أحسن تستاهل: تصدق كده عيب!! ::

الكاتب: مها الكيال
نشرت على الموقع بتاريخ: 29/05/2007

تصدق كده عيب، لما تشوف الغلط أدامك وتقول: وأنا مالي؟
تصدقوا كده عيب، لما نبقى عايشين في بلد بتدور ع الكويس وتقضي عليه، وتدور ع الفاسد وتهربه وع الظالم وتفرعنه وع الحرامي وتخبيه وع المفتري وتنفخ فيه!!!

تصدقوا كده عيب، لما شرطتنا تتخذ معاك "إجراء معتبر، واخد بالك انت!!" مش لحاجة غير إنك فكرت فكرت بس فكرت إنك تدخل تعمل محضر أو تبلغ أو تزور حد أو حتى تعدي من أدامهم بالصدفة؟
تصدق كده عيب، لما تقفل بؤك وتسكت عن ظلم شفته بعينك وخايف تقول الحق؟
تصدق كده عيب، لما تجامل حد وما تغلطوش، عشان صاحبك أو ليك عنده مصلحة؟
تصدق كده عيب، لما تبقى غلطان وتكابر؟
تصدق كده عيب، لما تفرض نفسك على ناس مش عايزينك انت حاسس إنهم مش عايزينك... بس نقول إيه بقى - باراشوت-؟
تصدق كده عيب، لما تروح تصلي في الجامع وانت لابس هدوم مكرمشة أو مش نظيفة لمجرد أداء الواجب، يا إما بابا غصب عليك تنزل تصلي الجمعة معاه أو أهو رمضان بقى والأصول ننزل نصلي في الجامع أو فعلا عايز تاخد الثواب بس مفيش أدب مع ربنا بالمرة، وف نفس ذات الوقت تقف أدام المراية 18 ساعة عشان نازل مع صحابك؟

تصدق كده عيب، لما تبقى كبير كده وتقعد تتنطط أدام ماتشات الكورة في التليفزيون وبتكلم اللعيبة كإنهم أدامك ومش عارفين يلعبوا وانت اللي ما شاء الله عليك الخطيب، لأ ومستغرب إنهم مش سامعين كلامك وبرضه بيلعبوا بنفس الطريقة؟
تصدق كده عيب، لما تبقى مدير أو حد كبير في شغلك وتحطم اللي أقل منك وتحبطهم وتستهزأ بأفكارهم وبعدين نتخض من هجرة العقول المصرية إلى الخارج.
تصدق كده عيب، لما يحتاجلك صديق واقع في أزمة فتعتذر عن مساعدته لأنك مش فاضي وتجيب أعذار من كل مكان في الدنيا من كل بقاع الأرض؟
تصدق كده عيب، لما تبقى شايف أدامك الشارع -وإن واي- وتصر إنك تمشي عكس الاتجاه، لييييييييه؟ هو كده!!
تصدق كده عيب، لما تبقى شايف بنني عينك طوابير قطع التذاكر أياً ما كانت فين وتقوم واخدلك جنب كده وتزاحم وتعمل طابور مع نفسك، لأ وتقاوح لما حد يقولك الطابور يا أفندي!!
تصدق كده عيب، لما تقابل واحد صاحبك من أيام زمان وبدل ما تسلم عليه وتبتسم في وشه -صدقة يا بني آدم-، تعمل عبيط ومش شايفه وتبص لفوق وتصفر وتحط إيدك على رأسك قال بتبص على حاجة بعيدة، زي البحارة اللي قالوا: فيه جزيرة هناك يا سندباااااد!!
تصدق كده عيب، لما تديها كلاكسات تحت عمارة ومستني صاحبك، وعلى ما يطلع بطلته البهية يبصلك م الشباك تكون مصر جالها صداع نصفي وصحيت أطفال الجمهورية وقلقت منام الشقيانين وأزعجت التعبانين؟

تصدق كده عيب، لما تبقى قاعد في الميكروباص ومستكنيص كده وواخد راحتك كإنك قاعد على كنبة بيتكو ومش عامل حساب البنات اللي جنبك -على فكرة بقى بنبقى مش طايقينكو بالمرة، هه!!-
تصدق كده عيب، لما تبقى حقنة، وأستاذ أسافين ومقالب، ففففففففففف!!!
تصدق كده عيب، لما تخون أعز الناس ليك وتطلع أسراره لمجرد إنه طلع أهبل ووثق فيك.
تصدق كده عيب، لما تبقى واحد عاقل كده ولسه بتبعت ماسيجات على قنوات الأغاني وعايز تتعرف على واحدة هايفة بجد وتقدس الحياة الزوجية -يا عيني-!!!
تصدق كده عيب، لما تمد إيدك في جيبك وتطلع خمسة جنيه تمشي بيها أمورك عشان الموظف اللي أدامك مش عايز يسلك وينجزلك شغلك؟
تصدق كده عيب .........................................................

أنا لو فضلت ع الحال ده كتير مش هخلص، لأننا يا ما بنعمل في حياتنا بنبقى محتاجين اللي يطلعلنا ويشدلنا ودانا ويبرقلنا ويضيق عين ويبص بالتانية ويقولنا: تصدقوا كده عيب!!!!