رمضان،، قبل ما تمشي خد تعالى أما أقولك ::

الكاتب: مها ميهو
نشرت على الموقع بتاريخ: 10/10/2007

رمضان.. على فين؟؟ أنت ماشي؟؟ هو أنت لحقت؟؟
طب خد تعالى عايزاك في كلمة.. شوية بس مش هأخرك.. عشان خاطري اقعد بس
رمضان.... قبل ما تمشي لازم تعرف حاجة مهمة أوي.. أنا عارفة إنك حاسس بي بس أنا لازم أقولهالك
رمضان أنا بحبك أوي.
 
أنا بحبك عشان بتبقى جاي ومعاك ريحة الجنة والثواب والحسنات والمغفرة والرحمة،
أنا بحبك عشان أنت جاي هدية من عند ربنا،
أنا بحبك عشان أنت بتبقى داخل خلينا فاتح دراعاتك،
بحبك عشان بحس معاك بقرب ربنا،
بحبك بكل ما فيك.
 
لما بآجي من بره وأجري ع السرير قبل ما أتدبس في عمايل السلطة والعصير وأنام لحد أذان المغرب.
لما كنت بشوف الهلال وأنا صغيرة وأخاف منه وأقفل الستاير وأغمض عيني وأنا ماشية من جنب أي شباك... بيني وبينك لسه بخاف منه لغاية دلوقتي.. بس دي خليها ف سرك
لما بقعد أفتكر كل الناس اللي بحبها وأنا بدعي ساعة المغرب والتمراية تبهدلي إيدي م التلزيق

قاعدة الشاي بلبن وإحنا بنتفرج على عمرو خالد،، قمر الدين اللي بشربه بالعافية،، القطايف اللي بحبها بالفول السوداني بس
التراويح والتهجد مع ناني وأمورتي الحلوة،،، السنة اللي الناس كلها وقفت تصلي التهجد وأنا ورولا كنا نايمين على نفسنا فيها فخلصنا أول ركعتين وجرينا اتغطينا وقلنا للي معانا: صحونا بأه ع السحور، تصبحوا على خير.
 
قعدتي لوحدي في الأوضة ساعتين تلاتة بالمصحف وسجادة الصلاة والكرسي اللي بسند عليه المصحف عشان يبقى جنبي وأنا بصلي
المسحراتي اللي بيخوفني في سني ده!!! أيييييوه محدش ليه دعوة بخاف منه والله.
كل ده يا رمضان وبرضه مصر تمشي؟؟

طب استنا.. استنا بأه.. يا ساتر... أنا لسه ما خلصتش كلام
عارف يا رمضان .. لما ببقى معاك .. بحس إني كويسة أوي.. بصراحة بحبني تلاتين يوم بحالهم .. بحبني كده وببقى مبسوطة بي أوي
بس عايزة أقولك إني السنة دي غير أي سنة... صحيح مش كويسة زي رمضان التحفة اللي كان من تلات سنين... إنما ............... رمضان.. رمضان.... رمضاااااااان..... أنت نمت مني ولا إيه؟ لأ صحصح أمال كده

ها، كنا بنقول إيه بنقول إيه.. آه
كنت بقولك السنة دي كانت أول مرة أسمع جملة إن ربنا بيتودد إلينا.. أو يمكن سمعتها لكن أول مرة أركز فيها بالشكل ده
إيه ده !! ربنا بيتودد لينا إحنا؟ ربنا يا رمضان!! يااااااااااااه بجد أنا حاسة أوي بالحتة دي
واضح إن كل سنة بيبقى عندي إحساس جديد بعيش بيه طول الشهر يا رمضان
رمضان.. أنا عايزة أحملك أمانة يا رمضان
رمضان .... سامعني كويس

قول لربنا إن قلبي ابتدى يعرف معنى التسامح.. بقول ابتدى يا رمضان، يعني لسه في الأول خالص... آه... أصل فيه ناس بتفرح
قول لربنا شكرا ع الخير اللي بيبعتهولي لحد عندي
قول لربنا انك يا رمضان ماشي وأنت عارف إني عايزاك تفضل كل السنة رمضان
قول لربنا إني مركزة السنة دي في الدعاء على خمس حاجات وبدعي لخمس أشخاص بالاسم
قول لربنا مها عايزة تغير في نفسها تلات حاجات
قول لربنا نفسي ف نظرة الرضا
قول لربنا إني محتاجاه أوي
قول لربنا..... أو ما تقولش... لأن ربنا أكيد لما أجل العمرة السنة دي كان ليه حكمة،، إنما قوله إني كنت مستعدة نفسياً أوي أوي أوي

قول لربنا إني كنت مستنية لحظة ما هشوف الكعبة... كنت مستنية اللحظة دي جدا... إن شاء الله أروح لغاية عندها بس وأرجع
رمضان... أنت عارف أنا عايزة إيه منك صح؟ أيوه عارف!! نسيت؟؟ أفكرك؟؟ أنت مش عارف إن فيه معاد متعلق بيك يا رمضان أنا بدعي ربنا بيه على طول إنه يتم؟؟ ناسي!! بقى كده.. هاااااااا يوم جمعة من العشر الأواخر فيك قبل أذان المغرب... يعني هو أنا لازم أتكلم؟؟ أيوه كده.. يعني هو لازم العين الحمراء

رمضان.. كانت أيام حلوة أوي.. هنتقابل تاني مش كده؟
وياللا بأه أحسن عينيا اتملت دموع، ومضطرة أسيبك بأه
ولا أقولك... هختم بالكوبليه ده من أغنية والله لسه بدري.. مضطرة والله مع إني ما كنتش ناوية، بس الكلام حلو أوي

يا ضيف وقته غالي
وخطوة عزيزة
حبك حب عالي
في الروح والغريزة
أيامك قليلة
والشوق مش قليل
والغيبة طويلة
ع الصبر الجميل
لسه بدري حبة
يتملى الأحبة
والله لسه بدري والله
يا شهر الصيام

واقرأ أيضاً:
أحسن تستاهل: ورأيته  
أحسن تستاهل: تصدق كده عيب!!
أحسن تستاهل: أشرف الكل
أحسن تستاهل: ومضى........
يوميات مجنونة صايمة: وداعا...رمضان