يوميات مجنونة صايمة: النقاب ::

الكاتب: أ. أميرة بدران
نشرت على الموقع بتاريخ: 20/09/2007

يوميات مجنونة صايمة: تاكسي

أنا نفسي أعمل حاجة في رمضان أرضي بيها ربنا لحسن الواحد بقى شكله وحش قوي قدامي نفسه.
صحبتي مها طلعت عمرة وناني دخلت في الخاتمة التانية وماما ما بتسيبش السبحة ليل ونهار وبابا ما بنشفهوش من بعد العشاء إلا قبل السحور وأنا هفضل كده بقى ولا إيه؟
أنا لازم أعمل حاجة كبيرة أنا كمان لازم لازم لازم هه بس
آه أنا هلبس النقاب وبرضه الأجر يبقى مضروب في ..........70 والله فكرة تمام
وممكن دلوقتي وماما نايمة أنزل أجيب الحاجات اللي عاوزينها من عند عم محمود وأهي تبقى بروفة
- فينو فينو نقاب خالتو كان موجود هنا آه أهوه الحمد لله
- أي أي رجلي إتلوت معلش معلش هي الطلعة الأولي بتبقى كده دلوقتي أفتح ع الرابع
 
أنا حاسة إني لوحدي قوي رغم الزحمة اللي في كل مكان وحاسة بإحساس غريب يمكن فيه شوية غموض وأنا بحب الغموض بس مش قوي كده
هي الناس كلها بتبص عليا ولا بيتهيألي؟
يا عم محمود هاتلي ربع رومي وتمن زتون أسود و3 زبادي طازة
حاضر يا أختي حاضر يا حاجة
أختي.. حاجة!! هو إيه اللي حصل؟
إيه حاجة دي أنت مش عارفني يا عم محمود؟
حاضر والله حاضر

- أيوة يا عم محمود يا عم محمود آه آسف جدا والله تفضلي حضرتك الأول آسف آسف
- يخيبك يا حمادة من إمتي بتتأسف يا خويا لا وحضرتك كمان ما أنت طول عمرك بتزقني بكتفك عشان تمشي الأول والله العظيم يا جدع
- يا أختي والله ممكن أسألك سؤال
- أنا؟
- إتفضلي طبعا إتفضلي
- أنا بقالي تسع سنين مش بصوم رمضان يا حامل يا برضع أعمل إيه؟
- أنت بتسأليني أنا؟
- أنا الحقيقة معرفش خالص ممكن تسألي شيخ أو حد بيعرف الحاجات دي
وحضرتك متعرفيش إزاي؟
- زي الناس معرفش وبس
هات يا عم محمود شكرا سلام عليكم

الشكر لله يا حاجة دعواتك
استغفر الله العظيم يا رب هو في إيه؟
هو إيه اللي اتغير بالضبط ما أنا هو أنا والناس هي الناس هو النقاب معناه إيه؟
سيكولوجيا بنات كتير بتلبسه علشان عاوزة تحقق وجودها اللي مش عارفه تعمله بشكل تاني
أو قيمة بتحصل عليها بسهولة لأن بيتوسعلها السكة وبيتم تبجيلها واحترامها أو بنات بتداري عدم ثقتها في نفسها أو بتمارس انطوائيتها بشكل يظهر إنو مش مرض
والناس كمان بتحط المنتقبة في خانة عجيبة من التميز والملائكية والعلم بمجرد ما يتلبس!!!

أكيد مش بننتقد النقاب أو أقصد أي معنى مقصدهوش أنا بحبه على فكرة بس بحاول أفكر بعمق أكتر فيه
رغم اعترافي إن فيه بنات بتلبسه طاعة وفضل ودرجات علا
لكن أنا طبعا قررت إني لازم أرضي ربنا بحاجة تانية أهمها إني أعرف ديني بجد.

واقرأ أيضاً:
تاراباتاتووووووه (13)