أحسن تستاهل: أنا وصحبتي ::

الكاتب: مها ميهو
نشرت على الموقع بتاريخ: 30/09/2007

ما أنا عارفكو روحين في روح واحدة .. قالها وهو ما يعرفش اللي بيني وبينها غير يادوب حبة صغيرين آاااااااد كده، إنما إحنا اللي بينا أاااااكبر من كده.. أنا وصحبتي، هي صحيح بنت خالتي إنما برضه صحبتي.. ضحى ده اسمها.. أحلى ما فيها ضحكتها.. عينيها فاضحة شقاوتها وخفة دمها.. القاعدة معاها ما تتعوضتش، وهتلاقي نفسك وأنت معاها بتقول جملتها المشهورة: "والله أنا مبسوطة أوي.. أنا جاية ليه بقى!!".

ليها ابتسامة مرسومة بلمسة فنية رائعة على وجه ذو بشرة سمراء سمار هادي وجميل، غير الله يجازيها الشمس اللي سابت بصمة قوية مش قادرة عليها كريمات الشمس اللي صرفنا أنا وهي دم قلبنا عليها.

لحظة ما بتضحك من قلبها لازم ابرقلها: "يابنتي صوتك عالي!!"، وبرضه نكمل ضحك، لكن بصراحة ضحكة جنان. ضحى.... كلما وقعت عيني على ذلك الخاتم في إصبع يدها اليمنى تذكرت خطيبها الذي صار يقاسمني حبها فأجدني أغمز لها وأنا أشير للخاتم وأقول: "ضحى.. إيه ده؟!" فأرى وجهاً يكسوه خجل تزينه ابتسامة وتقول:"ما عرفش!". أصبحت أخاف من ذلك اليوم الذي سترحل عني ضحى للقفص الذهبي، وأنا أفضل لوحدي من غير ضحى!! يا للفاجعة. "اشتغلي معاها عشان تلحقوا تقعدوا مع بعض حبة حلوين".. ناني صحبتي قالتلي كده.. إيه ده؟ ده بجد بقى!! لاااااااااا ده إحنا لازم نرجع نسجل شرائط لقعاداتنا زي ما عملنا قبل كده.

لازم اعترف إن الفترة اللي فاتت مريت بحالة من الجمود الفكري وشلل في التفكير وصعوبة في تشغيل الدماغ، ولم أكن أعلم أني في حالة حرمان من كتابة العديد من الموضوعات التي تحمل في طياتها مثل هذه المتعة، ويا رتني دخلت حالة ذوبان الجمود ده من بدري لتكون هذه السطور هدية لها في عيد ميلادها الذي اقتصر الاحتفال به على شوية التخبيط على ترابيزة السفرة وأنا بطبل وبقية أفراد الأسرة مشكلين أحلى كورال وبيغنوا النشيد القومي بتاع كل عيد ميلاد: "هابي بييييييييرث داي تويووووو، وسنة حلوة يا جميل، وياللا حالاً بالاً هنوا أبو الفصاد".

قبل أن أكتب موضوعي هذا على مدونتي كتبته وأنا في المترو في طريقي للشغل وواضح إني كنت مبتسمة أو على وشي حاجة لأن الراجل اللي قاعد أدامي هيموت ويعرف أنا بكتب إيه. وأنا لابد أن أعترف أن كلامي عن صحبتي دائماً وأبداً يصاحبه ابتسامة مني وضحك ف سري على مواقف وطرائف من أحلى ما تكون كثيراً ما تعرضت للضحك رغماً عني وأنا أسير وحدي في الشارع لأنه والله أعلم هيتقال عليا: "المجنونة أهه أهه!!".

اقض يوماً معنا تسمع أحلى قفشات وأعلى ضحكات وألذ حركات وأتحداك إن لم ينته اللقاء معنا وقد صرنا أصدقاء.

ضحى.. لأنك أكتر واحدة عارفة طبيعة اللقاء بيني وبينك بعد غيبة طويلة بتكون عاملة ازاي وغير أي اتنين واحشين بعض، ولأنك أكتر واحدة عارفة مها وهي مش عارفة تعبر عن اللي جواها ليكي غير ع الماسينجر، ولأنك أكتر واحدة بتعذرني لما بسيبك وأنام وأنتي سهرانه عندنا، وبصرف النظر عن تقليدي وأنا بشرب عصير جهينة بمزاج ده غير الحاجات اللي مسكاها عليا يا بنت الذين ومش هقولها عشان منظري وبرستيجي اللي لا يمكن أضيعه، عايزة أقولك إنه لو جرالي حاجة يا بنتي اعتبري درفة الدولاب بتاعتي اللي فوق ليكي بكل ما فيها، صدقيني بقولها بكامل قواي العقلية.
ضحى.. بحبك أوي جداً خالص

واقرأ أيضاً:
أحسن تستاهل: ورأيته  
أحسن تستاهل: تصدق كده عيب!!
أحسن تستاهل: أشرف الكل
أحسن تستاهل: ومضى........