يوميات مجنونة صايمة... الفار ::

الكاتب: أ. أميرة بدران
نشرت على الموقع بتاريخ: 06/10/2007

يوميات مجنونة صايمة الاكتئاب، الزواج

- نيااااهاااا أفشتك أخيرا.. وعامليّ ابن بارم ديلو. بقالك اسبوع قالق منامي رايح جاي.. جاي رايح من جوّة الدولاب لتحت السرير ايه انت فاكر نفسك في جحر أبوك؟؟؟

- لا العفو طبعا دة جحر أبوك إنت.

- يامه!.... ايه ده حلم دة ولا علم إنت ب ب ب بتتكلم!!!!!

- أنا بتكلم طووووول الوقت ومحدش بيسمعني أنا اللي مستغرب ان المرة دي انتي سمعتيني!

- هههههه بتتكلم طووووول الوقت.. بتقول ايه يعني ياخويا دا انت يا دوووب حتة فار

- أنا عارف إني فار بس مش كل الفيران زيي كدة.. أنا بتقهر وانا بتفرج من تحت السرير علي الفيران اللي في التليفزيون الحلوة اللي الناس بيحترموها وينضفوها ومعتبرنها كائن محترم ياكل ويشرب ويدلّع دول بيحموهم بالشامبو!! مش انا هنا جربوع جعان مش لاقي حتة لقمة ناشفة ولو مرة الدنيا ضحكتلي ولقيت واقع منكو فتفوتة جبنة رومي ولا حتة قوطاية معفنة تهللوا وتعملوها فضيحة إني بطفح معاكو

أنا كمان تعبان وقرفت عالآخر وبقيت مستني الشبشب في أي لحظة ينزل فوق نافوخي أو مصيدة تبقي مترتبالي ومتوضبالي مخصوص وياويلي يا سواد ليلي لو فكرت اتجوز عشان يبقيالي عيلة وعزوة.. طبعا هشيل الهمّ الأغبر عشان الاقي جحر عدل والاقي فارة ترضي بيا وانا مش لاقي حتي أاكل نفسي لقمة ناشفة

- انت بتقول ايه؟ انت مجنون؟ هو المفروض اننا نسيب الفيران تكبر وتكتر وتكرش ولا ايه؟

- لاء العفو المفروض القطط هي اللي تكبر وتكتر وتكرش من كتر ما بتكلنا.... ليه ما تفكروش اننا ثروةبدل ما تفكروا اننا كارثة دا نتوا ممكن تعملوا بينا مشاريع وتجارب تخليكوا فوق ف العلالي هما بره يعني لما بيربوهم ويستخدموهم بيبقوا كفروا؟!

- والله العظيم أمرك عجيب يادي الفار أنت أهبل يالا؟

- أهبل!........ لاء أنا كنت أهبل لكن أنا بقي فكرت وهلم كل فيران الحتة واعمل حركة اسميها حركة "انا موجود وهاخد حقي" بدل ما انتو قرفنا مرة بحركة "مفيش" ومرة بحركة "بح"

- هههه حقك؟ حقك ايه يابو حقك انت؟ هتفضل فار أي حد يشوفك مش هيفكر غير انك بق مفتوح عاوز ياكل ويشرب فالاحسن تتساب كدة تلف حوالين نفسك عشان تضمن تعيش أو اننا نسلط عليك القطط الكبيره الجعانة اللي مابتشبعش ابدا تكلك هم يام في قطمة واحدة ولو انت حظك حلو وشادد حيلك هتتعبنا شوية لغاية ما نقفشك وتاخدلك شيبشبين يدوخوك أو يريحونا منك في دقيقتين وكان الله بالسر عليم

- هههههه... سيبيني أنا بقي اللي اضحك المرة دي.... أصل الدنيا اتغيرت والقطط مابقتش متفّقه كفاية وبقت بتقطّع علي بعض وبتاكل اكل بعض مش كلهم سيامي وناعمين! ومادمت ميت ميت يبقي اعمل حاجة بقي قبل ما اموت

بصي بصي بصي فررررررررررررررررررر

- ايه فررررررررررررر دي انت اتهبلت؟

- يالهوييي ايه ده! ايه دة!.. كل الفيران دي كانت مستخبية فين كانوا قاعدين فين؟؟؟

ياماما يا ماما الحقيني يا ماما الفيران كترت وبقت اكتر م القطط الحقيني يا ماما طب دخلولي قطط.. طب حد يناولني الشبشب

الحقونيييييييييييييييييييييييييييييييي

واقرأ أيضاً:
تاراباتاتووووووه (13)