يوميات مجنونة صايمة: تاكسي ::

الكاتب: أ. أميرة بدران
نشرت على الموقع بتاريخ: 19/09/2007

يوميات مجنونة صايمة رمضان  

يوووووه فاضل ساعة ونص بس على الفطار يا ربييييييييييي
والدنيا حر موووت ومش عاوزة اهبّط من المواصلات الخنيئة دي
أنا هاخد تاكسي وأمري لله أهو اشتري نفسي وألحق أخلص اللي عليّ من القرآن قبل ما ماما تبتدي الموشح بتاع تحضير الفطار بتاع كل يوم

تاكسي تاكسي
ايوه المعادي يا اسطي
اتفضلي
أنا ممكن كده ألحق أخلص اللي عليّ من القرآن واحضر كمان مع ماما الفطار برضه بس أقول لعمو ده يشهل شويه
أيوه يا اسطي ممكن تشد شوية أنا مستعجلة
لا يا مدام مستعجلة اتفضلي انزلي وخدي تاكسي تاني

تاكسي تاني يا نهار مدوحس ومش باينلو منظر!.. مش كفاية كلمة مدام اللي خرمتلي وداني وكمان عاوزني أنزل؟ إنت ازاي تقولي كده؟!!!!!!!!!
آه كده ونص العمر واحد والرب واحد ديك النهار كنت هلبس في نقل عشان واحده زيك مستعجلة بلا مستعجلة بلا مش مستعجلة مش عجبك ورينا عرض كتافك
يالهويي مش مصدقة وداني انت ازاي تكلمني كده
هو إيه ده؟

لازم الخطة (b) أنا مخسرش معركة أبدا وديني وإسلامي ما انزل أبدا بعد ما ركبت إن شاله أفطر في الشارع
أنت زعلان كده ليه يا أسطي كل دة عشان قلت لك مستعجلة
أنا ركبت التاكسي عشان مستعجلة والله
ما هو أنت برضه يا مزمازيل داخلة حامي قوي ومستعجلة وبتاع يعني يرضيك أروح فيها؟

لا طبعا ولا يهمك خلاص براحتك
لا والله وعشان ذوقك أنا هجري وان شاء الله تلحقي معادك
كتر خيرك يا اسطي كلك ذوق

أول مرة أحس بكلمة شيخ الجامع!! "دايما بسمع كلامه إنه وعظ وخلاص لا حاسس بيا ولا بيقولي اعمل ايه في حياتي
مش عارفه إيه اللي فكرني بأنه قال أن الكلمة الحلوة صدقة!!
وكلمة صدقة تحديدا مش كلمة تانية زي مفيدة أو غيره
لكن صدقة لأني فعلا بذلت مجهود غلبت فيه نفسي إني اخد حقي واغضب واكسر نفوخه خصوصا كلمة مدام دي
والصدقة فعلا فيها بنبذل مجهود لأننا بنتنازل عن حاجة عاوزنها ومحتاجنها وعمرها ما بتنقص من اللي عندنا أبدا دي بتكسبنا كمان
دلوقت بس حاسة إني مش بوعظكوا

اهديني يااااارب

واقرأ أيضاً:
تاراباتاتووووووه (13)