أن نترك أعمالنا لنصلح بينه وبين السكان... ان كان لا يريد الإستمرار في العمل فليرحل، أنا أرى أن لا نستجيب للعبة الذئب والحمل التي يلعبها البوّاب معانا... هو بيبان طيّب وغلبان ومكسور وحنيّن لكن من جوه شرس وعنيف وعنيد وجبار.
- أنا معلوماتي بسيطه عن الموضوع لأني كنت مسافره... وعموما أنا مع رأي الجماعه ومصلحة الكل.
- جماعة مين ومصلحة مين يا مدام...!!!؟؟؟؟
- عموما كل اللي عايز حاجه يعملها أنا قافله عليّا بابي وماليش دعوه بحد انا اللي فيّا مكفيني مش نقصاكوا... ياكش العماره تولع باللي فيها.
ولما تعذر عقد اجتماع لملاك العماره أرسل مسئول اتحاد الملاك استطلاعا لرأي السكان على الواتساب كالتالي: هل توافق على تغيير السكان أم تغيير العماره؟
واقرأ أيضًا:
ستون عاما / أصداء رحلة ماليزيا1
تعليقات الأعضاء