بيقولوا ... عملوا لنا ..."كويز"
وأنا مخي ..... ده مخ معيز !!
أنا قلت أسأل ..... وأطأس،،،
عن حد يقول لي :
معنى لذيذ..........
للكلمة الأمورة ... كويز
الواد برعي ....كمنه بيقرا،
في الجرانين زي التلاميذ
قال لي :

يا حاج دي اتفاقيه
وهناخد ...فيها ... مهاميز
أكل وشرب ولبس يهودي
هيرطرط..... وبسعر يغيظ
واحنا مصانعنا ها تتشمع..
ودا طبعا شغْل الأساتيذ!
دا غير إنك .... مش عارف ،، !!
إيه اللي داخل لك م الأباليس؟
سم ..وسرطان.... وبلى أزرق!!!
زي ....ما راح الزرع ... فطيس!
قلت له :
طب إيه اللي غاصبنا يا برعي؟
قال لي: ما تخلي عندك تمييز
دا علشان إنتاج..... "نـبـروه"
يتباع في واشنطن ..وباريس
ماذا وإلا .... أمريكا هتزعل
وتاكلنا ..... عضم ..وبَـهْـريزْ !
قلت له بس كفاية فهمت !
قال لي عرفت معنى كويز ؟
قلت طبعا دي حاجة سهله
معناها:"......................"*
*".........." تعبير مصري يعني : ".............!"

 واقرأ أيضًا على إبداعات أدبية:
باسم أطفال فلسطين: جنين، كائنات خالية من الضوء، عفوا يا سيدتي!، الريح والورد، أطفال الحجارة، فين العَلَمْ..؟؟، أنشودة سجين، من أشعار الوطن اللاوطن  ، "خُبط" أصبحنا  ، رسالة من إفريقي إلى إيما لازارْ  ، من قصيدة لبغداد  ، قـلَّـةُ فَـهْـمٍ قـليـلَـةُ الأدَبِ !  ، تقوى ! ،  من ملفات المهجر ، ذكريات ومشاهد من الحرب