دايمًا تحلم بالمثالية
نفسك تبقى الدنيا نضيفة
وكله منظم مِيَّة المِيَّة
غاوي ترتب كل حاجاتك
وعلى السطر تمشِّى حياتك
تزعل جدًا م الهمجية

يا أبو القلب نضيف وبريء
بصراحتك معجب يا جريء
و ضميرك له صحوة قوية
بس أستنا يا ابن الناس
وافهم مفهوم الوسواس
لجل تحافظ ع النفسية

تيجي الفكرة وترمي الخيط
تمسك شيء هايف وعبيط
بس بيكبر بعد شويَّة
لما الفكرة تسابق فكرة
و انت وراها مُصِرّ بشدة
إنك تسابقها وتسْبَقها
لكن الفكرة هاتسبق هية

تزعل طبعًا حقك تزعل
إن الفكرة الهايفة بتقدر
تقلب راسك كل شوية

وعِيْشْ كئيب انت يا مسكين
واسهر متوترْ و حزين
علشان رجلك جت في الميَّة

لما اترمى قدامك خيط
م الفكرة أخدتة وكرّيت
واهي فكرة رمت بك للتانية

كان م الأول سيبها وطنش
ها تضايقك؟ انسى وما يهمش
واشغل نفسك بحاجات تانيه

وحاول تكسر مرة نظامك
في رتابِةْ و ملل أيامك
واخرج لسه أمل قدامك
واملى حياتك بالملاغية

ونضافتك دى كتيرة شوية
غسل الإيد من مرَّة لمِيَّة
لا قالت سنَّة ولا قال فرض
يا مخلوقْ من طين الأرض
إنسى طموحك في المثالِيَّة

 واقرأ أيضًا على إبداعات أدبية:
كائنات خالية من الضوء، اشرب واحمد الله ، الريح والورد، القضية، من ملفات المهجر ، ذكريات ومشاهد من الحرب، الشيخ عبيد ، قالت: هو الوداع  ، باسم أطفال فلسطين: جنين، عفوا يا سيدتي!، أطفال الحجارة، فين العَلَمْ..؟؟، أنشودة سجين، من أشعار الوطن اللاوطن، "خُبط" أصبحنا، رسالة من إفريقي إلى إيما لازارْ، من قصيدة لبغداد، قـلَّـةُ فَـهْـمٍ قـليـلَـةُ الأدَبِ!، تقوى!، بيقـولـوا ..: عملوا لنا كـويز!!، أصواتُ العربِ!، لماذا ...... لماذا ؟!!، شكرا لكم: سليمان خاطر