تاراباتاتووووو7 ::

الكاتب: أ. أميرة بدران
نشرت على الموقع بتاريخ: 29/01/2007

تاراباتاتووووووه6 

الباقي لو سمحت!!

الفلوس طبعا إحنا عارفين أد ايه هي مهمة! و علشان كده لما نقرر إننا ما نصرفش منها جزء يبقي علشان هنوفر أو علشان فيه حاجة ثانية كمان غالية... ألا وهي مشاعرنا نحو الأحبة!!

كل ما أركب أي مواصلة بيبقي فيه باقي والباقي يعني فلوس وقلما ألاقي فلوس مش مكتوب عليها حاجة وطبعا أشهرها للذكري الهباب وأيام العذاب، لكن فيه حبي ليك مش هينتهي.. وحبك نار.. وحبيبي على طول.. ومني واحمد وأتمنى لك مستقبل باهر والتقدم مش عارفة تقدم في بالضبط!! لكن اهو تقدم وخلاص.

كل دي مشاعر كانت بين اتنين وعلشان يحافظوا عليها من الضياع قال إيه كتبوها ع الفلوس فمفيش أغلى من الفلوس لما استغني عنها علشان حبيبي ويا ريت فلوس دة بالكتير قوي بيبقي ربع جنيه وانت نازل ولامؤاخذه، وأسأل نفسي يا تري ليه الأحبة بيفرطوا في المشاعر دي اتزنقوا مثلا في الربع جنيه ده؟ ولا خلاص الحب راح ولا مفيش حب؟ ولا إيه النظام بالضبط؟
دي بقت دليل إدانة ونسيان مش دليل حب وعرفان صحيح اللي اختشوا ماتوا وكل يوم الواحد بيشوف إننا علي رأي الست ظلمنا الحب وهو بريء من عمايل المحبين السودة لأنهم أصلا نصف كم، وعلي رأي اسمو ايه كتكوا الأرف ماليتو البلد!!

كنت عاوزه أكلكع الموضوع وأتكلم عن بعد نفسي فيه مش عارفه يمكن أرجع ثاني أتكلم فيه.