الحلقة الثالثة

"........يا صباح الخير يلي معانا يللي معانا ده الكـ......."
يا سلام على صوت أم كلثوم على الصبح كدة....... قمت من النوم لقيت طبق الفول بالبصل اللي هو على الترابيزة وجنبه كباية شاي تمام........ يا سلام عليك يا عبد العال يا مظبطني
فطرت وشربت الشاي ولبست ونزلت على الباشا الناظر أقدم فروض الولاء والطاعة فورًا........ ألله؟ أمال مين اللي قاعد مكانه ده؟
- صباح الخير
- صباح النور يا بني
- أمال حضرة الناظر فين؟
- أيوة يا بني أي خدمة؟
- لا أنا قصدي الناظر بتاعنا التاني
- مفيش هنا غيري ناظر يا بني إنت مين؟
- يا عم لا كان فيه واحد تاني هنا امبارح ده حتى......
- إمبارح الجمعة ومحدش بيجي هنا
- اصل............

"الفطار جاهز يا بيه يلا علشان العيال جاية"

آه ده صوت عبد العال ميجيش في حلم أبدًا
".....الدنيا هي الشابة وإنت الجدع......."
وكمان الشرق الأوسط كدة حقيقة طحن....... طبعًا فيه حاجات ثابتة في الحلم أو في الحقيقة منها طبق الفول بالبصل وكباية الشاي لا يمكن أحلم بغيرهم فطار.......... فطرت و رحت أقدم برده فروض الطاعة والولاء للباشا الناظر
- يا صباح الفل على معاليك
- صباح الخير يابني
- ده إيه الشياكة دي يا باشا؟ "وهو هو اللبس بتاع امبارح ده حتى فيه آثار بقع زيت إضافية"
"هز راسه مبسوط أوي"
- الأوضة عجبتك؟ "وبصلي نظرة اختبار ورمى عليا لبانة"
- طبعًا يا باشا مش كنتوا تقولوا إنها خمس نجوم؟ "لعيب يا واد يا شاذلي"
- ههههههههه جدع ياد يلا روح على الطابور وتعلالي بعدها أديك الجدول
..طبعًا الطابور على السريع كده هم تلات فصول أصلاً وقابلت السادة المدرسين بأه شوفوا معايا:
أستاذ حسان مدرس لغة عربية وتربية دينية: كرش طالع منه بني آدم وفوقه دقن وشكله راجل محترم أوي
أستاذ جميل مدرس رياضيات وانجليزي: عارفين الأوغاد بتوع السينما زمان اللي كانوا بيضحكوا دايمًا على البنات؟ هو ده بالظبط بالإضافة إلى إنه شكله ملوش غير وصف واحد زي كباية الشاي اللي فيها تسع معالق سكر (ملزق)
الأستاذ ناصر مدرس ألعاب ورسم وموسيقى وأي حصة فاضية مكان أي حد يدخلها زي العلوم دلوقتي لأن مفيش مدرس علوم: ده بأه شكله حكاية عارفين لما يجي في صفحة الحوادث يقولك خبر "عاطل غرر بقاصر" أو "القبض على عصابة لسرقة غسيل الملابس يتزعمها سباك"؟ مش بيبقى فيه صورهم؟ أهو هو ده أستاذ ناصر والغريب إن دايمًا دقنه طالعه نص نص مش عارف بيعملها ازاى
المهم بعد الطابور رحت للناظر آخد الجدول.......... دخلت لقيت معاه الملزَّ.... أستاذ جميل
- خد يبنى جدولك أهو هتدرس جغرافيا وتاريخ
- تحت أمر حضرتك "كده فل أوي"
وطى أستاذ جميل على ودنه وقاله كلمتين كده وبصلي بنظرة تحدى غريبة
- إحم إنت هتدي كمان انجليزي
- مش حضرتـ.........
- جتلي تعليمات من الوزارة دلوقتي ويلا على الفصل عشان متتاخرش
- تحت أمرك
مشيت طبعًا مقلكوش كنت بغلي وخبطت في مين؟
- لم أحلَّت بك العجلة يا بني؟
- مفيش والله يا أستاذ حسان متضايق شوية
- ولم هذه القنطرة والزهفرة؟
- إيه؟
- ما علينا لنا حرشفة بعد أن نقوجل بإذن الله
- بإذن الله "أهي حاجة مفهومة"
المهم رميت كل ده ورايا ورسمت التكشيرة اللي هيا وأنا داخل الفصل طبعًا لازم
بس فيه حاجة غريبة أوى مكناش بناخد بالنا منها وإحنا صغيرين........ لما دخلت الفصل العيال كانت واقفه قعدوا علشان أقولهم قيام وأصبح عليهم..... طب ليه ميخليهم واقفين؟
- قيام
- السلام عليكم ورحمة الله وبركاته
- وعليكم السلام ورحمة الله وبركاته......... وبركاته
"لازم واحد في الآخر يا إما كسلان يا إما بيستعبط"
- فين الطباشير يبنى؟ "مش لحد معين"
- مفيش يا أستاذ
" طبعًا ده اللي قاعد على أول دكة جنب الباب على الحرف ودايمًا في أي فصل هو بينصب نفسه مسئول الحاجات دي ولما يكبر بتكون عنده عقدة نقص على فكرة"
- طيب اجري هات من عند الناظر
- معندوش يا أستاذ
- أمال بتتنيلوا بإيه؟
- الأستاذ حسان بيبعتني أجيب من عم عبمجيد "وعلى وشه ابتسامة غريبة يا إما مش فاهم حاجة يا إما عته"
- "أمرى لله" بكام؟
- بجنيه وربع بس هو بيدينى جنيه ونص أجيب حاجة حلوة "ونفس الابتسامة على وشه"
طبعا إديته جنيه وربع بس......... هو أنا هاصرف على الوزارة وكمان عليه؟...... المهم الواد راح وجه هوا بس برده بصيت على الطباشير لقيته ميفرقش عن بتاع الوزارة في حاجة ده حتى مكتوب عليه: "طباشير الوردة البيضاء..... طباشير طبي فاخر خاص بوزارة التربية والتعـ........."  نااااااااعاااااااااام........... آه يا حرامية
جريت طبعًا على الناظر مينفعش أسكت
- وإيه يعني؟
- ده احتمال كبير يكون مسروق من عندنا
- وإيه المشكلة ماهو من عندنا فعلاً
- ده كده يبقى أمين المخزن بتاعنا حرا........
- أنا أمين المخزن "وبصلي بتحدي"
- ............"سكتّ مش عارف أقوله إيه"
- بص يابني أنا هقولك إحنا الوزارة بتدينا الطباشير ده ببلاش وإحنا بنبيعه لعم عبد المجيد بخمسة وسبعين قرش ونكتب طلب شراء لأن الصنف غير موجود بالمخازن ونبعت العيال تجيب من عند عبد المجيد العلبة بجنيه وربع...... "علشان كده الواد كان عمال يبتسم بس أما أطلعله"......... شفت بأه إحنا فاتحين كام بيت من علبة الطباشير دي؟
- بس يا حضرة النا......
- خلاص............ يلا على الفصل
طبعًا طلعت على الفصل مخنوق أوي بس العيال ذنبهم إيه........ وطلع عيني طول النهار في الحصص بس والله العيال كويسين بس عاملة عندهم عقدة الفرق بين البحر والنهر والبحيرة والمحيط والترعة والرياح.......

 ترررررررررررررررن 

....... أحلى جرس فسحة سمعته في حياتي وكان هاين عليا أقول هيـه مع العيال......... نزلت لقيت أستاذ ناصر قاعد بيتشمس
- ده إيه المزاج ده
- نعم؟ "وهو باصصلي نظرة غريبة أوي........ عارفين نظرة طفل أول مرة يشوف الدودة بالتلزيق اللي عليها كده؟"
- يعنى بصبح عليك......... أنا أخوك الشاذلي
- وهو ده اسم تقابل بيه ربنا ده؟ ومالك فرحان كده ليه؟
- إيه يا عم مالك فيه إيه ده أنا قلت أتعرف عليك بس
- أقعد أقعد.......... إنت شكلك غلبان وهتتاكل هنا
- ليه يا عم ده أنا طيب
- هو فيه حد هنا طيب أصلاًً
- قصدك على مين؟
- عندك الناظر مثلاً ما يعلم بيه إلا ربنا وخلي بالك منه لأنه هيأذيك
- دي عارفها
- والأستاذ جميل لو طال يشرب من دمك هيعملها وهيأذيك
- دي باينة أوي
- والأستاذ حسان.....
- ماله ده راجل طيب
- طيب آه مقلناش حاجة بس بيتكلم علطول كلام متفهموش وده هيأذيك
- برده نظرية
- وأنا بأه لو ماغورتش من وشي دلوقتي هأذيك
طلعت أجري من وشه طبعًا ده إيه المجنون اليائس ده.............. المهم رحت بعد الفسحة كان فيه حصة انجليزي عيال زي الفل بس كل الحروف عارفينها وكل ماقول حرف F يضحكوا أوى مش عارف ليه...... ترررررررررن.......... الحمد لله أول يوم خلص على خير لما أشوف بأه عبد الـ......
- ألم نتفق يا عزيزي الشكرم على أن نحرشف بعد أن نقوجل؟
- ساعات
" والله منا فاهم حاجة"
- فلنجعلها غدًا في الصرمقة بإذن الله
- بإذن الله "اللي بفهمها منه"
بس كده العيال مشيوا ويوم كمان يبتدي فيه هند والمارد وحاجه تفلق.......... طيب لو المارد ده ملوش حل ولا علاج؟........ علاج.... آه........ ممكن أدور
- قولي يا عبد العال
- أيوه يا بيه
- هو مش فيه هنا مشايخ؟
- كل جامع وله شيخ
- لا أنا قصدي واحد بركة كده
- الشيخ مخلوف
- وده حلو ده؟
- مفيش كلام "بثقة كأنه بيقول اسمه"
- طيب متشوفهولنا كده يطلعلنا المارد ده من هنا
- عينيه يا بيه إطلع إنت ارتاح وأنا اجيبهولك بعد المغرب إن شاء الله
يا سلام كدة الواحد حل كل مشاكله أرتاح بأه على ما الشيخ ده يجي.......... بما إنى كنت في الكشافة زمان وكان شعارنا كن مستعدًا فأنا عديت كده على ال WC في السكة......... آه الواحد ميضمنش يصحى على إيه المرة دي........ سلام بأه علشان مينفعش تيجوا معايا أشوفكوا لما أخرج .

هاني مختار
goodman_egy78@hotmail.com

 واقرأ أيضًا على إبداعات أدبية:
    يوميات شاب (1)، يوميات شاب(2)، باسم أطفال فلسطين: جنين، كائنات خالية من الضوء، عفوا يا سيدتي!، الريح والورد، أطفال الحجارة، فين العَلَمْ..؟؟، أنشودة سجين، من أشعار الوطن اللاوطن، "خُبط" أصبحنا، رسالة من إفريقي إلى إيما لازارْ، من قصيدة لبغداد، قـلَّـةُ فَـهْـمٍ قـليـلَـةُ الأدَبِ!، تقوى!، من ملفات المهجر، ذكريات ومشاهد من الحرب، بيقـولـوا ..: عملوا لنا كـويز!!، أصواتُ العربِ!، لماذا...لماذا ؟!!، شكرا لكم: سليمان خاطر، توهان !!!، يابتاع الفول والطعمية، إلى مكتئب، إلى مريض الفصام، إلى مريض الوسواس، منتهى العقل، فين المصري؟؟؟  ، توهان !!!، همسة إلى مدخن، إلى مريض الهوس، ((على أسلاك التليفون..))، طفلة البحر، إلى مريض الانشقاق، ((جدد سكنك))، ((دفتر الحياة))، ((موعد من غير ميعاد ولكن.....))، النهر الراكد، إلى مريض الانشقاق  ، مذكرات شابة مجنونة(1)، مذكرات شابة مجنونة(2)