يوميات مجنونة صايمة: رمضان ::

الكاتب: أ. أميرة بدران
نشرت على الموقع بتاريخ: 16/09/2007

يوميات مجنونة صايمة مقدمة

...يا تري الناس كلها بتبقي شمّة ريحة رمضان زيي؟!
الشارع بيبقي شارع رمضان... والزرع والخضرة بتبقي زرع رمضان
والهوا كمان بيبقي هوا مخصوص لرمضان... حتى الناس بيتغيروا وبيبقوا ناس رمضان رغم احتفاظهم بنفس ملامحهم
رمضان هو هو ما بيتغيرش
رمضان هو هو ما بيكبرش
ليه إحنا اللي بنتغير وليه إحنا اللي بنكبر؟
زمان كنت انزل العب أنا وأخواتي مع أصحابي بالفانوس ونقعد نقول حالو يا حالو ونفرس ف بعض علشان نثبت إن فوانيسنا أحسن من فوانيسهم،
وكنا بنلعب بالكورة بنات وولاد والواد حمادة الرزل كان عليه كف أعوذ بالله ضربني علي قفايا كتير قوي الواد دة،
معلش مسيرها تتردلوا ولو بعد عشر سنين وبالشبشب،
بس هو كمان كبر وبقي مهندس وكبه كدة يووووة أستغفر الله العظيم اللهم إني صايمة.
طب هو ليه ما ينفعش نعمل اللي كنا بنعمله زمان؟ هيحصل إيه يعني لو شلة ستات نزلت لعبت استغماية ولا نطة الحبل والأولي ما الرجاله بيلعبوا كورة لغاية دلوقتي؟
زمان كنا بنلعب من غير ما نفكر ونحلم من غير حسابات.
دلوقتي بنفكر بألف حساب وحساب من غير ما نعمل ولا حتى نحلم.

هو أنا اللي اتغيرت ولا رمضان
هو انا اللي كبرت ولا رمضان؟
ولا هتقولولي بقي سنة الحياة يا عاقلين؟؟؟

عيني ف عينكم كدة.....

واقرأ أيضاً:
تاراباتاتووووووه (13)